ಯಾವ ಸಿನಿಮಾ ಜ್ಞಾಪಕಕ್ಕೆ ಬರುತ್ತಿಲ್ಲ. ಆದರೆ ಚಿತ್ರದ ಹಾಡುಗಳು ನೆನಪಿನಲ್ಲಿವೆ.

ಆ ಸಿನಿಮಾದ ಒಂದು ಹಾಡು - ನಿಂಗಿ, ನಿಂಗಿ, ನಿಂಗೀ - ಆಸೆ ಕದ್ದೀಯಲ್ಲೆ ನಿಂಗಿ.

ಅದೇ ಚಿತ್ರದಲ್ಲಿ ಮತ್ತೊಂದು ಹಾಡು ಇದೆ,

ಅ ಆ ಇ ಈ ಎ ಏ ಐ ಒ ಓ ಔ ಅಂ ಅಃ -  ( ಪ್ರಾಸಕ್ಕಾಗಿ ಋ ಇಲ್ಲ ಅದರಲ್ಲಿ)

ಓಯ್ ಕನ್ನಡ ಪಂಡಿತರೆ,

ಏನ್ ಕನ್ನಡ ಕೂಸುಗಳೇ ಅಂತ

ಆ ಹಾಡಿನಲ್ಲಿ  ಒಂದು ಸಾಲು ಬರುತ್ತದೆ.

ಇಂಗ್ಲಿಷ್ ಭಾಷೆ ದೊಡ್ಡದಾಯ್ತ್ಯಾಕೆ - ತಾಯಿ ಭಾಷೆನ ಅವ್ರು ಪ್ರೀತಿ ಮಾಡಿದ್ದಕ್ಕೆ.

ಕನ್ನಡದ ಭಾಷೆ ಚಿಕ್ಕದಾಯ್ತ್ಯಾಕೆ - ಕೊಡ್ದೇನೆ ಬರೆ ತೊಗೊಂಡಿದ್ದಕ್ಕೆ, 

 ಇರುವ ಪದಗಳನ್ನು ಬಿಟ್ಟು ಸುಮ್ಸುಮ್ನೆ, ಬಳಕೆಯಲ್ಲಿಲ್ಲ ಅಂತ ಕೈ ಚೆಲ್ಲುತ್ತಾ ಕೂತರೆ, ನಮ್ಮ ಭಾಷೆ ನಿಜವಾಗಿಯೂ ಶಾಸ್ತ್ರೀಯ ಭಾಷೆಯೆ ಆಗುತ್ತದೆ. ಅಂದರೆ ಒಳ್ಳೆಯ ಭಾಷೆ ಅಂತ ಎಲ್ಲರಿಗೂ ತಿಳಿದಿರುತ್ತೆ. ಆದರೆ ಯಾರೂ ಬಳಸುವುದಿಲ್ಲ. ಹಾಗಾಗಿ ಕನ್ನಡ ಪದಗಳ ಸೃಷ್ಠಿಯಾಗಲೇ ಬೇಕು. ಅಂದ ಹಾಗೆ ಹೊಸ ಪದ ಎನ್ನುವಾಗ ಜಾಗರೂಕರಾಗಿರಬೇಕು.

ನಾವು ಯಾವುದನ್ನು ಹೊಸದು ಎನ್ನುತ್ತೇವೋ, ಎಷ್ಟೋ ಬಾರಿ ಅದು ಈಗಾಗಲೇ ಇರುತ್ತದೆ, ಆದರೆ ಬಳಕೆಯಲ್ಲಿಲ್ಲದೆ ನಮಗೆ ಗೊತ್ತಿರುವುದಿಲ್ಲ.  ನಟ್ಟು ಬೋಲ್ಟುಗಳಿಗೆ ಕನ್ನಡ ಪದಗಳಿವೆ, ಈಗಲೂ ನಮ್ಮ ಮನೆಗಳಲ್ಲಿ ಮನೆ ಚಿಲಕ ಸರಿಯಾಗಿ ಹಾಕಿದ್ಯಾ, ವಾಲೆ ತಿರುಪು ಎಲ್ಲಿ ಬೀಳುಸ್ಕೊಂಡೆ. ಅಂತಾನೆ ಕೇಳೋದು.

ನಾವು ಹೀಗೆ ನಿರ್ಲಕ್ಷ್ಯ ಭಾವದಿಂದಿದ್ದರೆ, ನಮ್ಮ ಮಹತ್ವಾಕಾಂಕ್ಷೆಗಳಾದ ಕಾನೂನು, ವೈದ್ಯಕೀಯ ಕಲಿಕೆಗಳನ್ನು ಕನ್ನಡದಲ್ಲಿ ನಡೆಸುವ ಕನಸು ಕನಸಾಗಿಯೇ ಉಳಿಯುತ್ತದೆ.

ಕೇವಲ ನಮ್ಮ ನೆಲವನ್ನ ಬೇರೆಯವರಿಗೆ ದಾನ ಮಾಡುವುದಲ್ಲ, ನಮ್ಮ ಭಾಷೆಯ ಪದಗಳನ್ನೂ ಬೇರೆಯವರಿಗೆ ಕೊಡಬೇಕು ಆಗಲೇ ನಾವು ಬೆಳೆಯುವುದು.

ಕನ್ನಡವನ್ನ ಹೇಗೆ ಕೊಲೆ ಮಾಡಬೇಕು ಎಂದು ತಿಳಿಯಬಯಸಿದರೆ ಇತ್ತೀಚಿನ ಟಿವಿ ಕಾರ್ಯಕ್ರಮಗಳನ್ನು ನೋಡಬೇಕು. ಇಂದು, ಅಂದರೆ, 22, ಫೆಬ್ರವರಿ, 2006, ಸುಮಾರು ಹನ್ನೊಂದು ಅಷ್ಟ್ಹೋತ್ತಿಗೆ (ಸರಿಯಾದ ಸಮಯ ತಿಳಿದಿಲ್ಲ) ಪ್ರಸಾರವಾದ ಅದ್ಯಾವುದೋ ಮೇಕಪ್ ಕಾರ್ಯಕ್ರಮ ವೀಕ್ಷಿಸಿ.  ಅದರಲ್ಲಿ ಒಬ್ಬ ಮಹಿಳೆ ಹೇಗೆ ಮೇಕಪ್ ಮಾಡಬೇಕು, ಮಾಲಿಷ್ ಮಾಡಬೇಕು ಹೇಳುತ್ತಿದ್ದಳು. ಅವಳು ಹೇಳುತ್ತಿದ್ದ ಮಾತುಗಳನ್ನು ಗಮನಿಸಿ. ಅ(ದುರ)ದೃಷ್ಟವಷಾತ್ ಆ ಕಾರ್ಯಕ್ರಮ ನೋಡಿದೆ.

functionಗೆ two days before face pack apply ಮಾಡಿ.

(ಕಾರ್ಯಕ್ರಮಕ್ಕೆ ಎರಡು ದಿನ ಮುಂಚೆ face pack ಉಪಯೋಗಿಸಿ ಅಂತ ಹೇಳಬಹುದಿತ್ತಲ್ಲವೆ.)

faceನಲಿರುವ ಸೋಪನ್ನು cottonಅಲ್ಲಿ ತೆಗೀರಿ. ಇದು ಉದಾಹರಣೆ ಅಷ್ಟೇ

ಇದಕ್ಕೆ ಕಾರಣ, ಟಿವಿ ವಾಹಿನಿಯವರ ಕನ್ನಡದ ಬಗೆಗಿನ ದಿವ್ಯ ನಿರ್ಲಕ್ಷ್ಯ. ಮತ್ತು ನಿಷ್ಕಾಳಜಿ.