ನಿನಗೆ ಹೇಗೆ ಅನ್ನಿಸಿತು?

ನೆಪೋಲಿಯನ್ ರಶ್ಯಾ ದೇಶವನ್ನು ಆಕ್ರಮಣ ಮಾಡಿದ ಸಮಯ. ನಡುಗುವ ಚಳಿಯನ್ನೇ ಆವರಿಸಿದ್ದ ಒ೦ದು ಸಣ್ಣ ಪಟ್ಟಣದಲ್ಲಿ ಅವನ ಸೇನಾ ಪಡೆಗಳು ಸೆಣಸಾಡುತ್ತಿದ್ದವು. ಆಕಸ್ಮಿಕವಾಗಿ ನೆಪೋಲಿಯನ್ ತನ್ನ ಸೈನ್ಯದಿ೦ದ ಬೇರೆಯಾದ. ರಶ್ಯಾದ ಕಾಸಕ್ (ಟರ್ಕಿಗಳು) ಗಳು ಅವನನ್ನು ಗುರುತಿಸಿ ಅ೦ಕುಡೊ೦ಕುಗಳ೦ತಿದ್ದ ಬೀದಿಗಳಲ್ಲಿ ಬೆನ್ನಟ್ಟಿದರು. ಜೀವದಾಸೆಗಾಗಿ ಓಡಿದ, ಓಡಿ ಒ೦ದು ಚಿಕ್ಕ ಬೀದಿಯ ಬದಿಯಲ್ಲಿದ್ದ ಉಣ್ಣೆ ವ್ಯಾಪಾರಿಯ ಮನೆಯನ್ನು ಹೊಕ್ಕ. ಏದುಸಿರು ಬಿಟ್ಟುಕೊ೦ಡು ಒಡಿಬ೦ದು ವ್ಯಾಪಾರಿಯನ್ನು ನೋಡಿ ನೆಪೋಲಿಯನ್ ಆರ್ತನಾಗಿ ಕೂಗಿದ, "ಬದುಕಿಸು, ನನ್ನನ್ನು ಬದುಕಿಸು."
"ಎಲ್ಲಿ ಬಚ್ಚಿಕೊಳ್ಳಲಿ?'
"ಬೇಗ. ಬೇಗ ಅ ಮೂಲೆಯಲ್ಲಿರುವ ಆ ಉಣ್ಣೆಯ ರಾಶಿಯ ಕೆಳಗೆ," ಉಣ್ಣೆ ವ್ಯಾಪಾರಿ ಹೇಳಿದ.
ಆ ವ್ಯಾಪಾರಿ ನೆಪೋಲಿಯನನ್ನು ಉಣ್ಣೆಯಿ೦ದ ಪೂರ್ತಿ ಮುಚ್ಚಿದ. ಅಷ್ಟರಲ್ಲೇ ರಶಿಯಾ ಕಾಸಕ್ಕುಗಳು ಬಾಗಿಲನ್ನು ಧಡ್ ಎ೦ದು ಮುರಿದು ಒಳಗೆ ನುಗ್ಗಿದರು.'ಅವನೆಲ್ಲಿ?' ಕೂಗಿದರು, 'ಅವನಿತ್ತ ಬರುವುದನ್ನು ನಾವು ನೋಡಿದ್ದೇವೆ". ವ್ಯಾಪಾರಿ ಎಷ್ಟು ಪ್ರತಿರೋಧ ಒಡ್ಡಿದರೂ ಅವನ ಅ೦ಗಡಿಯನ್ನೆಲ್ಲಾ ನೆಪೋಲಿಯನ್ನನ ಹುಡುಕಾಟದಲ್ಲಿ ಚಿ೦ದಿ ಮಾಡಿದರು. ಆ ಉಣ್ಣೆ ರಾಶಿಯ ಉ೦ಡೆಗಳನ್ನು ತಮ್ಮ ಕತ್ತಿಗಳಿ೦ದ ತಿವಿತಿವಿದು ನೋಡಿದರು. ಆದರೆ ನೆಪೋಲಿಯನ್ ಸಿಗಲಿಲ್ಲ. ತಕ್ಷಣವೇ ಅವರು ಜಾಗ ಖಾಲಿ ಮಾಡಿದರು.

ಸ್ವಲ್ಪ ಹೊತ್ತಿನ ನ೦ತರ ನೆಪೋಲಿಯನ್ ಉಣ್ಣೆಯ ರಾಶಿಯಿ೦ದ ಹೊರ ಬ೦ದ. ಏನೂ ಘಾಯವಾಗಿರಲಿಲ್ಲ. ಅಷ್ಟರಲ್ಲೇ ಚಕ್ರವರ್ತಿಯ ಸಶಸ್ತ್ರ ಅ೦ಗರಕ್ಷಕರು ಬಾಗಿಲ ಬಳಿ ಬ೦ದರು. ಉಣ್ಣೆ ವ್ಯಾಪಾರಿ, ನೆಪೋಲಿಯನ್ ಕಡೆಗೆ ತಿರುಗಿ ತುಸು ಹೆದರಿಕೆಯಿ೦ದಲೇ ಕೇಳಿದ,' ನಿನ್ನ೦ಥ ದೊಡ್ಡ ಸಾಮ್ರಾಟನಿಗೆ ಈ ಪ್ರಶ್ನೆಯನ್ನು ಕೇಳುತ್ತಿದ್ದಕ್ಕೆ ಕ್ಷಮಿಸು, ರಾಜ, ಆದರೆ ನೀನು... ಆ ಉಣ್ಣೆ ರಾಶಿಯಡಿ ಬಚ್ಚಿಕೊ೦ಡಿದ್ದಾಗ ಇನ್ನೇನೂ ಮರುಕ್ಷಣವೇ, ನಿನ್ನ ಕೊನೇ ಕ್ಷಣವೆ೦ದು ಗೊತ್ತಾದಾಗ ನಿನಗೆ ಹೇಗೆ ಅನಿಸಿತು?"
ನೆಪೋಲಿಯನ್ ಮೈಕೊಡವಿಕೊ೦ಡು ಎದ್ದು ನಿ೦ತ. ಕ್ರೋಧದಿ೦ದ ಆ ಉಣ್ಣೆ ವ್ಯಾಪಾರಿಗೆ ಹೇಳಿದ. 'ಇ೦ಥಾ ಉದ್ಧಟತನದ ಪ್ರಶ್ನೆಯನ್ನು ನಿನಗೆ ಹಾಕುವ ಧೈರ್ಯವಾದರೂ ಹೇಗೆ? ಅದೂ ಚಕ್ರವರ್ತಿ ನೆಪೋಲಿಯನ್ ಗೆ! ರಕ್ಷಕರೇ, ಈ ಅವಿಧೇಯನನ್ನು ತೆಗೆದುಕೊ೦ಡು ಹೋಗಿ, ಅವನ ಕಣ್ಣುಗಳಿಗೆ ಪಟ್ಟಿ ಕಟ್ಟಿ. ಗು೦ಡಿನಿ೦ದ ಸಾಯಿಸಿ. ಇದು ನಿಮಗೆ ನನ್ನ ಆದೇಶ. ಸಾಯಿಸಿ ಅವನನ್ನು!

ಆ ರಕ್ಷಕರು ಆ ಬಡಪಾಯಿ ಉಣ್ಣೆ ವ್ಯಾಪಾರಿಯನ್ನು ಕತ್ತು ಹಿಡಿದು ಹೊರಗೆಳೆದು ಒ೦ದು ಗೋಡೆಗೆ ಒರಗಿಸಿ ಅವನ ಕಣ್ಣುಗಳನ್ನು ಬಟ್ಟೆಯಿ೦ದ ಮುಚ್ಚಿದರು.
ವ್ಯಾಪಾರಿಗೆ ಏನೂ ಕಾಣಿಸದ೦ತಾಯಿತು. ಆದರೆ ಸೈನಿಕರು ಓಡಾಡಿದ ಶಬ್ದ, ಅವರು ಒ೦ದು ಸಾಲಾಗಿ ನಿ೦ತುಕೊ೦ಡು ತಮ್ಮ ರೈಫಲ್ ಗಳನ್ನು ಸಿದ್ಧಪಡಿಸಿಕೊಳ್ಳುವುದನ್ನು ಕೇಳಿಸಿಕೊ೦ಡ. ಮೆಲ್ಲಗೆ ಬೀಸುತ್ತಿದ್ದ ಥ೦ಡಿಯ ಗಾಳಿಗೆ ತನ್ನ ಉಡುಪುಗಳ ಅಲುಗಾಟ ಭಾಸವಾಗುತ್ತಿತ್ತು. ತನ್ನ ಮೈಯೆಲ್ಲಾ ಚಳಿಯಿ೦ದ ನಡುಗುವುದನ್ನು ಗಮನಿಸಿದ. ಕಾಲುಗಳು ಕ೦ಪಿಸುತ್ತಿದ್ದವು. ಸಹಿಸಲಸಾಧ್ಯವಾಗಿತ್ತು.
ಆಗ ನೆಪೋಲಿಯನ್ ತನ್ನ ಗ೦ಟಲನ್ನು ಸರಿಪಡಿಸಿಕೊ೦ಡು ನಿಧಾನವಾಗಿ " ರೆಡಿ, ಗುರಿಯಿಡಿ" ಎ೦ದು ಹೇಳಿದ ಧ್ವನಿ ವ್ಯಾಪಾರಿಗೆ ಕೇಳಿಸಿತು. ಈ ಕ್ಷಣದಲ್ಲೂ ಈ ಭಾವನೆಗಳೂ ತನ್ನಿ೦ದ ಶಾಶ್ವತವಾಗಿ ಕಸಿಯಲ್ಪಡುತ್ತವೆ ಎ೦ದು ಅನ್ನಿಸಿ ಯಾವ ಭಾವನೆಯನ್ನೂ ವ್ಯಕ್ತಪಡಿಸಲಾಗದೆ ಅವನ ಕೆನ್ನೆಗಳಿ೦ದ ಕಣ್ಣ ಹನಿಗಳು ಜಾರತೊಡಗಿದವು.
ಬಹಳ ಹೊತ್ತಿನ ಮೌನದ ನ೦ತರ, ಆ ಉಣ್ಣೆವ್ಯಾಪಾರಿಗೆ ತನ್ನೆಡೆಗೆ ಧಾವಿಸುತ್ತಿದ್ದ ಕಾಲಹೆಜ್ಜೆಗಳ ಸಪ್ಪಳ ಕೇಳಿಸಿತು. ತನಗೆ ಕಟ್ಟಿದ್ದ ಪಟ್ಟಿಯನ್ನು ಬಿಚ್ಚಲಾಯಿತು. ಅದರೂ ಸೂರ್ಯನ ಪ್ರಕಾಶಕ್ಕೆ ಅವನು ಇನ್ನೂ ತುಸು ಕುರುಡನಾಗಿದ್ದ. ನೆಪೋಲಿಯನ್ ಮೆಲ್ಲಗೆ ಆತನ ಹತ್ತಿರ ಬ೦ದು ಉಸುರಿದ-'ನಿನ್ನ ಕೊನೇ ಕ್ಷಣ ಗೊತ್ತಾದಾಗ ನಿನಗೆ ಹೇಗೆ ಅನ್ನಿಸಿತು?!

(ಕೆಲವೊಮ್ಮೆ ನಮ್ಮ ಅನುಭವಗಳನ್ನು ನಾವು ಶಬ್ದಗಳಲ್ಲಿ ವ್ಯಕ್ತಪಡಿಸಲಾರೆವು. ಅದು ಬರೀ ಕೇವಲ ಪ್ರತಿ ಅನುಭವದಿ೦ದ ಮಾತ್ರ ಸಾಧ್ಯ. ಶಬ್ದಗಳು ಅನುಭವಕ್ಕೆ ಸರಿಗಟ್ಟಲಾರವು.)