ವಿದೇಶಿಯರ ವಿದೇಶಿಯರೆಂದೊಡೇನಹುದಯ್ಯಾ?

ಪರದೇಶದಲಿ ನೆಲೆಸಿ ಅಲ್ಲಿನ ಪ್ರಜೆಗಳಾದವರ
ಕರೆದು ನಮ್ಮವರೆಂದು ಕೊಂಡಾಡಿ ಸನ್ಮಾನ
ಮಾಡುವ ಭವ್ಯ ಪರಂಪರೆ ನಮ್ಮದು

ಪರದೇಶದ ಪ್ರಜೆಯಾಗಿ ಪರಭಾಷೆಯಲಿ
ಬರೆದು ಪ್ರಸಿದ್ಧರಾಗಿ ಮಡಿದವರಿಗಾಗಿ
ನಮ್ಮವರೆಂದು ಕಣ್ಣೀರಿಳಿಸುವ ಚಾಳಿ ನಮ್ಮದು

ಬಚ್ಚನನ ಮಡದಿಯನು ಬಂಗಾಲೀ ಎಂದೂ
ಸೊಸೆಯನ್ನು ಕರಾವಳಿಯವಳೆಂದು ಕರೆದು
ಹೆಮ್ಮೆಪಟ್ಟುಕೊಳ್ಳುವ ಅಭ್ಯಾಸ ನಮ್ಮದು

ಅಮೇರಿಕಾದ ಪ್ರಜೆಯಾಗಿ ಅಧ್ಯಕ್ಷನಾದರೂ
ಒಬಾಮಾನ ಆಫ್ರಿಕಾ ಮೂಲದ ನೆನಪ
ಎಲ್ಲರೂ ದಿನ ಪ್ರತಿದಿನ ಮಾಡಲೂ ಬಹುದು

ನಮ್ಮವರು ಯಾವ ರಾಜ್ಯ ಯಾವ ದೇಶದ
ಪ್ರಜೆಯಾದರೂ ನಮ್ಮವರೆಂದು ಕರೆದಂತೆ
ಮೂಲತಃ ವಿದೇಶಿಯರ ನಾ ವಿದೇಶಿಯರೆಂದೊಡೇನಹುದಯ್ಯಾ?