ಕಿಶೋರ್, ನಾನು ಕಿರಿಮಂಜೇಶ್ವರದವನೇ. ನಿಮ್ಮನ್ನು ಆಕರ್ಷಿಸಿದ, ಚಿತ್ರ ರಚಿಸಲು ಸ್ಫೂರ್ತಿಯಾದ ಆ ಬಂಡೆಗಲ್ಲುಗಳಿವೆಯಲ್ಲ, ಅವುಗಳ ನೇರಕ್ಕೆ ಸಮುದ್ರ ದಡದಲ್ಲಿ ಕಾಣಿಸುವ ಮನೆಯಲ್ಲೇ ನಾನು ಹುಟ್ಟಿದ್ದು, ಬೆಳೆದಿದ್ದು, ಆಡಿದ್ದು... ಎಲ್ಲಾ.

ಬಹುಶಃ ನಿಮ್ಮ ಗಮನಕ್ಕೆ ಬಂದಿಲ್ಲದೇ ಇರಬಹುದು. ಈ ಬಂಡೆಗಲ್ಲುಗಳ ರಾಶಿ ಆರಂಭವಾಗುವ ಸ್ಥಳದಲ್ಲಿ ಸ್ವಲ್ಪ ಆಚೆ ಅಥವಾ ಈಚೆ ಶಿವಲಿಂಗದಂಥ ಒಂದು ಕಲ್ಲಿದೆ. ಬೇಸಿಗೆಯಲ್ಲಿ ಸಮುದ್ರದ ಅಲೆಗಳು ಮರಳಿನ ರಾಶಿಯನ್ನೇ ತಂದು ಹೇರುವುದರಿಂದ ಇದು ಅಷ್ಟಾಗಿ ಕಾಣಿಸುವುದಿಲ್ಲ. ಮಳೆಗಾದಲ್ಲಿ ನೀರಿನ ರಭಸಕ್ಕೆ ಮಣ್ಣು ಕೊಚ್ಚಿಕೊಂಡು ಹೋದಾಗ ಈ ಶಿವಲಿಂಗದಂಥ ಕರಿಕಲ್ಲು ಪ್ರತ್ಯಕ್ಷವಾಗುತ್ತದೆ. ತಮಾಷೆಯೆಂದರೆ ಈ ಕಲ್ಲಿನ ಬುಡದಲ್ಲಿ ಅದಕ್ಕೆ ತಾಗಿಕೊಂಡು ಮಣೆಯಾಕಾರದ ಕಲ್ಲೂ ಇದ್ದು, ನಾವೆಲ್ಲ ಚಿಕ್ಕವರಿರುವಾಗ ಇದು ಅರ್ಚಕರು ಕುಳಿತುಕೊಂಡು ಪೂಜೆ ಮಾಡುವ ಮಣೆ ಎನ್ನುತ್ತಾ, ಅದರ ಮೇಲೆ ಕುಳಿತುಕೊಂಡು ಶಿವಲಿಂಗಕ್ಕೆ ಕರವೇರ ಪುಷ್ಪವೇರಿಸಿ ಪೂಜೆ ಮಾಡುವ ಆಟ ಆಡುತ್ತಿದ್ದೆವು!

ದಾಖಲಿಸಲೇಬೇಕಾದ ವಿಷಯವೆಂದರೆ ಈ ಶಿವಲಿಂಗದಂಥ ಕರಿಕಲ್ಲಿನ ನೇರದಲ್ಲೇ ಕಿರಿಮಂಜೇಶ್ವರದ ಅಗಸ್ತ್ಯೇಶ್ವರ ದೇವಸ್ಥಾನದ ಶಿವನ ವಿಗ್ರಹವಿದೆ. ಆದರೆ ಈ ಕರಿಕಲ್ಲಿಗೂ ಅಗಸ್ತ್ಯೇಶ್ವರನಿಗೂ ಪುರಾಣದಲ್ಲಾಗಲೀ ಇತಿಹಾಸದಲ್ಲಾಗಲೀ ಯಾವುದೇ ಸಂಬಂಧವಿದ್ದಂತಿಲ್ಲ ಎಂದು ನಮ್ಮಪ್ಪ ಹೇಳುತ್ತಿದ್ದ ನೆನಪು.

ಏನೇ ಆಗಲಿ, ನೀವು ಕಿರಿಮಂಜೇಶ್ವರಕ್ಕೆ ಹೋಗಿಬಂದಿರಿ ಎಂದಾಗ ಒಮ್ಮೆ ನಮ್ಮೂರಿನ ನೆನಪು ಕಣ್ಣ ಮುಂದೆ ಹಾದು ಹೋಯಿತು. ಹಾಗಾಗಿ ಇಷ್ಟೆಲ್ಲ ಬರೆಯಬೇಕಾಯಿತು.

ನಿಮ್ಮ ತೈಲವರ್ಣ ಚಿತ್ರ ಆ ಬಂಡೆಗಲ್ಲುಗಳು, ಭೋರ್ಗರೆಯುತ್ತಾ ಯಾವುದೋ ಧಾವಂತದಲ್ಲಿ ಮುನ್ನುಗ್ಗುತ್ತಿರುವ ಸಮುದ್ರ- ಎಲ್ಲವನ್ನೂ ಯಥಾವತ್ ಹೇಳಿದೆ. ಧನ್ಯವಾದಗಳು.