Anantha Ramesh ರವರ ಬ್ಲಾಗ್

ಅತಿಥಿ ಗೃಹ  

ನರದೇಹ 
ಇದು ಅತಿಥಿ ಗೃಹ
ದಿನ ಬೆಳಗೆ
ಹೊಸತೊಂದರ ಆಗಮನ
 
ಒಂದು ಖಷಿ ಒಂದು ವಿಷಣ್ಣತೆ
ಒಂದು ಸಣ್ಣತನ ಪ್ರವೇಶ
ಒಮ್ಮೆ ಕ್ಷಣಹೊಳೆವ ತಿಳಿವಳಿಕೆ
ಮತೊಮ್ಮೆ ನಿರೀಕ್ಷೆಯೂ 
ಮಾಡದಿದ್ದ ಅತಿಥಿಯ ಆಗಮಿಕೆ
 
ಸ್ವಾಗತಿಸು ಮತ್ತು ಉಪಚರಿಸೆಲ್ಲರ
ಗುಂಪಾಗಿ ಬರುವ ದು:ಖದುಮ್ಮಾನವಿಷಾದಗಳು
ಮನೆಯ ಪರಿಕರಗಳ ದೋಚಬಂದವರಾದರೂ ಸರಿ
ಪ್ರತಿ ಅತಿಥಿಯನ್ನೂ ಗೌರವಿಸಿ ಆದರಿಸು
ಏಕೆಂದರೆ ಅವರು ಹಳೆಯದನ್ನು ಕಳಚಿ
ಮತ್ತೊಂದರ ಮಹೋತ್ಸವಕ್ಕೆ 
ನಿನ್ನ ಅಣಿಗೊಳಿಸಬಂದವರು
 
ತಪ್ಪು ಯೋಚನೆ ನಾಚಿಕೆ ತಪ್ಪದವಮಾನ
ಎಲ್ಲರನ್ನೂ ಬಾಗಿಲಲ್ಲೆ ನಗುನಗುತ್ತ ಸಂಧಿಸು
ಒಳಗೆ ಸ್ವಾಗತಿಸು 
 

‍ನಿಮಗೆ ಈ ಬರಹ ಇಷ್ಟವಾಯಿತೇ? ತಿಳಿಸಿ: 
Average: 5 (1 vote)
To prevent automated spam submissions leave this field empty.

ಜಗ ವಂದ್ಯ

’ಅವನು’ 
ದಿಕ್ಕು ಬದಲಿಸುವಾಗ
ಬದಲಿಸಿ ಸಾಗುತ್ತಲೇ ಇರುವಾಗ
ಹೆದರದಿದ್ದೀತೆ ಜಗ!
 
ದಕ್ಷಿಣವನು ಮುಟ್ಟಿದಾಗ
ಮುಂದೆ ಸಾಗಿಬಿಟ್ಟಾನೆಂಬ 
ಭಯದುದ್ವೇಗ!
 
ಮುಂದೇನು?
ಅಂತ್ಯವಾದರೆ ಯುಗ!
 
ಅವನು 
ಅವನಿಯ ನಲ್ಲ 
ಬಿಡಲೊಲ್ಲ!
 
ಜಾಡ ಹಿಡಿದ
ಹಿಂತಿರುಗಿದ
ಹಿಮ ಕರಗಿಸುತ್ತ 
ಮೋರೆ ಬೆಳಗಿಸುತ್ತ
 
ಅದೇ ಸಂಕ್ರಮಣ 
ಪಥ ಬಿಡದ ಚಲಿತ
ಜನ ಹಿತನು  
ಜಗ ಹೃದಯನು
ಮಿಗಿಲ ವಂದ್ಯನು
ಸಂಕ್ರಾಂತಿ ಪುರುಷನು
 
(Pic courtesy: Pixel)

‍ನಿಮಗೆ ಈ ಬರಹ ಇಷ್ಟವಾಯಿತೇ? ತಿಳಿಸಿ: 
No votes yet
To prevent automated spam submissions leave this field empty.

ಮುಚ್ಚಿದ ಬೊಗಸೆ

ಎರಡು 
’ಸಾವಿರದ’ 
ಹದಿ-ನೆಂಟೆ’
ಸುರಿದು ಸುಖ ದು:ಖ
ನಿರ್ಲಿಪ್ತ ಸರಿ-ದೆ .....
 
ಇದೀಗ
ಎರಡು  ಸಾವಿರದ
ಹತ್ತೊಂಭತ್ತು -
ತೆರೆ ಸರಿಸಿ  
ಮುಚ್ಚಿದ ಬೊಗಸೆ .....
 
ಬಾ ಹೊಸತೆ
ಕೊಡು 
ಭರವಸೆಯ ಬತ್ತಳಿಕೆ 
ನೀಡು 
ಆಸೆಗಳಿಗಾಸರೆ 
ಹೂಡು ಭಾಗ್ಯ
ಗುರಿಯಿಡು
ನೊಂದವರ
ಬದುಕ ಬಾಗಿಲಿಗೆ
ಈಡಾಡು ಬೆಳಕೆ .....
 
ಮುಗಿಬೀಳಲಿ
ಮಿಗಿಲಿಲ್ಲದ  ಹರ್ಷ
ಅದಕ್ಕಿರಲಿ ಗುರಿ 
ಮುಗಿಲೆ!
 
   - ಅನಂತ ರಮೇಶ್
 

‍ನಿಮಗೆ ಈ ಬರಹ ಇಷ್ಟವಾಯಿತೇ? ತಿಳಿಸಿ: 
Average: 4 (1 vote)
To prevent automated spam submissions leave this field empty.

ತಾಯಿಯರು ಮತ್ತು ತವರು

ಊರಿದ ಊರಿಂದ ಹಿಡಿದೊಂದು ವಾಹನ 
ಉದ್ದಕ್ಕೂ ಹರಿದ  ಹಿರಿದಾರಿ ಮುಗಿಸಿ  
ನಡಿಗೆಯಲಿ ಕಿರು ಹಾದಿಯಲಿ ಸರಸರ 
ಅಂಕುಡೊಂಕ ಕೆಲ ದೂರ ಸವೆಸಿ 
ಉಸ್ಸೆಂದು ನಿರಾಳ ನಿಂತಲ್ಲಿ ಕಾಲು
ಕಾಣುವುದು ಆ  ಹಳೆಯ ಹಳ್ಳಿ ಸೂರು!
 
ದಾರಿಯುದ್ದಕೂ
ಅಲ್ಲಿ ಇದ್ದೀತೊ ಇಲ್ಲವೋ ಭಾರೀ ಗುಡ್ಡ
ಸಣ್ಣ ದರಿ ಝರಿ ತೊರೆ ಕೆರೆ ಹೊಳೆ 
ಹಸಿರ ಗಿಡ ; ಮೈತಾಗಿ ನಗಿಸುವ ಗಿಡಗೆಂಟೆ
ಬದು-ಭತ್ತ ತೂಗುತೆಂಗು 
ತೆನೆರಾಗಿ ಗೊನೆಬಾಳೆ  
ಸಾಗಿ ಕಾಲು ದಾರಿ ಮುಗಿಸೆ ಕಂಡೀತು
ಹೊಸತೆಂದೋ ಆಗಿದ್ದ ಒಕ್ಕಲು
ಅದು ಮೂಡು ಯಾ ಪಡುವಣ  
ತೆಂಕು ಯಾ ಬಡಗ ಮನೆ 
ಗೂಡು ಹಕ್ಕಿಗಳರಮನೆ
ಹಳೆನೆನಪಿಗೆ ಹೊಸತಾಗುವ 
ತೂಗು ಉಯ್ಯಾಲೆ ಮೇನೆ!
 

‍ನಿಮಗೆ ಈ ಬರಹ ಇಷ್ಟವಾಯಿತೇ? ತಿಳಿಸಿ: 
Average: 5 (1 vote)
To prevent automated spam submissions leave this field empty.

ಇಂದೊಂದು ದಿನ

ಇಂದೊಂದು ದಿನ
 
ಇಂದೊಂದು ದಿನ 
ಗಾಂಧಿಯ ನೆನೆಯೋಣ 
ಹೃದಯ ಹಣತೆಯ ಹಚ್ಚೋಣ
ಪಲ್ಲಕ್ಕಿ, ಹಣ, ಪಣ  ಪಠಣ ನಿಲ್ಲಿಸೋಣ
 
ಅರೆಬೆತ್ತಲೆಗೆ ನಮಿಸೋಣ
ಗರಿಗರಿ ದಿರಿಸು ಧರಿಸುವ 
ಪರಮಾಪ್ತ ಶಿಷ್ಯನಾಗುವ ಆಸೆ 
ನಾಳೆವರೆಗಾದರೂ ಸರಿಸೋಣ!
 
ಅವನ ದಂಡಕ್ಕೆ ನಮನ
ಅಧಿಕಾರ ದಂಡ ದಾಹವನ್ನ
ನಾಳೆ ಸಂಚಲ್ಲಿ ಹಂಚಿಕೊಳ್ಳೋಣ!
 
ಅಹಿಂಸೆಯ ಪಾಠ ಹೇಳೋಣ
’ಕಂಸ’ದೊಳಗೆರೆಯಲ್ಲಿ ಕಾದು
ನಾಳೆ ಪರಿಪಾಠಕ್ಕೇ ತಿರುಗೋಣ!
 
ಇಂದೊಂದು ದಿನ ಗೋಣಾಡಿಸೋಣ
ಅವನ ನಡೆ ನುಡಿ ದುಡಿತ ತುಡಿತಗಳ
'ಮೆಚ್ಚಿ ಅಹುದಹುದು' ಅನ್ನೋಣ
ನಾಳೆ ಮಾಡೋಣ ಇಂದಿನೆಲ್ಲದರ ದಹನ!
 

‍ನಿಮಗೆ ಈ ಬರಹ ಇಷ್ಟವಾಯಿತೇ? ತಿಳಿಸಿ: 
Average: 5 (1 vote)
To prevent automated spam submissions leave this field empty.

Pages

Subscribe to RSS - Anantha Ramesh ರವರ ಬ್ಲಾಗ್