ಸುನಿಲರೆ,

ನಿಮ್ಮ ಭರತೇಶ ವೈಭವ ಸರಣಿಯಿಂದ ಹಲವಾರು ವಿಷಯಗಳನ್ನು ಕಲಿಯುತ್ತಿದ್ದೇನೆ

ಗಡಣಿಸು ಅನ್ನುವುದು ಗಡಣ ಅನ್ನುವ ನಾಮಪದದ ಕ್ರಿಯಾರೂಪವಿರಬೇಕೆಂದೆನಿಸುತ್ತೆ./

>>>"ಹಡಗು ದ್ವೀಪಕೆ ಹೋಗುತಿರಲು, ಅಲ್ಲಿ ವಸ್ತುವ ಗಡಣಿಸಿ ಕಳುಹುವನಂತೆ, ಬಿಡದೆ ಮುಕ್ತಿಗೆ ಹೋಹ ಮುನಿಯ ಕೈಗೆ,
>>> ಅನ್ನವ ನೀಡಬೇಡವೆ" ಎಂದು ನೆನೆವ.

ನನಗೆ ಹೀಗೆ ತೋರುತ್ತೆ:

ಗಡಣ -> (ಒಂದೇ ತರಹ ವಸ್ತುಗಳ) ಗುಂಪು, group
ಗಡಣಿಸು -> ಗುಂಪುಗೂಡಿಸು , classify, sort

ಕುಮಾರವ್ಯಾಸ ಉದ್ಯೋಗ ಪರ್ವದಲ್ಲಿ ಕೃಷ್ಣನಿಂದ ಕರ್ಣನಿಗೆ ಹೀಗೆ ಹೇಳಿಸುತ್ತಾನೆ:

" ಎಡದ ಕಡೆಯಲಿ ಕೌರವೇಂದ್ರನ ಗಡಣ ಬಲದ ಕಡೆಯಲಿ ಪಾಂಡು ಪುತ್ರರ ಗಡಣ ನಡುವೆ ಮದ್ರ ಮಾಗಧ ಯಾದವಾದಿಗಳು...."

ಇಲ್ಲಿನ ಕೌರವರು ಒಂದು distinct ಗುಂಪು, ಪಾಂಡವರು ಒಂದು distinct ಗುಂಪು. ಅಲ್ಲವೇ? ಹಾಗೇ ಬಂದರಿನಲ್ಲಿ, ಬೇರೆ ಬೇರೆ ಪದಾರ್ಥಗಳನ್ನು ಒಗ್ಗೂಡಿಸಿ, ಬೇರೆ ಬೇರೆ ರಾಶಿಗಳಲ್ಲೋ, ಕಟ್ಟುಗಳಲ್ಲೋ ಹಾಕಿ ಕಳಿಸುತ್ತಿದ್ದಿರಬಹುದಲ್ಲ? ಹಾಗಾಗಿ ಗಡಣಿಸು ಎನ್ನುವುದು classify, sort ಎನ್ನುವುದಕ್ಕೆ ಅಚ್ಚಕನ್ನಡಪದವಾಗಬಹುದೇ?

-ಹಂಸಾನಂದಿ

ಹರಿ ಮತ್ತು ಹಂಸಾನಂದಿ, ನಿಮಗೆ ಭರತೇಶ ವೈಭವದ ಸರಣಿ ಇಷ್ಟವಾಗುತ್ತಿರುವುದು ನನಗೂ ಸಂತೋಷ. ಗೆಳೆಯರೆ, ಮೇಲಿನ ಪದ್ಯದ ವಿಗ್ರಹ ವಾಕ್ಯ ಹೀಗಾಗಬೇಕಿತ್ತು.

"ಹಡಗು ದ್ವೀಪಕೆ ಹೋಗುತಿರಲು, ಅಲ್ಲಿ ವಸ್ತುವ ಗಡಣಿಸಿ ಕಳುಹುವನಂತೆ, ಬಿಡದೆ ಮುಕ್ತಿಗೆ ಹೋಹ ಮುನಿಯ ಕೈಗೆ, ಅನ್ನವನು ಇಡಬೇಡವೆ" ಎಂದು ನೆನೆವ.

ಹಂಸಾನಂದಿಯವರು, classify, sort ಎಂಬುದಕ್ಕೆ ಕನ್ನಡ ಪದಗಳು ಇರುವುದನ್ನು ಕುಮಾರವ್ಯಾಸ ಭಾರತದಿಂದ ಪದ್ಯಗಳನ್ನು ಉದಾಹರಿಸಿದ್ದು ಸಂತೋಷವಾಯಿತು. ಹೀಗೆ ಕನ್ನಡ ಪದಗಳ ಅರ್ಥವ್ಯಾಪ್ತಿಯನ್ನು ಹೆಚ್ಚಿಸುವ ನಿಟ್ಟಿನಲ್ಲಿ ಎಲ್ಲರೂ ಸಹಕರಿಸುವರೆಂದು ತಿಳಿಯುತ್ತೇನೆ.

ಗಡಣ -
ಈ ಪದದ ವಿಚಾರವಾಗಿ ಮಾಹಿತಿ ಕಲೆಹಾಕುತ್ತಿದ್ದಾಗ, ತುಂಬಾ ಆಶ್ಚರ್ಯಕರವಾದ ಒಂದು ಮಾಹಿತಿ ಸಿಕ್ಕಿತು. ಕನ್ನಡದಲ್ಲಿ ಗಡಂಗ, ಗಡಂಗು, ಗಿಡ್ಡಂಗಿ - storeroom, godown ಎಂಬ ಪದಗಳು ಇವೆಯಂತೆ. ಸಾಮಾನ್ಯವಾಗಿ ಇಂಗ್ಲೀಷಿನ ಗೋಡೌನ್ ಎಂಬುದಕ್ಕೆ "ಗೋದಾಮು" ಎಂಬುದಾಗಿ ಕನ್ನಡದಲ್ಲಿ ಗ್ರಾಂಥಿಕವಾಗಿ ಬಳುಸುವುದುಂಟು. ಆದರೆ, ಜನರಿಗೆ ಗೋದಾಮಿಗಿಂತ "ಗೊಡೋನ್" ಎಂಬುದೇ ಮೆಚ್ಚಿನ ಪದವಾಗಿದ್ದರೆ ಆಶ್ಚರ್ಯವಿಲ್ಲ. ಏಕೆಂದರೆ, 'ಗೊಡೋನ್' ಎಂಬ ಪದದ ವ್ಯುತ್ಪತ್ತಿಯನ್ನು ಕನ್ನಡದಲ್ಲಿಯೂ ನೀಡಬಹುದು. ಗೊಡೌನ್ ಎನ್ನುವುದು ಕನ್ನಡದಂತಿರುವ ಇಂಗ್ಲೀಷ್ ಪದ (ಅಥವಾ ಇಂಗ್ಲೀಷಿನಂತಿರುವ ಕನ್ನಡ ಪದ) ??. ಒಟ್ಟಿನಲ್ಲಿ ಇಲ್ಲಿ ಏನೋ "ಕೊಟ್ಟು-ತಂದು" ಆಗಿದೆ.

ಹಾಗೆಯೇ ಮತ್ತೊಂದು ವಿಚಾರ ಗಮನಿಸಿ, ಗಡಂಗ->ಗಡಣ->ಗಣ ಎಲ್ಲವೂ ಒಂದೇ ರೀತಿಯಾದ ಅರ್ಥವನ್ನು ಸೂಚಿಸುತ್ತಿವೆ.