ರಾತ್ರಿ ಎಂದಿನಂತೆ ತಡವಾಗಿ ಮನೆಗೆ ಬರುವಾಗ ‘ನನ್ನ ರಾಣಿ’ ಜತೆ ಅಕ್ಕಪಕ್ಕದ ಮನೆ ಹೆಂಗಸರು ಟೆರೇಸ್‌ನಲ್ಲಿ ನಿಂತಿರುವುದು ಕಾಣಿಸಿತು. ಮೇಲೆ ಹೋಗಿ ನೋಡಿದರೆ ಚಟ್ಟಿಯಲ್ಲಿ ಬೆಳೆಸಿದ ರಾತ್ರಿ ರಾಣಿ ಗಿಡದಲ್ಲಿ ೨ ಹೂಗಳು ಅರಳಿದ್ದವು. ಅರಳಿದ ೩ ಹೂಗಳಲ್ಲಿ ಒಂದು ಹೂವನ್ನು ಆಗಲೇ ಒಬ್ಬರು ಪೂಜೆಗೆಂದು ಕತ್ತರಿಸಿ ತೆಗೆದುಕೊಂಡು ಹೋಗಿದ್ದರು.

ಇಷ್ಟು ಸುಂದರ ಮತ್ತು ಸುವಾಸನೆಯಿಂದ ಕೂಡಿದ ಹೂ ರಾತ್ರಿ ಹೊತ್ತು ಮಾತ್ರ ಕೆಲವೇ ಕ್ಷಣಗಳು ಕಾಣಿಸಿ ಮರೆಯಾಗುವುದು.ರಾಣಿಯಂತೆ ಈ ಹೂವಿನ ದರ್ಶನ ಭಾಗ್ಯ ಅಪರೂಪವಾದುದರಿಂದ ಈ ಹೆಸರು ಬಂದಿರಬೇಕು.
ಕಾಂಡವೇ ಎಲೆಯಾದಂತೆ,ಎಲೆಯೇ ಹೂವಾದಂತೆ ಕಾಣಿಸುವ ಇದಕ್ಕೆ ‘ಬ್ರಹ್ಮಕಮಲ’ಎಂಬ ಇನ್ನೊಂದು ಹೆಸರೂ ಇದೆ. ಕಮಲ ಕೆಸರಲ್ಲಿರುವುದು, ಅದನ್ನಾಗಲೇ ಲಕ್ಷ್ಮಿ ತನ್ನ ವಶಕ್ಕೆ ತೆಗೆದುಕೊಂಡುದಕ್ಕೋ ಏನೋ,ಬ್ರಹ್ಮ ಅದಕ್ಕೂ ಸುಂದರವಾದ ಈ ಹೂವನ್ನು ಸೃಷ್ಠಿಸಿ ತನ್ನ ಹೆಸರನ್ನು ಜೋಡಿಸಿಕೊಂಡಿರಬೇಕು.
ಎಲ್ಲೇ ಗಿಡ, ಮರ ಕಾಣಲಿ ಅದರ ಹೂ,ಹಣ್ಣು, ಕಾಂಡ,ಬೇರು,ಕಡೆಗೆ ಅದರ ಸುತ್ತಲಿನ ಮಣ್ಣನ್ನೂ ಬಿಡದೇ ಉಪಯೋಗಿಸುವ ಆಯುರ್ವೇದ ವೈದ್ಯರು, ಇದರ ಸೌಂದರ್ಯಕ್ಕೆ ಮರುಳಾಗಿ ಔಷಧಿಯಾಗಿ ಉಪಯೋಗಿಸಿಲ್ಲ ಎಂದು ತಿಳಿದಿದ್ದೆ.
’..ಜಗತ್ಯೇವಂ ಅನೌಷಧಂ’ಎಂದು ಎನೋ ಒಂದು ಶ್ಲೋಕ ಹೇಳಿ,ಪರಿಚಿತ ವೈದ್ಯರೊಬ್ಬರು ಇದರ ಬಗ್ಗೆ ಹೇಳಿದ್ದು-
Latin name- -Saussurea obavallata
೨-೩ ಅಡಿ ಬೆಳೆಯುವ ಕ್ಷುಪ.ಉದ್ದನೆಯ ಎಲೆ,ಸುಗಂಧಿತ.
ಉಗ್ರ ಸುಗಂಧಯುಕ್ತ,ಅತಿ ಸುಂದರ ಪುಷ್ಪ.ಇದರ ಪುಷ್ಪದ ಭಸ್ಮ(ಅಯ್ಯೋ ರಾಮ)ವನ್ನು
ಪ್ಲೀಹಾವೃದ್ಧಿಯಲ್ಲಿ ಜೇನಿನ ಜತೆ ಕೊಡುವರು.ಅಪಸ್ಮಾರ ಮತ್ತು ಮಾನಸಿಕ ರೋಗದಲ್ಲಿ ಇದರ ಪುಷ್ಪದಿಂದ ಸಿದ್ಧಪಡಿಸಿದ
ತೈಲ ದಿಂದ ತಲೆಗೆ ಮಾಲೀಶ್ ಮಾಡುವರು.ಬೇರನ್ನೂ ಗಾಯ ಇತ್ಯಾದಿಗೆ ಲೇಪನಕ್ಕೆ ಉಪಯೋಗಿಸುವರು.ಹಿಮಾಲಯ ಆಸು ಪಾಸಿನಲ್ಲಿ ಹೆಚ್ಚು ಬೆಳೆಯುವುದು. ..

ಕೊನೇ ಮಾತು- ನಿಮ್ಮಂತೆ ನನಗೂ ಅನಿಸುತಿದೆ-ವಸಂತ ಕಜೆಯವರ ಕೈ(ಕ್ಯಾಮರಾ)ಗೆ ಈ ಹೂವು ಸಿಗಬೇಕಿತ್ತು.ನಾನು ನನ್ನ ಮೊಬೈಲಲ್ಲಿ ತೆಗೆದ ಫೊಟೋಗಳು.ಚೆನ್ನಾಗಿ ಬಂದಿಲ್ಲವಾದರೆ ಆ ಹೂವಿನ ಕ್ಷಮೆ ಕೇಳುವೆ.ಫೊಟೋವೇ ಬರಲಿಲ್ಲವಾದರೆ ಕ್ಷಮಿಸಿ.ಪುನಃ ನಾಳೆ ಪ್ರಯತ್ನಿಸುವೆ.