ಈ ಸದಸ್ಯರ ಪಟ್ಟಿಯಲ್ಲಿ ವಿಜ್ಞಾನ ತಂತ್ರಜ್ಞಾನ ಸಾಹಿತ್ಯದ ಕ್ಷೇತ್ರದಿಂದ ಯಾರನ್ನೂ ನೇಮಕ ಮಾಡಲಾಗಿಲ್ಲ. ಇದೊಂದು ಬಹುದೊಡ್ಡ ಕೊರತೆ. ಈಗ ಬಹುಮುಖ್ಯವಾಗಿ ಬೇಕಾಗಿರುವುದು ಪ್ರಪಂಚದ ವಿವಿಧ ವಿಷಯ ಜ್ಞಾನವನ್ನು ಕನ್ನಡಕ್ಕೆ ಆಮದು ಮಾಡಿಕೊಳ್ಳುವುದು. ವಿಜ್ಞಾನ ತಂತ್ರಜ್ಞಾನ ಅತಿ ವೇಗದಲ್ಲಿ ಬೆಳೆಯುತ್ತಿದೆ. ಈ ಬಗ್ಗೆ ಇಂಗ್ಲೀಶಿನಲ್ಲಿ ವಿಪುಲವಾಗಿ ಲೇಖನಗಳು ಬರುತ್ತಿವೆ. ಇವುಗಳನ್ನು ಅಷ್ಟೇ ವೇಗದಲ್ಲಿ ಕನ್ನಡಕ್ಕೆ ತರಬೇಕಾಗಿದೆ. ನಗರಗಳಲ್ಲಿ ವಾಸಿಸುವ, ಇಂಗ್ಲೀಶಿನಲ್ಲಿ ಪರಿಣತರಾಗಿರುವ ಮಂದಿಗೆ ಈ ಅಗತ್ಯ ಕಣ್ಣಿಗೆ ಕಾಣಿಸುವುದೇ ಇಲ್ಲ. ನೀವು ಈ ಅಗತ್ಯವನ್ನು ತೋರಿಸಿಕೊಡಬಹುದು. ವಿಜ್ಞಾನ ತಂತ್ರಜ್ಞಾನ ಸಾಹಿತ್ಯವನ್ನು ಕನ್ನಡದಲ್ಲಿ ರಚಿಸಿರುವವರಲ್ಲಿ ಯಾರನ್ನಾದರೂ ಈ ಅಕಾದೆಮಿಗೆ ನೀವು co-opt ಮಾಡಬಹುದು.

ಸಾಹಿತ್ಯ ಕ್ಷೇತ್ರಕ್ಕೆ ಬಂದರೆ -ವಿಶ್ವದ, ಯಾಕೆ, ಭಾರತದ ಬಹುಮಂದಿಗೆ, ಕನ್ನಡದಲ್ಲಿ ಎಷ್ಟು ವಿಪುಲ ಸಾಹಿತ್ಯ ಇದೆ ಎಂಬ ಅರಿವೇ ಇಲ್ಲ. ಇದಕ್ಕಾಗಿ ಮಾಡಬೇಕಾಗಿರುವುದೇನೆಂದರೆ, ಕನ್ನಡದ ಸಾಹಿತ್ಯವನ್ನು ಇತರೆ ಭಾಷೆಗಳಿಗೆ ಅನುವಾದ ಮಾಡುವುದು ಮತ್ತು ಅವುಗಳನ್ನು ಅಂತರಜಾಲದಲ್ಲಿ ಸೇರಿಸುವುದು.

ಇನ್ನೇನಾದರೂ ನೆನಪಾದರೆ ಬರೆಯುತ್ತೇನೆ.

ಸಿಗೋಣ,
ಪವನಜ
-----------
Think globally, Act locally