ಮುನ್ನರಿಕೆ: ಇಲ್ಲಿ ಸಕ್ಕದದ ಹಗೆಯಲ್ಲ. ಸಕ್ಕದ ಹರಡಿಕೆಗೆ ನನ್ನ ಬೆಂಬಲವಿದೆ. ಹುರುಪಿರುವವರೆಲ್ಲರೂ ಸಕ್ಕದವನ್ನು ಕಲಿಯಲು ಅನುವಿರಬೇಕು. ಕನ್ನಡದಂತೆ ಸಕ್ಕದದಲ್ಲಿರುವ ಹೇರಳ ಅರಿವನ್ನು ಪಡೆಯಬೇಕು. ಈ ಕಾಣ್ಪಿನಲ್ಲಿ ಸಕ್ಕದವು ಕನ್ನಡದಂತೇ ಒಂದು ಮೇಲ್ಮಟ್ಟದ ನುಡಿಯೇ...

ಮೊನ್ನೆ ನಮ್ಮೂರಲ್ಲಿ ಒಂದು ಕೂಟವಿತ್ತು, ಬೆಂಗಳೂರಿನ ಒಂದು ಸಂಸ್ಕೃತವನ್ನು ಹರಡಿಸಲು ನಿಂತಿರುವ ಗುಂಪಿನವರು ನಡೆಸಿದ್ದು. ಅವರ ಹೆಸರು ಹೇಳಿದರೆ ಮತಾಂಧರಂತೆ, ಇರುವ ಕೆಲವು ಸಂಸ್ಥಾಂಧ, ಭಾಷಾಂಧರು ಸುಮ್ನೆ ಉರಿದುಕೊಂಡು ಎಗರಾಡ್ತಾರೆ. ಅದು ನಮ್ಮ ತಿರುಳಿನಿಂದ ಮಾತನ್ನು ಎತ್ತೆತ್ತಲೋ ಒಯ್ತದೆ.

ಇವರೆಲ್ಲ ಎಲ್ಲವನ್ನೂ ಸಕ್ಕದದಲ್ಲೇ ಹೇಳೋದಂತೆ. ನಾನೂ ಕೊಂಚ ಸಕ್ಕದವಾಡಿದ್ದು ದಿಟ ಅಲ್ಲಿ. ಆದ್ರೇ ಈ ಮಾಪುರುಸರು ಎನಿತ್ತು ತಪ್ಪು ತಪ್ಪು ಸಕ್ಕದ ಆಡ್ತಿದ್ರು ಅಂದ್ರೆ, ನಾನು ನನ್ನ ಕಸಿನ್ನ ನಕ್ಕು ನಕ್ಕು ದಣಿದೆವು. ಇವರಾಡುವ ಸಕ್ಕದದ ಕೆಲವು ತುಣುಕುಗಳು

"ಆಗಮನಂ ಕರೋತು, ಬೋಜನಂ ಕರೋತು, ಜಲಪಾನಂ ಕರೋತು, ದೂಮಪಾನ ನ ಕರೋತು, ಸರ್ವಾಹ ಆಸನಗ್ರಹಣಂ ಕರೋತು" , ಇದು ಯಾವ ಸೀಮೆ ಸಕ್ಕದವೋ.. ಎಲ್ಲದಕ್ಕೂ ಕರೋತು, ಕರೋತು.

"ಆಗಚ್ಛತು, ಭೋಜನಂ ಖಾದತು, ಜಲಂ ಪಿಬತು, ಧೂಮಂ ಮಾ ಪಿಬತು, ಸರ್ವೇ ಉಪವಿಶಂತು" ಹೀಗಲ್ವಾ ಹೇಳಬೇಕು ( ಇಷ್ಟ ಮಟ್ಟಿರಾದ್ರು ಇರಬೇಡ್ವಾ?). ಇಲ್ಲೇ ಗೊತ್ತಾಗ್ತಿತ್ತು, ಇವರಿಗೆ ಎಷ್ಟು ಸಕ್ಕದ ಗೊತ್ತು ಅಂತ. ಇವರು ಇನ್ಜು ದೇವರಾಣೆ ಕಾಳಿದಾಸ, ಭಾಸ ಮುಂತಾದವರನ್ನು ಓದಿರುವುದು ಐಬೇ!!

ಸರಿ, ಇನ್ನೇನು ಮಾಡೋದು ಹೋಗಿದ್ದಕ್ಕೆ ಇವರ ಕರೋತು-ಸಕ್ಕದದಲ್ಲಿ ಕೊರೆತ ಹೇಳಬೇಕಲ್ಲ, ಅಂತ ಕುಳಿತೆವು. ಅವನ್ಯಾವೋನು ಸುರು ಹಚ್ದ.( ಏಕವಚನ ಏಕೆ ಅಂದ್ರೆ ಅರಿಯದೇ ನುಡಿದು ಇವರು ತಮ್ಮ ಮರ್ಯಾದೆಯನ್ನು ಕಳೆದುಕೊಂಡಿದ್ದಾರೆ) ಬರೀ ಸುಳ್ಳು ಪೊಳ್ಳುಗಳ ಕಂತೆಯ ನುಡಿಯಾಟ. ಇದನ್ನೇ ಇಲ್ಲ ಅಂದ್ರು ಸಾವಿರ ಸರತಿ ಕೇಳಿದ್ದೀನಿ. ಒಳ್ಳೇ taperecorder ತರ ಹೇಳಿದ್ದನ್ನೇ ಹೇಳೋದು..

ಕೆಲವು ಸುಳ್ಳುಗಳು ಹೀಗಿವೆ.. ( ಇದನ್ನು ಯಾವ ಪಂಡಿತನಿಂದ ಬರೆಸಿಕೊಂಡು ಉರು ಹೊಡೆದಿದ್ದರೋ ಕಾಣೆ )

೧) ಸಂಸ್ಕೃತಂ ದೇವಭಾಷಾ, ತತಃ ತತ್ ಸರ್ವೋತ್ತಮಂ, ಪೂಜನೀಯಂ. ಸಕ್ಕದವು ದೇವರು ನುಡಿ, ಅದಕ್ಕೆ ಅದು ಎಲ್ಲದಕ್ಕಿಂತ ಮೇಲು, ಮತ್ತು ಅದನ್ನು ಪೂಜೆ ಮಾಡಬೇಕು.
೨) ಸಂಸ್ಕತಂ ಸರ್ವಭಾಷಾ ಜನನೀ| ಸಕ್ಕದವು ಎಲ್ಲ ನುಡಿಗಳ ತಾಯಿ
೩) ಸಂಸ್ಕೃತಂ ಪಠಣಾತ್ ಸರ್ವಾಃ ಭಾಷಾಃ ಸುಲಭಾಃ. ಸಕ್ಕದವನ್ನು ಓದುವುದರಿಂದ ಎಲ್ಲ ನುಡಿಗಳು ಸುಲಭ(ವಾಗಿ ತಿಳಿಯುವುದು )
೪) ಸಂಸ್ಕೃತಂ ವಿನಾ ಕನ್ನಡಭಾಷಾsಪಿ ಸತ್ವಹೀನಾ, ಕನ್ನಡಭಾಷಾ ಸಂಸ್ಕೃತಭಾಷಾಮೇವ ಅವಲಂಬಿತಾ| ಸಕ್ಕದವಿಲ್ಲದಿದ್ದರೆ ಕನ್ನಡವೂ ಜಾಳು. ಕನ್ನಡನುಡಿಯು ಸಕ್ಕದವನ್ನೇ ಒರಿಗೊಂಡಿದೆ, ಸಕ್ಕದದ ಬೆಂಬಲದಿಂದಲೇ ಬದುಕಿದೆ.
..

...
..

ಇಲ್ಲಿ ಮೇಲೆ ಹೇಳಿರುವ ನಾಲ್ಕು ಸಂಗತಿಗಳನ್ನು ಈ ಗುಂಪಿನ ಎಲ್ಲ ಕೂಟದಲ್ಲಿ, ಈ ಗುಂಪಿನ ಎಲ್ಲ ಮಂದಿ ಎಲ್ಲೆಡೆ ಹೇಳಿಕೊಂಡು ತಿರುಗ್ತಿರ್ತಾರೆ. ಈ ಮೇಲಿನವಲ್ಲಿ ಒಂದೂ ದಿಟವಲ್ಲ. ಅದೂ ಹೋಗಲಿ, ನಮ್ಮ ಮಣ್ಣಿನ ನುಡಿಯಾದ, ಬದುಕಿ ಬಾಳುತ್ತಿರುವ ಕನ್ನಡಕ್ಕೆ ಸಕ್ಕದದ ಹೋಲಿಕೆಯಾಕೇ? ಕನ್ನಡಕ್ಕೆ ಏನು ಈ ಸಕ್ಕದದಂತೆ ಊರೂರು ತಿರುಗಿ ಸಕ್ಕದವಾಡಿ ಸಕ್ಕದ ಮಾತಾಡಿ ಎಂಬ ಗತಿ ಬಂದಿದೆಯೇ?

ಇಂದು ಮಂದಿಗೆ ಸಕ್ಕದ ಕಲಿಯುವುದರಿಂದ ಅಂತಾ ಯಾವ ಬಾಳಿಕೆಯಿಲ್ಲ. ಆದ್ರೂ ಇವರು ಹೋಗಿ ಹೀಗೆ ಸುಳ್ಳು ಸುಳ್ಳನ್ನೇ ಹೇಳ್ತಾ ಇರ್ತಾರೆ.

ಸಂಸ್ಕೃತ ಪ್ರಚಾರಕ್ಕೆ ಕನ್ನಡವನ್ನು ಕೀಳಾಗಿ ಬಣ್ಣಿಸುವುದು, ಸುಳ್ಳುಗಳನ್ನು ಹೇಳುವುದು ಸರಿಯೇ?

ಸಂಸ್ಕೃತದಲ್ಲಿ ಚನ್ನಾಗಿರುವ ಬರವಣಿಗೆ ಇದೆ, ಒಳ್ಳೆಯ ಅರಿವಿದೆ, ಅದಕ್ಕೆ ಓದಿರಿ ಅಂದ್ರೆ ಸಾಲದೇ? ಯಾಕೆ ಬೇಕೀ ಡೋಂಗಿ ಬುದ್ದಿ? ಸುಳ್ಳು ಹೇಳಾದ್ರು ಮಂದಿಗೆ ಸಕ್ಕದ ಕಲಿಸಬೇಕು? ಈ ಬಗೆಯ ಕಪಟದಿಂದ ಯಾವ ಘನಸಮಾಜ ಕಲ್ಯಾಣ ಮಾಡುತ್ತಿದ್ದಾರೆ ಇವರು?

====

ಹಿನ್ನರಿಕೆ: ಸಕ್ಕದ ಹರಡಲಿ ಬೆಳಿಯಲಿ ಎಂಬದಕ್ಕೆ ನನ್ನ ಬೆಂಬಲವಿದೆ, ಆದರೆ ಅದು ಕನ್ನಡವನ್ನು ಸುಳ್ಳು ಸುಳ್ಳೇ ತೆಗಳಿ ಪೊಳ್ಳು ಮರೆವುದು ತಪ್ಪು!!