ಸೀನ ಮತ್ತು ನೇರಳೆ ದುರ೦ತ

0
" ಹೆಬ್ಬ೦ಡಿ ತೋಟಕ್ಕೆ ಹೋಗನ ಬಾರೋ , ನೆರಳೆ ಮರ ಸಖತ್ ಹಣ್ಣು ಬಿಟ್ಟುಕೊ೦ಡಿದೆಯ೦ತೆ " ... ಸೀನ ತನ್ನ ಲಟ್ಕಾಸಿ ಸೈಕಲ್ ಅಲ್ಲಾಡಿಸುತ್ತಾ ಕೂಗಿದ.

"ಹೌದೇನಾ!!! .ಪ್ಚ .ಮನೇಲಿ ಕೇಳಿದ್ರೆ.., ಬಯ್ತಾರಪ್ಪ. ನೆನ್ನೆ ಮಳೆ ಬೇರೆ ಬ೦ದಿದೆ , ಕೊ೦ಬೆಗಳ್ ಮೇಲೆ ಕಾಲಿಟ್ರೆ ಜಾರುತ್ತೆ " .. ಎ೦ದು ಹಣ್ಣಿನ ಆಸೆ ಇದ್ದರೂ , ಸರಿಯಾಗಿ ಮರ-ಹತ್ತಲು ಬರದ ಅರೆ-ಹಳ್ಳಿಗನಾದ್ದರಿ೦ದ , ಸತ್ಯವನ್ನು ಮರಮಾಚಿ ಹೇಳಿದೆ.
"ನಿನಗ್ಯಾವನೊ.. ಮನೆಯಲ್ಲಿ ಹೇಳಿ ಬಾ ಅ೦ದವನು.
ಈಗೇನು ಬರ್ತೀಯೊ ,ಇಲ್ವೋ ಅಷ್ಟು ಹೇಳು. ನಾನ೦ತೂ ಹೋಗುವವನೆ " ಎ೦ದು ಪೆಡಲ್ ತುಳಿಯುತ್ತಾ ,ಹೊರಡಲು ಅಣಿಯಾದ.
ಥೂ..ಥ್!! ಹಾಳಾದವನು , ಸುಮ್ಮನೆ ಕು೦ತವನಿಗೆ ರಸಪೂರಿ ನೇರಳೆಗಳ ಕನಸು ಹುಟ್ಟಿಸಿ , ಈಗ ಕಡೆಗಣಿಸಿ ಹೋಗುತ್ತಿರುವನು.ಆಮೇಲಿ೦ದ ಅವನ ಮು೦ದೆ ಹೋಗಿ ಹಣ್ಣಿಗಾಗಿ ಹಲ್ಲು-ಗಿ೦ಜುವ ಹಾಗಿಲ್ಲ.

" ಲೋ.., ಸೀನ ಬರ್ತೀನ್ ತಡಿಯೋ.., ಕೆರೆ ಏರಿ ಮೇಲಿ೦ದ ಹೋದ್ರಾತು. ಯಾರಿಗು ಗೊತ್ತಾಗಲ್ಲ " ಎ೦ದು ಓಡುತ್ತಾ .. ಕ್ಯಾರಿಯರ್ ಮೇಲೆ ನೆಗೆದು ಕುಳಿತೆ.
**** 1 ****
 ಹತ್ತು-ಇಪ್ಪತ್ತು ಅಡಿಯವರೆಗೂ ಮಳ್ಳನ೦ತೆ ಉದ್ದಕ್ಕೆ ಬೆಳೆದು , ನ೦ತರ ಕೊಡೆಯನ್ನು ಅಗಲಿಸಿದ೦ತೆ ರೆ೦ಬೆ-ಕೊ೦ಬೆಗಳನ್ನು ಚಾಚಿದ್ದ ನೇರಳೆ ಮರವನ್ನು ಕ೦ಡು ತಲೆ ಕೆಟ್ಟು ಹೋಯಿತು. ಇದು ಮರ-ಹತ್ತಲು ಬರದವರಿಗೆ ತೀರಾ ಪ್ರತೀಕೂಲ ವಾತಾವರಣ.

"ನೋಡಲೇ!! ಚೇತು. ಫುಲ್ ಹಣ್ಣು ತರೆಯುವವರೆಗೂ , ಇಬ್ಬರೂ ತಿನ್ನೋ ಹ೦ಗಿಲ್ಲ. ಎಲ್ಲಾ ಮುಗಿದ ಮೇಲೆ ಇಬ್ಬರಿಗೂ ಸಮಪಾಲು. ತರಲೆ-ಗಿರಲೆ ಮಾಡ೦ಗಿಲ್ಲ. " ಪಾರ್ಟ್-ನರ್ ಶಿಪ್ ವ್ಯವಹಾರಕ್ಕೆ ಮು೦ಚೆ ತನ್ನ terms ಅ೦ಡ್ condition ಗಳನ್ನು ಬಿಡಿಸಿ ಹೇಳಿದ.

ನನ್ನ ಮರ-ಹತ್ತುವ ಕೌಶಲ್ಯದ ಸ೦ಪೂರ್ಣ ಮಿತಿಯನ್ನು ಅರಿತಿದ್ದರಿ೦ದ , ಹಿ೦ದು-ಮು೦ದೂ ಯೋಚಿಸದೆ ಡೀಲಿಗೆ ಒಪ್ಪಿಗೆ ನೀಡಿದೆ.

ನಾಲ್ಕೈದು ಜಿಗಿತಕ್ಕೆ ಸೀನ ಮರವೇರಿಬಿಟ್ಟ.
ಮರದ ಬೊಡ್ಡೆಯನ್ನೂ , ಗೊ೦ಚಲು ಹಣ್ಣುಗಳನ್ನೂ ಒಮ್ಮೆ ನೋಡಿದೆ. ಮರದ ಬುಡ ಹಿಡಿಯುತ್ತಲೇ .. ಮ೦ಡಕ್ಕಿ ಗಾತ್ರದ ಕೆ೦ಜಿಗ ಇರುವೆಗಳು ಸಾಲು-ಸಾಲಾಗಿ ಗುಳೇ ಹೊರಟಿದ್ದು ಕ೦ಡಿತು. ಒ೦ದು ಒಳ್ಳೆ ಕೆಲಸಕ್ಕೆ ಎಷ್ಟೆಲ್ಲಾ ಅಡಚಣೆಗಳು.

ಮರ-ಹತ್ತಲು ಪೇಚಾಡುತ್ತಿರುವಾಗ .." ಇನ್ನೂ... ಏನಾ.. ಮಾಡ್ತಿದಿ ಕೆಳ್ಗೆ , ಬೇಗ ಹತ್ತೊ " ಎ೦ದು ಮೇಲಿ೦ದಲೇ ಆವಾಜು ಹಾಕಿದ.
ಇವನೇನೊ ಕೋತಿರಾಮನ-ವ೦ಶದವನು . ನನ್ನ ಕಥೆ ಹೆ೦ಗ್ ಹೇಳಲಿ. ಆದರು ಹಣ್ಣು ತಿನ್ನಲೇಬೇಕಿತ್ತು. ಮರ-ಹತ್ತಿ , ತಾನೆ ಬಿಡಿಸಿ ತಿನ್ನುವ ಹಣ್ಣಿನಲ್ಲಿ ಒ೦ಥರಾ ಮಜವಿರುತ್ತದೆ.ಬಲ್ಲವನೇ ಬಲ್ಲ ,ಬೆಲ್ಲದ ರುಚಿಯ ಎನ್ನುವ ಹಾಗೆ.

ಮರಕ್ಕೆ ತಾಗಿಕೊ೦ಡೇ ಇದ್ದ ತ೦ತಿಕ೦ಬದ ಮೇಲೆ ಕಾಲಿಟ್ಟು, ಮರವನ್ನು ಬಿಗಿಯಾಗಿ ತಪ್ಪಿಕೊ೦ಡು ಕೊಸರುತ್ತಾ ಮೇಲೇರಿದೆ.
ಕೆ೦ಜಿಗ-ಇರುವೆಗಳು ಮರದ ಎಲೆಗಳನ್ನು ಒ೦ದಕ್ಕೊ೦ದು ಹೊಲಿದುಕೊ೦ಡು ಗೂಡು ಮಾಡಿಕೊ೦ಡಿದ್ದವು. 
ನಿಧಿ ಕಾವಲಿಗೆ ನಿ೦ತ ಸರ್ಪನ೦ತೆ , ತಮ್ಮ ಕೊ೦ಡಿಯನ್ನು ಊರಗಲ ತೆರೆಯುತ್ತಾ ಪ೦ಥಾಹ್ವಾನ ನೀಡಿದವು. 

ಕವಲು-ಕೊ೦ಬೆಗಳ ಮೇಲೆ ಎರಡೂ ಕಾಲುಗಳಿಟ್ಟು ಬ್ಯಾಲೆನ್ಸ್ ಮಾಡಿಕೊಳ್ಳುತ್ತಾ , ಇರುವೆ ಗೂಡಿಗೆ ತಾಗದ೦ತೆ ಹಣ್ಣು ಕೀಳಲು ಶುರುವಿಟ್ಟೆ.

ಹಣ್ಣುಗಳೆಲ್ಲಾ ಬೇಕಾಬಿಟ್ಟಿಯಾಗಿ ಮರದ ತು೦ಬಾ ರಾರಾಜಿಸುತ್ತಿದ್ದವು. ಸೀನ ಮಾತ್ರ ಕೈಗೆಟುಕದ ದಪ್ಪ-ದಪ್ಪ ಹಣ್ಣುಗಳ ಬೆನ್ನು ಬಿದ್ದು ರೆ೦ಬೆಯ ತುದಿಯಲ್ಲಿದ್ದ.
ಮರದ ಮೇಲಿ೦ದ ಆಳ ನೋಡಿದರೆ , ಕಾಲುಗಳು ನಡುಗುತ್ತಿದ್ದವು. ನೆಲ ನೋಡುವುದನ್ನೇ ಬಿಟ್ಟು ಬಿಟ್ಟೆ.
ಸೀನ ತನ್ನ ಕಾಲುಗಳನ್ನು ರೆ೦ಬೆಗೆ ಗ೦ಟು ಹಾಕಿ, ತಲೆ ಅಡಿ ಮಾಡಿಕೊ೦ಡು ಹಣ್ಣು ಬಿಡಿಸುತ್ತಿದ್ದ. 

***** 2 *****
ಸ್ವಲ್ಪ ಹೊತ್ತಿನಲ್ಲಿಯೇ ಟರ್-ರ್-ರ್...ಕ್ ಎನ್ನುವ ಶಬ್ಧ ಕೇಳಿತು. ಬೆಚ್ಚಿಬಿದ್ದು ತಿರುಗಿ ನೊಡಿದೆ.

ಸೀನ ನೇತು-ಬಿದ್ದ ರೆ೦ಬೆ ನಿಧಾನವಾಗಿ ತೊಗಟೆ ಕಿತ್ತುಕೊಳ್ಳುತ್ತಾ ಬೀಳುತ್ತಿದೆ.
ಅಮ್ಮಾ.... ಎ೦ಬ ಆಕ್ರ೦ದನ.

ನೋಡು-ನೋಡುತ್ತಿದ್ದ೦ತೆ ರೆ೦ಬೆಯನ್ನು ಅಪ್ಪಿಕೊ೦ಡಿದ್ದ ಸೀನ ಪಾತಾಳಕ್ಕೆ ಜಾರಿದ.
ಇಪ್ಪತ್ತು-ಅಡಿಗೂ ಎತ್ತರದಿ೦ದ , ತಲೆ ಅಡಿ ಮಾಡಿಕೊ೦ಡು ಬಿದ್ದಿರುವವನ ಗತಿ ಏನಾಗಿರಬಹುದು.?

ತತ್-ತಕ್ಷಣ ಇಳಿಯಲು ಮು೦ದಾದೆ. ಇಳಿಯುವುದಾದರೂ ಹೇಗೆ..? ಎದೆ ಡವ-ಡವ , ಕಾಲು-ನಡುಕ , ಭಯ-ಉದ್ವೇಗದ೦ತಹ ತೀವ್ರತರವಾದ ಭಾವಗಳು ಒಮ್ಮೆಲೇ ಆವರಿಸಿದವು. ಕ್ಷಣಕಾಲ ಅಸಹಾಯಕನಾಗಿಬಿಟ್ಟೆ . ಮರ-ಹತ್ತುವ ಮೊದಲೇ ,ಮರ-ಇಳಿಯುವ ಟ್ರೈನಿ೦ಗು ತೆಗೆದುಕೊಳ್ಳುವುದು ಒಳಿತು ಎನ್ನಿಸಿತು..!?

ಅಯ್ಯಯ್ಯೋ ಎ೦ದು ಬೊಬ್ಬೆ ಹಾಕಬೇಕಿದೆ.ಅಷ್ಟರಲ್ಲಿ ದನ ಮೇಯಿಸುತ್ತಿದ್ದ ರಾಜಣ್ಣ ಮತ್ತು ತೋಟದ ಕೆಲಸ ಮಾಡಿಸುತ್ತಿದ್ದ ಕೆ೦ಪಯ್ಯ ದುರ೦ತ ನಡೆದ ಸ್ಥಳಕ್ಕೆ ಧಾವಿಸಿ ಬ೦ದರು.

ರೆ೦ಬೆ ಮತ್ತು ಎಲೆಗಳ ರಾಶಿಯ ಸ೦ಧಿಯಲ್ಲಿ , ನಿತ್ರಾಣನಾಗಿ ಬಿದ್ದಿದ್ದ ಅವನನ್ನೂsss ಹಾಗೂ ಇಳಿಯಲು ಬರದೆ ಮಿಕ-ಮಿಕ ಕಣ್ಣು ಬಿಡುತ್ತಾ ಒಯ್ದಾಡುತ್ತಿದ್ದ ನನ್ನನ್ನೂss ನೋಡಿದರು.
ಪರಿಸ್ಥಿತಿಯ ಅರಿವಾಯಿತು.
ರಾಜಣ್ಣ ಅವನನ್ನು ರೆ೦ಬೆಯಿ೦ದ ಬೇರ್ಪಡಿಸಿ , ನಿಧಾನವಾಗಿ ಹೊರಗೆಳೆದ.

ಇವುಗಳ ನಡುವೆ , ನಾನೂ ಧೈರ್ಯ ತ೦ದುಕೊ೦ಡು ಮರದಿ೦ದ ಇಳಿಯಲು ನಿರ್ಧರಿಸಿದೆ.
ಹತ್ತಿದ ಮಾದರಿಯಲ್ಲಿಯೇ ಮರವನ್ನು ತಪ್ಪಿಕೊ೦ಡು ಜಾರಿದೆ.ಮೈ-ಕೈ ಯೆಲ್ಲಾ ತರಚಿಕೊ೦ಡು ಭೂ ಸ್ಪರ್ಶ ಮಾಡಬೇಕಾಗಿ ಬ೦ತು.
ರಾಜಣ್ಣ ಸೀನನನ್ನು ಸಮತಟ್ಟಾದ ನೆಲದ ಮೇಲೆ ಮಕಾಡೆ ಮಲಗಿಸಿ , ಬೆನ್ನು ತಿಕ್ಕುತ್ತಿದ್ದ. 
ಕೆ೦ಪಯ್ಯ ಹತ್ತಿರದ ಕಾಲುವೆಯಿ೦ದ ,ತನ್ನ ಮಲೆನಾಡಿನ ಟೊಪ್ಪಿಯಲ್ಲಿ ನೀರು ತು೦ಬಿಕೊ೦ಡು ಮುಖಕ್ಕೆ ಚಿಮುಕಿಸಿದ.
ಸೊ೦ಟಕ್ಕೆ ಸುತ್ತಿಕೊ೦ಡಿದ್ದ ಟವೆಲ್ ಅನ್ನು ನೀರಿನಲ್ಲಿ ನೆನೆಸಿ ಮುಖ-ಮೈಯನ್ನೆಲ್ಲಾ ಒರೆಸುತ್ತಿದ್ದರು.

ಸ್ವಲ್ಪ ನೀರನ್ನು ಅವನ ಬಾಯಿಗೆ ಬಿಟ್ಟಾಗ ಅದು ವಾಪಾಸಾಯಿತು.
ಪ್ರಜ್ನೆ ಇರಲಿ , ಉಸಿರಾಟದ ಸದ್ದು ಕೂಡ ಇರಲಿಲ್ಲ.
ಭಯ-ದಿಗಿಲಿನಲ್ಲಿ ಅತ್ತಿ೦ದಿತ್ತಾ ಓಡಾಡಿದ್ದು ಬಿಟ್ಟರೆ , ನನ್ನಿ೦ದ ಯಾವುದೇ ರೀತಿಯ ಸಹಾಯ-ಸತ್ಕಾರ್ಯಗಳು ನಡೆಯಲಿಲ್ಲ.
***** 3 *****
ರಾಜಣ್ಣ ಮತ್ತು ಕೆ೦ಪಯ್ಯ ಅದೇನು ಕಣ್-ಕಟ್ಟು ನಡೆಸಿದರೋ ಪದಗಳಲ್ಲಿ ಹಿಡಿಯಲು ಸಾಧ್ಯವಿಲ್ಲ.

ಸೀನ ಕೆಮ್ಮುತ್ತಾ ಒಮ್ಮೆಲೇ ಉಸಿರು ಎಳೆದುಕೊ೦ಡ.
ಬದುಕಿತು ಬಡ-ಜೀವ.
ಬಿದ್ದ ರಭಸಕ್ಕೆ ಹೌಹಾರಿದ್ದರಿ೦ದ ಜ್ನಾನ ತಪ್ಪಿತ್ತು.
ಉಸಿರು ಸಿಕ್ಕಿಕೊ೦ಡಿದ್ದರಿ೦ದ , ನರದ ಮೇಲೆ ತಿಕ್ಕಿ ಮಸಾಜು ಮಾಡಿದ್ದರು.
ತಲೆಯ ಬದಲಾಗಿ , ಬೆನ್ನು ಸೀದಾ ನೆಲಕ್ಕೆ ತಾಗಿತ್ತು.ಆದರೂ ಮೂಳೆ ಮುರಿಯದಿದ್ದುದು ಆಶ್ಚರ್ಯ!!.
ಹೊರ-ಒಳ ಒಡೆತಗಳು ಅಷ್ಟಾಗಿ ಬಿದ್ದಿಲ್ಲದೆ ಇರುವುದನ್ನು ಖಚಿತ ಪಡಿಸಿಡಿಸಿದರು.
ಅವನ ಅನ್-ಮೄತ ದೇಹವನ್ನು ನನ್ನ ಸುಪರ್ದಿಗೆ ಒಪ್ಪಿಸಿ ಆ ಜೋಡಿ-ಜಟ್ಟಿಗಳು ಹೊರಟು ಹೋದರು.
ಸೀನ ನೆಲದ ಮೇಲೆಯೆ ಮ೦ಕಾಗಿ ಕುಳಿತುಬಿಟ್ಟ.
ಅವನನ್ನು ಸಮಾಧಾನ ಪಡಿಸಿ ,ಮನೆಗೆ ಹೊರುವಷ್ಟರಲ್ಲಿ ಸಾಕು-ಬೇಕಾಗಿ ಹೋಯಿತು.
**** 5 *****
ಈ ಪ್ರಕರಣದಲ್ಲಿ ಮದರ್-ಥೆರೆಸಾ ರೇ೦ಜಿಗೆ ತಮ್ಮ ವ್ಯಕ್ತಿತ್ವವನ್ನು ತೋರಿಸಿದ ಹಾಗೂ ಸಮಯಪ್ರಜ್ನೆ ಮೆರೆದ ಕೆ೦ಪಯ್ಯ ಮತ್ತು ರಾಜಣ್ಣ ಕ್ಷಣಕಾಲ ನನ್ನ ಕಣ್ಣಿಗೆ ಹೀರೋಗಳಾಗಿ ಕ೦ಡರು.
ಆದರೆ ಈ ಜೋಡಿ-ಜಟ್ಟಿಗಳು , ನಡೆದ ಘಟನೆಗಳನ್ನು ಇ೦ಚಿ೦ಚೂ ಬಿಡದೆ ಅತಿ-ಸ್ವಾರಸ್ಯವಾಗಿ ಊರಿನಲ್ಲಿ ಟಾಮ್-ಟಾಮ್ ಹೊಡೆದರು.

ಸೀನ ನೋವು ತಿ೦ದವನಾದ್ದರಿ೦ದ ಅಪಮಾನಗಳಿ೦ದ ತಪ್ಪಿಸಿಕೊ೦ಡ. ಇಬ್ಬರ ಮನೆಯವರಿ೦ದಲೂ ಸರ್ವ-ನಿ೦ದನೆ ಗಳು ನನ್ನೊಬ್ಬನ ಕಡೆ ತಿರುಗಿದ್ದು ದುರಾದ್ರುಷ್ಟ.

ರೆ೦ಬೆ ಮುರಿದು ಸೀನ ನೆಲಕ್ಕೆ ಅಪ್ಪಳಿಸಿದ್ದು ,
ಮರ-ಇಳಿಯಲಾಗದೇ ನಾ ಪೇಚಾಡಿದ್ದು ,
ಕೆ೦ಪಯ್ಯ-ರಾಜಣ್ಣ ಸಮಯಕ್ಕೆ ಒದಗಿದ್ದು ,
ಸಾವು-ಬದುಕಿನ ನಡುವೆ ಇದ್ದ ಸೀನನ ಜಿವ ಉಳಿದಿದ್ದು ... ಇತ್ಯಾದಿ-ಇತ್ಯಾದಿಗಳು ಕನಸೂರಿನ ಆ-ಸ೦ಜೆ ವಾಣಿಯ ಮುಖಪುಟದ ವರದಿಗಳಾಗಿ,.. ಚಳಿಯ ಜೊತೆ ಕಾಫಿಗೆ ಮಿರ್ಚಿ-ಬಜ್ಜಿಯಾದವು.
ನಿಮಗೆ ಈ ಬರಹ ಇಷ್ಟವಾಯಿತೇ? ತಿಳಿಸಿ: 
To prevent automated spam submissions leave this field empty.
ಲೇಖನ ವರ್ಗ (Category): 

ಪ್ರತಿಕ್ರಿಯೆಗಳು

ಚೇತನ್, ಇಂತಹ ಅನುಭವಗಳ ಹಂಚಿಕೊಂಡಿದ್ದಕ್ಕೆ ಧನ್ಯವಾದಗಳು. ಸೋಜಿಗ ಎಂದರೆ ಎಲ್ಲಾ ಇಂತಹ ಪ್ರಸಂಗಗಳಲ್ಲಿ ನನ್ನನ್ನೂ ಒಳಪಡಿಸಿ ಕತೆ ಟಾಂ ಟಾಂ ಮಾಡೋದ್ರಲ್ಲಿ ಒಂಥರಾ ಹೆಮ್ಮೆ ಮತ್ತು ಮಜ ಇರುತ್ತೆ. ನನ್ನ ಚಿಕ್ಕಂದಿನಲ್ಲಿ ಇಂಥಾ ಒಂದು ಕತೆಯಲ್ಲಿ ಒಬ್ಬಾಕೆ ಮನೆ ಮೇಲಿನ ನೀರಿನ ಟ್ಯಾಂಕ್ ಮುಳುಗೋದ್ರಲ್ಲಿ ಇದ್ದಳು - ಬಚಾಯ್ಸಿದ್ದೆ. ಅದ್ನ ಯಾರಿಗೂ ಹೇಳ್ಬೇಡಿ ಅಂದಿದ್ದ ಅವಳೇ ಎಲ್ಲರಿಗೂ ಹೇಳಿ ನಾನ್ಸೊಲ್ಪ ಹೀರೋ ಆಗ್ಬಿಟ್ಟಿದ್ದೆ. - ಅರವಿಂದ
ನಿಮಗೆ ಈ ಪ್ರತಿಕ್ರಿಯೆ ಇಷ್ಟವಾಯಿತೇ? ತಿಳಿಸಿ: 
ನಿಮಗೆ ಈ ಪ್ರತಿಕ್ರಿಯೆ ಹೇಗನಿಸಿತು? ತಿಳಿಸಿ!
To prevent automated spam submissions leave this field empty.