"ಸೀ ಐಲೆಂಡ್ ಹತ್ತಿ " ತಾಯಿಯಂತೆ ಪಾತ್ರವಹಿಸಿದ್ದು ವಿಶ್ವದ ಸೂಕ್ಷ್ಮಹತ್ತಿಗಳಿಗೆ ದಾರಿಯಾಗಿದೆ !

ಹತ್ತಿಗಳ ಬಗ್ಗೆ ಈ ಒಂದು ಕಿರುಲೇಖನ ಸಂಪದಿಗರಿಗೆ ಇಷ್ಟವಾಗಬಹುದು. ವಿಶ್ವದ ಹತ್ತಿಗಳು ಕೇವಲ ೪ ಎಂದು ಪರಿಗಣಿಸಲಾಗಿದೆ. ಒಟ್ಟು ೩೨ ಹತ್ತಿ ಜಾತಿಗಳಿದ್ದರೂ ಫೈಬರ್ ಹೊಂದಿದ ಹತ್ತಿಗಳು ನಾಲ್ಕು ಮಾತ್ರ !

ನಮ್ಮ ಭಾರತದೇಶದ ಹತ್ತಿಗಳನ್ನು ದೇಸಿ ಹತ್ತಿಗಳು * [ ಗಾ. ಅರ್ಬೋರಿಯಮ್ಸ್ ಮತ್ತು ಗಾ. ಹರ್ಬೇಸಿಯಮ್ಸ್ ]ಎಂದು ಎರಡು ಭಾಗಗಳಾಗಿ ವಿಂಗಡಿಸಬಹುದು. ಇವು ’ಚಿಕ್ಕಹತ್ತಿ ’ಯೆಂದು ಕರೆಯಲ್ಪಡುತ್ತವೆ. ಇವುಗಳ ಸ್ಟೇಪಲ್ ಲೆಂಥ್ ೨೩ ಮಿ. ಮೀ ನಿಂದ ೨೫ ಮಿ. ಮೀ ಮಾತ್ರ ಇರುತ್ತದೆ. ಇದನ್ನೇ ಉಪಯೋಗಿಸಿಕೊಂಡು ನಮ್ಮ ನೇಯುವ ಕೆಲಸಗಾರರು" ಢಾಕ ಮಸ್ಲಿನ್ "ಎಂಬ ಅತ್ಯಂತ ನವಿರಾದ, ವಿಶ್ವವಿಖ್ಯಾತ ಬಟ್ಟೆಗಳನ್ನು ನೇಯುತ್ತಿದ್ದರು. ತಮ್ಮ ಬೆರಳಿನ ತುದಿಯಲ್ಲಿ ಉದ್ದವಾದ ಉಗುರುಗಳನ್ನು ಬೆಳಸಿಕೊಂಡು ಅದರ ಉಪಯೋಗದಿಂದ "ಅತಿ ಸೂಕ್ಷ ದಾರಗಳನ್ನು " ನೂಲುತ್ತಿದ್ದರು. ಅದರ ದಾಖಲೆಗಳಿವೆ. [ ಕೌಂಟ್ ೩೫೦ ರಿಂದ ೪೦೦ ರವರೆಗೆ]

ಇವನ್ನು, ಅಂದರೆ ಇಂತಹ ದಾರಗಳನ್ನು ಯಂತ್ರಗಳಲ್ಲೂ ನೂಲುವುದು ಸಾಧ್ಯ. ಆದರೆ ದೇಸಿಹತ್ತಿಯಿಂದ ಅಷ್ಟು ಸೂಕ್ಷ್ಮ ದಾರ ತಯಾರಿಸುವುದು ಒಂದು ಸವಾಲು ; ಮತ್ತು ಅಸಾಧ್ಯ.

ದೊಡ್ಡಹತ್ತಿಗಳು ಎರಡು. ** ಅವು ಗಾ. ಹರ್ಸುಟಮ್ ಮತ್ತು ಗಾ. ಬಾರ್ಬಡೆನ್ಸಿ ಎಂದು. ನಾನು ಉಲ್ಲೇಖಿಸಿರುವ ಒಂದು ಪ್ರಜಾತಿ- ಸೀ ಐಲೆಂಡ್ ಕಾಟನ್. ಇದರ ಸ್ಟೇಪಲ್ ಲೆಂಥ್ ೩೮ ರಿಂದ ೪೦ ಮಿ. ಮೀಗಳವರೆಗೆ ಇರುತ್ತೆ. ಇದು ಅತ್ಯಮೂಲ್ಯವಾದ ಜಾತಿ ಹತ್ತಿ. ಇದನ್ನು ಉಪಯೋಗಮಾಡಿ, ಇಜಿಪ್ಷಿಯನ್, ಮತ್ತು ಇಂದು ವಿಶ್ವದಲ್ಲೇ ಮಂಚೂಣಿಯಲ್ಲಿರುವ ಅಮೆರಿಕನ್ ಇಜಿಪ್ಷಿಯನ್ ಹತ್ತಿ, " ಪಿಮಾ " ಎಂಬುದು. ಇವುಗಳನ್ನು ಅಭಿವೃದ್ಧಿ ಪಡಿಸಲು ಸುಮಾರು ೧೩೦ ವರ್ಷಗಳಿಂದ ಭಾರತವೂ ಸೇರಿದಂತೆ ಅನುಸಂಧಾನಗಳು ಬೃಹತ್ ಪ್ರಮಾಣದಲ್ಲಿ ನಡೆದವು. ಇನ್ನೂ ನಡೀತಾನೆ ಇವೆ. ಒಂದು ಕೊಡುಗೆ ಎಂದರೆ, ನಮ್ಮದೇಶದ ತಮಿಳ್ನಾಡಿನಲ್ಲಿ ’ ಸುವಿನ್ ’ ಎಂಬ ಹತ್ತಿ ಒಳ್ಳೆ ಗುಣಮಟ್ಟ ಸಾಧಿಸಿದೆ. ಧಾರವಾಡ, ರಾಯ್ಚೂರ್, ಗುಂಟೂರ್ ಗಳಲ್ಲೂ ಉತ್ತಮ ಫಲಿತಾಂಶಗಳು ಕಂಡುಬಂದಿವೆ.

ಆದರೆ ಈ ಗಡಿಬಿಡಿ ಕೆಲಸಗಳಲ್ಲಿ, "ಸೀ ಐಲೆಂಡ್ ಹತ್ತಿ " ಈಗ ಕಾಣೆಯಾಗಿದೆ. ಜೀನ್ ಬ್ಯಾಂಕುಗಳಲ್ಲಿ ಮಾತ್ರ ಉಪಲಬ್ಧ ಅಷ್ಟೆ !

ಸದ್ಯಕ್ಕೆ ಇಷ್ಟು ಸಾಕು. ಅಲ್ಲವೇ !

-*G. Arboreum and G. Herbesium

-**G. Hirsutum and G. Barbadense