ಕನ್ನಡಕಂದರೆ, ಒಳ್ಳೆಯ ಚರ್ಚೆ ಮುಂದು ಮಾಡಿದ್ದೀರಿ. ಇಲ್ಲಿ ಯಾವ ಸಂಗೀತ ಯಾವ ಬಗೆಯದ್ದು ಎಂಬುದನ್ನು ಗಣನೆಗೆ ತೆಗೆದುಕೊಳ್ಳಬೇಕಾಗುತ್ತದೆ. ಶಾಸ್ತ್ರೀಯವಾದರೆ ಪದ್ಯಗಳಿಗೆ ಚೌಕಟ್ಟು, ಪ್ರಾಸ, ಮಾತ್ರೆ ಇವುಗಳು ಇದ್ದರೆ ಸಂಗೀತಕ್ಕೆ ಚೆನ್ನಾಗಿ ಅಳವಡಿಸಬಹುದು.

ಆದರೆ, ಈ ಕಡೆ ಶಾಸ್ತ್ರೀಯವೂ ಅಲ್ಲದ, ಆ ಕಡೆ ಜನಪದವೂ ಅಲ್ಲದ ಬೇರೆಬಗೆಯ ಸಂಗೀತವೂ ಇಷ್ಟವಾಗುತ್ತದೆ. ಇವುಗಳಿಗೆ ಪ್ರಾಸಗಳು, ಚೌಕಟ್ಟು, ಮಾತ್ರೆಗಳು ಯಾವುದೂ ಬೇಕಾಗುವುದಿಲ್ಲ.

ಆದರೆ ಹೆಚ್ಚಿನ ಸಂಗೀತದಲ್ಲಿ, ಬೇರೆ ಯಾವುದು ಇಲ್ಲದಿದ್ದರೂ, ಪ್ರಾಸಗಳು ಮಾತ್ರ ಇದ್ದೇ ಇರುತ್ತದೆ.
ಉದಾ: ಇತ್ತೀಚೆಗೆ ಬಿಡುಗಡೆಯಾದ, ಗೆಳೆಯ ಸಿನಿಮಾದ ಚಾಂಗು ಭಳಾ ಚಾಂಗು ಭಳಾ ಚಾಂಗುರೆ. ಇಲ್ಲಿ ಛಂದಸ್ಸು ಇಲ್ಲದಿದ್ದರೂ ಪ್ರಾಸವಿದೆ.

ತಾಳದಲಿ ಮೇಳದಲಿ ಸುಶ್ರಾವ್ಯಮಪ್ಪಂತೆ
ಗಾಳಿ ತಾ ಬೀಸುವಂದದಿ
ಬೀೞುಗಳೆಯದೆ ಪ್ರಾಸವನು ಛಂದವನು ನೀ
ಹೇೞೆಂದ ಕನ್ನಡಕಂದ

ಬೀಸುವ ಮೆಲ್ಗಾಳಿಯಂದದಲಿ ಸುಲಭದಲಿ
ತಾಸುಗಟ್ಟಲೆ ಹಾಡಲು
ಪ್ರಾಸದಲಿ ಛಂದದಲಿ ಕವಿತೆಯನೊರೆಯೆಂದು
ಶಾಸಿಸಿದನು ಕನ್ನಡಕಂದ