ಎರಡು ಸಂಪುಟಗಳ ಬೃಹತ್ ಗಾತ್ರದ " ಕರ್ಣಾಟಕ ಭಾಗವತ ", ವಿಶ್ವದ ಜನತೆಗೆ ಲಭ್ಯವಾಗಲಿದೆ. ರಾಮಾಯಣ- ಮಹಾಭಾರತಗಳನ್ನು ಬಿಟ್ಟರೆ, ಭಾಗವತಪುರಾಣವು ಅತಿ ಶ್ರೇಷ್ಠವೂ, ಸುಪ್ರಸಿದ್ಧವೂ ಆದ ಗ್ರಂಥ. ಶ್ರೀಕೃಷ್ಣಚರಿತ್ರೆಯ ಪೂರ್ಣವಿಸ್ತಾರಕ್ಕೆ ಇದೇ ಆಧಾರ ಕೃತಿ. ವಿಷ್ಣುವಿನ ೨೨ ಅವತಾರದ ಕಥೆಗಳು, ಭಾರತವರ್ಷದ ಸುಪ್ರಸಿದ್ಧ ರಾಜರ ವಂಶಾವಳಿಗಳ ವರ್ಣನೆ, ವಿರಾಟ್ ವಿಶ್ವದ ಸೃಷ್ಟಿಪ್ರಳಯಗಳ ವಿವರಗಳು, ಮುಂತಾದ ಮನೋಲ್ಲಾಸಪೂರ್ವಕ ಸಂಗತಿಗಳು, ಈ ಗ್ರಂಥದ ಪುಟಗಳಲ್ಲಿ ತುಂಬಿವೆ. ಭಕ್ತಿಮಾರ್ಗದ ಅಮೂಲ್ಯತೆಯನ್ನೂ ಗೋಪಿಯರ ಪ್ರೇಮೋನ್ಮಾದದಲ್ಲಿಯೂ, ರಾಕ್ಷಸರ ಕ್ರೋಧದಲ್ಲಿಯೂ, ಸಂತರಭಕ್ತಿಯಲ್ಲೂ, ಯೋಗಿಗಳಬೋಧನೆಯಲ್ಲೂ ಹಿಡಿದು ತೋರಿಸಿದೆ. ೧೬ ನೆಯ ಶತಮಾನದಲ್ಲಿ ಆರಂಭವಾದ ಈ ಮಹಾಕಾವ್ಯದ ರಚನೆ, ತಾಳೆಗರಿಗಳ ಹಸ್ತಪ್ರತಿಗಳಿಂದ ಪ್ರಸಾರಗೊಂಡಿತ್ತು. ೧೯೧೧ ರ ಮುದ್ರಣದ ನಂತರ ಸಮಗ್ರ ಭಾಗವತದ ಪ್ರಕಟಣೆಯಾಗಿರಲಿಲ್ಲ. ಸಮಗ್ರವೂ, ಪರಿಷ್ಕೃತವೂ ಆದ ಕನ್ನಡ ಭಾಗವತದ ಜನಪ್ರಿಯ ಆವೃತ್ತಿಯನ್ನು ಕನ್ನಡ ಸಹೃದಯರಿಗೆ, ಅಮೆರಿಕದ ಹೂಸ್ಟನ್ ನಗರದಲ್ಲಿರುವ, " ಹೂಸ್ಟನ್ ಕನ್ನಡ ವೃಂದ," ದ ಬೆಳ್ಳಿ-ಹಬ್ಬದ ಸವಿನೆನಪಿನ ಆಚರಣೆಯ ಸಂದರ್ಭದಲ್ಲಿ ೧೨, ಏಪ್ರಿಲ್, ೨೦೦೮ ರಂದು, ಆಹ್ವಾನಿತ ಸಭಿಕರ ಸಮ್ಮುಖದಲ್ಲಿ ಬಿಡುಗಡೆಮಾಡಲಾಗುವುದು.

ಎರಡು ಸಂಪುಟಗಳ "ಕರ್ಣಾಟಕ ಭಾಗವತ" ದ ಆವೃತ್ತಿಯಲ್ಲಿ, ೧೨, ೮೮೪ ಪದ್ಯಗಳಿವೆ. ೧೨ ಸ್ಕಂದಗಳಿವೆ. ಮೂಲ ತಾಳೆಗರಿಗಳ ಬಣ್ಣದ ಚಿತ್ರಗಳಿವೆ. ಇಂಗ್ಲೀಷ್ ನಲ್ಲಿ ಸಂಕ್ಷಿಪ್ತ ಕಥಾಸಾರವಿರುವುದಲ್ಲದೆ, ಪುಸ್ತಕದ ಕೊನೆಯಲ್ಲಿ 'ಕ್ಲಿಷ್ಟಪದಗಳ ಅರ್ಥಕೋಶ,' ಸಹಿತ ಇದೆ.

-ಡಾ. ಹೊಳಲ್ಕೆರೆ, ರಂಗರಾವ್ ಚಂದ್ರಶೇಖರ್, ಲಿಪಿಕಾರ, ಸಂಪಾದಕ, ಕೊಲಂಬಿಯ, ಅಮೆರಿಕ ಸಂಯುಕ್ತ ಸಂಸ್ಥಾನ.

ಶತಮಾನಗಳಿಂದ ಸಂಗ್ರಹಿಸಿಟ್ಟಿದ್ದ, ತಾಳೆಗರಿಗಳಿಂದ ಹೆಕ್ಕಿಹೊರಹೊಮ್ಮಿದ, ಅಪರೂಪದ ಭಾಮಿನಿ ಷಟ್ಪದಿಯ ಪದ್ಯಗಳ ಜೊತೆಗೆ, ಆಂಗ್ಲಭಾಷೆಯ ಕಥಾಸಾರಗಳಿಂದ ಕನ್ನಡ ಭಾಷಾಪ್ರೇಮಿಗಳಿಗೆ, ಸಂಶೋಧಕರಿಗೆ, ಹಾಗೂ ಕಾವ್ಯಾಸಕ್ತರಿಗೆ, ರಸದೌತಣವಾಗಿ ಲಭ್ಯವಾಗುವ ದಿನಗಳು ಹತ್ತಿರವಾಗುತ್ತಿವೆ. ಸುಪ್ರಸಿದ್ಧ ಸಂಸ್ಕೃತ ವಿದ್ವಾಂಸರ ಹಾಗೂ ಶಿಕ್ಷಣತಜ್ಞರಿಂದ ಪೋಶಿಸಲ್ಪಟ್ಟು ಸುಮಾರು, ೧೩ ವರ್ಷಗಳ ಸಾಧನೆಯ ನಂತರ ಬಿಡುಗಡೆಗೆ ಸಿದ್ಧವಾಗಿ ನಿಂತಿದೆ.

ಹೊಸಸುದ್ದಿ :

ಹೌದು. ಇತ್ತೀಚಿನ ವರದಿಗಳು ಬಂದಾಗ, ಪೂರ್ವಸಿದ್ಧತೆಯಂತೆ, ಪುಸ್ತಕದ ಬಿಡುಗಡೆ ಸಮಾರಂಭ ಹೂಸ್ಟನ್ ಕನ್ನಡ ಸಂಘದ ಸದಸ್ಯರ ಸಮ್ಮುಖದಲ್ಲಿ ನಡೆದು, ಆ ನಗರದ ವಾಸಿಗಳು, ಹಾಗೂ ಕನ್ನಡಸಾಹಿತ್ಯಾಭಿಮಾನಿಗಳು, ಇದನ್ನು ಮನಃಪೂರ್ವಕವಾಗಿ , ಅತ್ಯಂತ ಹರ್ಷದಿಂದ ಸ್ವಾಗತಿಸಿದರು. ಅಂದು, ಮಕ್ಕಳಿಂದ ನಡೆಸಿಕೊಡಲ್ಪಟ್ಟ ಮನರಂಜನೆಯ ಕಾರ್ಯಕ್ರಮಗಳು, ಎಲ್ಲರಿಗೂ ಮುದನೀಡಿದವು.

-ವರದಿಗಾರರು, ಚಿ. ಪ್ರಕಾಶ್

http://www.kannadavrinda.org/htmls/HoustonBrochure.pdf