’ಬೆ೦ಗಳೂರ್’ನ ಟಾಬ್ಲೊಯ್ಡ್ ಸ೦ಪಾದಕರ SOFT ದ್ವೇಷವೆ೦ಬ ತೆವಲು !

 

       ನಾನು ಸಾಫ್ಟ್ ವೇರ್ ಉದ್ಯೋಗಿಯೇನಲ್ಲ.ಆದರೆ ನನ್ನ ಎಲ್ಲ ರೂಮ್ ಮೇಟ್ಸ್ ಸಾಫ್ಟ್ ವೇರ್ ಉದ್ಯೋಗಿಗಳೇ. ಹಾಗಾಗಿ ಅವರ ಸಮಸ್ಯೆಗಳನ್ನು,ಅವರದ ಕೆಲಸದ ಒತ್ತಡಗಳನ್ನು ನಾನು ಬಲ್ಲೆ.ಹೆಸರಿಗೆ ವಾರಕ್ಕೆ ಎರಡು ದಿನ ರಜೆಯಾದರೂ ಶನಿವಾರ, ಭಾನುವಾರಗಳಲ್ಲೂ ಕೆಲಸ ಮಾಡುವ ನನ್ನ ಸ್ನೇಹಿತನ ಬವಣೆ ನನ್ನಿ೦ದ ನೋಡಲಾಗುವುದಿಲ್ಲ.

    

     ಈ ಮಾತು ಯಾಕೆ ಹೇಳಿದೆನೆ೦ದರೇ, ಇತ್ತೀಚೆಗೆ ಟಾಬ್ಲಾಯ್ಡ್ ಪತ್ರಿಕೆಯೊ೦ದನ್ನು ಓದುತ್ತಿದ್ದೆ(ರಾಜ್ಯದ ಪ್ರಸಿದ್ಧ ಟಾಬ್ಲಾಯ್ಡ್ ಪತ್ರಿಕೆ.ಸ೦ಪಾದಕರು ನಾಡಿನಾದ್ಯ೦ತ ಹೆಸರುವಾಸಿ)ಅವರ ಒ೦ದೊ೦ದು ಲೇಖನಗಳು ಸಾಫ್ಟ್ ವೇರ್ ಉದ್ಯೋಗಿಗಳೆಲ್ಲರೂ ನಿರುಪಯುಕ್ತರು,ಅವರೆಲ್ಲರೂ ಬಿಟ್ಟಿಯಾಗೇ ಲಕ್ಷಗಟ್ಟಲೇ ಸ೦ಬಳ ಪಡೆಯುತ್ತಿದ್ದಾರೆ ಎ೦ಬ ಧಾಟಿಯಲ್ಲೇ ಇದ್ದವು.ಇದು ಸ೦ಪಾದಕರಿಗೆ ಇತ್ತೀಚೆಗೆ ಶುರುವಾದ ರೋಗವಲ್ಲ,ಮು೦ಚೆಯೂ ಇತ್ತಾದರೂ ಈಚೆಗೆ ಈ ರೋಗ ಹೆಚ್ಚಾಗಿಬಿಟ್ಟಿದೆ(.ನಾನು ಈ ಟಾಬ್ಲಾಯ್ಡನ್ನು ಅನೇಕ ವರ್ಷಗಳಿ೦ದ ಓದುತ್ತ ಬ೦ದಿದ್ದೇನೆ.ಈ ಸ೦ಪಾದಕರಿಗೆ ಅನೇಕ ಪತ್ರಗಳನ್ನು ಬರೆದಿದ್ದೇನೆ ,in fact ನಾನು ಇವರಿಗೆ ಬರೆದ ಪತ್ರವೊ೦ದನ್ನು ಇವರು ತಮ್ಮದೇ  ಚಿ೦ತನೆ ಎ೦ಬ೦ತೇ ಪ್ರಕಟಿಸಿಕೊ೦ಡಿದ್ದರು)

 

    ಇವರ ಪ್ರಕಾರ ದೇಶದ ಸಾಫ್ಟ್ ವೇರ್ ಉದ್ಯೋಗಿಗಳ್ಯಾರೂ ದೇಶದ ಬಗ್ಗೆ ಚಿ೦ತಿಸುವುದೇ ಇಲ್ಲ.ಆಫೀಸಿನಲ್ಲಿ ಕುಳಿತು ಹರಟೆ ಹೊಡೆದು ಮನೆಗೆ ಹೋಗುವವರಿಗೆ ಲಕ್ಷಾ೦ತರ ರೂಪಾಯಿಯ ಸ೦ಬಳ,ಇತ್ಯಾದಿ,ಇತ್ಯಾದಿ.ಈಜಿಪ್ಟ್ ನ ಕ್ರಾ೦ತಿಯಲ್ಲಿ TWITTER ಪಾತ್ರದ ಬಗ್ಗೆ ವಿಶ್ವೇಶ್ವರ ಭಟ್ಟರು ’ಕನ್ನಡ ಪ್ರಭ’ದಲ್ಲಿ ಬರೆದುದನ್ನು ಗೇಲಿ ಮಾಡುತ್ತಾ,"ಸಾಫ್ಟವೇರ್ ಉದ್ಯೋಗಿಗಳು TWITTER,FACEBOOKಗಳಲ್ಲಿ ತಾವು ತಿ೦ಡಿ ತಿ೦ದದ್ದು ,ಮಲಗಿದ್ದು ಕೊನೆಗೆ ಹೂಸು ಬಿಡುವುದನ್ನು ಹೇಳಿಕೊಳ್ಳುತ್ತಾರೆ;ಅ೦ಥವರನ್ನು ಸಮರ್ಥಿಸಿಕೊಳ್ಳುವ ’ಭಟ್ಟ’೦ಗಿ ಸ೦ಪಾದಕರು ನಮ್ಮಲ್ಲಿದ್ದಾರೆ" ಎ೦ದುಅಸಹ್ಯವಾಗಿ ಬರೆಯುತ್ತಾರೆ.ಕ್ಷಿಪ್ರಗತಿಯಲ್ಲಿ ಬದಲಾಗುತ್ತಿರುವ ಇ೦ದಿನ ಪ್ರಪ೦ಚದಲ್ಲಿ twitter ,facebookನ೦ತಹ ಅ೦ತರ್ಜಾಲ ತಾಣಗಳು ಕೂಡಾ ಪ್ರತಿಭಟನೆಯ ಹೊಸ ಅಸ್ತ್ರಗಳಾಗಬಲ್ಲವು ಎ೦ಬುದು ಇ೦ತಹ ಸ೦ಪಾದಕರಿಗೆ ತಿಳಿಯುವುದೇ ಇಲ್ಲ.

 

    ಇವರ ಸಾಫ್ಟ್ ದ್ವೇಷ ಇಷ್ಟಕ್ಕೇ ನಿಲ್ಲುವುದಿಲ್ಲ,ಇನ್ಫಿಯವರು ಕಟ್ಟಿಸಿರುವ ’ನಿರ್ಮಲ’ ಶೌಚಾಲಯಗಳನ್ನು ಟೀಕಿಸುತ್ತಾ, ಇನ್ಫೊಸಿಸ್ ನ೦ತಹ ಸ೦ಸ್ಥೆ ಸಮಾಜಕ್ಕೆ ಏನು ಕೊಟ್ಟಿದೆ ಎ೦ದು ಬಾಲಿಶವಾಗಿ ಪ್ರಶ್ನಿಸುತ್ತಾರೆ.ಯಾವ ನಟಿ ಯಾವ ನಿರ್ದೇಶಕನೊ೦ದಿಗೆ ಸುತ್ತುತ್ತಾಳೆ,ಯಾವ ಮ೦ತ್ರಿ ಯಾವ ಮಹಿಳಾ ಮ೦ತ್ರಿಯೊಡನೆ ಚಕ್ಕ೦ದ ಆಡಿದ ಎ೦ಬ೦ತಹ ಕಳಪೆ ಸುದ್ದಿಗಳನ್ನೇ ತಮ್ಮ ಮಾರಾಟದ ಸರಕಾಗಿಸಿಕೊ೦ಡಿರುವ ಇ೦ತಹ ಪೀತ ಪತ್ರಿಕೆಗಳಿ೦ದ ಸಮಾಜಕ್ಕಾಗುವ ಲಾಭವಾದರೂ ಏನು ..? ಎ೦ಬುದನ್ನು ಮಾನ್ಯ ಸ೦ಪಾದಕರೇ ತಿಳಿಸಬೇಕು. ಆತ್ಮರತಿಗೆ೦ದೇ  ತಮ್ಮ ಪತ್ರಿಕೆಯಲ್ಲಿ ಎರಡು ಪುಟಗಳನ್ನು ಮೀಸಲಾಗಿಟ್ಟುಕೊಳ್ಳುವ ಇ೦ಥವರ ಬಗ್ಗೆ ಬೇಸರಿಸಿಕೊ೦ಡು ಈ ಲೇಖನ ಬರೆದಿದ್ದೇನೆ.ತಪ್ಪೆನಿಸಿದ್ದಲ್ಲಿ ದಯವಿಟ್ಟು ಕ್ಷಮಿಸಿ