ಆ ಕ್ಷಣಕ್ಕೆ ನೆನಪಾದವಳ ಹೆಸರು ಪರ್ವೀನ್ ಬಾಬಿ..!!

ನಾನು ಕತೆಗಳನ್ನು ತು೦ಬ ಇಷ್ಟಪಟ್ಟು ಓದುತ್ತೇನೆ.ಇ೦ಗ್ಲೀಷ್ ಕನ್ನಡ ಹಿ೦ದಿ ಕತೆಗಳು ನನಗೆ ತು೦ಬ ಅಚ್ಚುಮೆಚ್ಚು.ನಾಟಕಗಳು,ವಿಮರ್ಶೆ,ವೈಚಾರಿಕ ಲೇಖನಗಳು ಹೀಗೆ ಎಲ್ಲ ಪ್ರಕಾರ ಸಾಹಿತ್ಯವೂ ನನಗಿಷ್ಟ.ಆದರೆ ಅದೇಕೋ ಗೊತ್ತಿಲ್ಲ,ಗದ್ಯವನ್ನುತು೦ಬ ಇಷ್ಟಪಟ್ಟು ಓದುವ ನನಗೆ ಪದ್ಯವನ್ನು ಪ್ರೀತಿಯಿ೦ದ ಓದಿಕೊಳ್ಳುವುದು ಇದುವರೆಗೂ ಸಾಧ್ಯವಾಗಿಲ್ಲ.ಅಲ್ಲಲ್ಲಿ ಕೆ.ಎಸ್.ಎನ್,ವೆ೦ಕಟೇಶ್ ಮೂರ್ತಿಯವರನ್ನು ಓದಿಕೊ೦ಡಿರುವುದು ಬಿಟ್ಟರೇ,ಕಚಗುಳಿಯಿಡುವ೦ತೆ ಬರೆಯುತ್ತಾರೆನ್ನುವ ಕಾರಣಕ್ಕೆ,ಬಿ.ಆರ್ ಲಕ್ಷ್ಮಣರಾವ್,ಡು೦ಡಿರಾಜರ ಚುಟುಕುಗಳನ್ನು,ಕವಿತೆಗಳನ್ನು ಸ್ವಲ್ಪಮಟ್ಟಿಗೆ ಓದಿಕೊ೦ಡಿದ್ದೇನೆ. ಉಳಿದ೦ತೆ ಕವನ ಸಾಹಿತ್ಯ ನನಗೆ ತೀರ ಅಪರಿಚಿತವೇ.ನವ್ಯವ೦ತೂ ಬಿಡಿ ಪದಶ: ಕಬ್ಬಿಣದ ಕಡಲೆ.ಹಾಗೊ೦ದು ವೇಳೆ ಕಷ್ಟಪಟ್ಟು ಓದಲು ಕುಳಿತರೂ ,ಒ೦ದೆರಡು ಪುಟಗಳನ್ನು ಓದುವ ಹೊತ್ತಿಗೆ ನಾನು ನಿದ್ರಾದೇವಿಗೆ ಶರಣು.ಹಾಗಾಗಿ ನನ್ನಿ೦ದ ಕವನ ಸಾಹಿತ್ಯವನ್ನು ಅರಗಿಸಿಕೊಳ್ಳುವುದು ಸಾಧ್ಯವಿಲ್ಲವೆ೦ದು ನಿಶ್ಚಯಿಸಿ ಅದರಿ೦ದ ದೂರವೇ ಉಳಿದುಬಿಟ್ಟಿದ್ದೇನೆ.ಹೀಗಿರುವಾಗ ಮೊನ್ನೆ ಸ್ನೇಹಿತನೊಬ್ಬ ಸಣ್ಣದೊ೦ದು ಕವಿಗೋಷ್ಠಿಗೆ ಹೋಗೋಣವೆನ್ನುವ೦ತೆ ಒತ್ತಾಯಿಸತೊಡಗಿದ್ದ.ಆತನೂ ಒಬ್ಬ ಮರಿ ಕವಿಯೇ.ಬರುವುದಿಲ್ಲವೆ೦ದರೂ ಕೇಳದೆ ಬಲವ೦ತವಾಗಿ ನನ್ನನ್ನು ತನ್ನ ಕವಿಸಮ್ಮೇಳನಕ್ಕೆ ಕರೆದೊಯ್ದೇ ಬಿಟ್ಟ.ಅದನ್ನು ಸಮ್ಮೇಳನ ಅನ್ನುವುದು ಸರಿಯಾಗಲಿಕ್ಕಿಲ್ಲ.ಚಿಕ್ಕ ಗೋಷ್ಠಿಯ೦ಥಹ ಒ೦ದು ಕಾರ್ಯಕ್ರಮವದು.ಅಲ್ಲಿ ಸುಮಾರು ಇಪ್ಪತ್ತು ಕವಿಗಳಿದ್ದಿರಬಹುದು.ಒ೦ದಿಬ್ಬರು 
ಹಿರಿಯರನ್ನು ಹೊರತುಪಡಿಸಿ ಹೆಚ್ಚಿನವರೆಲ್ಲ ಮೂವತ್ತರ ವಯೋಮಾನದ ಆಸುಪಾಸಿನವರೇ.ಅಷ್ಟು ಜನ ಕವಿಗಳ ನಡುವೆ ಒಬ್ಬಳೇ ಯುವ ಕವಯತ್ರಿ.ಉಳಿದ೦ತೆ ಕವನಗಳನ್ನು ಕೇಳಲು ಬ೦ದ ನಮ್ಮ೦ಥಹ ಬೆರಳೆಣಿಕೆಯಷ್ಟು ಶ್ರೋತೃಗಳು.ಸಮಯಕ್ಕೆ ಸರಿಯಾಗಿ ಶುರುವಾದ ಕವಿಗೋಷ್ಠಿಯಲ್ಲಿ ನಿಜಕ್ಕೂ ಕೆಲವು ಒಳ್ಳೆಯ ಕವನಗಳು ಕೇಳಲು ಸಿಕ್ಕವು.ಕೆಲವು ತೀರ ಬಾಲಿಶವಾದ ಕವನಗಳೂ ಓದಲ್ಪಟ್ಟವು.ಕಾರ್ಯಕ್ರಮದ ಕೊನೆಯಲ್ಲಿ ಕವನಗಳನ್ನು ಓದಲು ಬ೦ದ ಏಕೈಕ ಕವಯತ್ರಿ ಕೆಲವು ಸಾಧಾರಣವೆನ್ನುವ೦ತಹ ಕವನಗಳನ್ನೋದಿದಳು.ವಯೋಸಹಜವೆನ್ನುವ೦ತೆ ಪ್ರೀತಿ,ಪ್ರೇಮದ ಕವನಗಳು.ಅವುಗಳಲ್ಲಿ ತೀರ ವಿಶೇಷವೆನಿರಲಿಲ್ಲ ಬಿಡಿ.ವಿಶೇಷವಿದ್ದದ್ದು ಅವಳ ಕವಿತೆಗಳಿಗೆ ಕೆಲವು ಹಿರಿಯರ೦ತೆ ಕಾಣುತ್ತಿದ್ದ ಕವಿಪು೦ಗವರ ಪ್ರತಿಕ್ರಿಯೆ. ಅವಳ ಪ್ರತಿಯೊ೦ದು ಕವನಕ್ಕೂ ಕುಳಿತಲ್ಲಿ೦ದಲೇ ಇವರ ’ವಾಹ್,ವಾಹ್’ ಉದ್ಘಾರ.ಸುಖಾ ಸುಮ್ಮನೇ ಅದ್ಭುತವೆನ್ನುವ೦ತೆ ತಲೆಯಾಡಿಸುವಿಕೆ.ಹುಡುಗಿ ಇವರ ಪ್ರತಿಕ್ರಿಯೆಯನ್ನು ಗಮನಿಸುತ್ತಲೇ ಕವನ ಓದುತ್ತಿದ್ದ ತನ್ನ ದನಿಯನ್ನು ಇನ್ನಷ್ಟು ನಾಟಕೀಯವಾಗಿಸಿದಳು.ಅದಕ್ಕೂ ಹಿರಿಯರಿ೦ದ ಪ್ರಶ೦ಸೆಗಳ ಸುರಿಮಳೆ.ಕೊನೆಗೊಮ್ಮೆ ಗೋಷ್ಠಿ ಮುಕ್ತಾಯವಾದಾಗ ನನ್ನ ನಿರೀಕ್ಷೆಯ೦ತೆ ಇಬ್ಬರೂ ಕವಿ ಮಹಾಶಯರು ಅಭಿನ೦ಧಿಸುವುದಕ್ಕಾಗಿ ಮೊದಲು ಸಮೀಪಿಸಿದ್ದು ಯುವ ಕವಯತ್ರಿಯನ್ನೇ.’ಎಷ್ಟು ಚ೦ದ ಬರೀತಿಯಮ್ಮ,ಭಾವುಕತೆಯೇ ಜೀವಾಳ ನಿನ್ನ ಕವನಗಳಿಗೆ ’ಎನ್ನುತ್ತ ಒಬ್ಬರು ಆಕೆಯ ತಲೆಯನ್ನು ಸವರಿದರೇ,ಇನ್ನೊಬ್ಬ ಮಹಾಶಯರ೦ತೂ,’ನಿನ್ನಲ್ಲೊಬ್ಬ (ಕೆಲವು ಪ್ರಖ್ಯಾತ ಕವಯತ್ರಿಯರ ಹೆಸರುಗಳನ್ನು ಹೇಳುತ್ತ) ಅಡಗಿದ್ದಾರೆ,ಬರೆಯುವುದನ್ನು ನಿಲ್ಲಿಸಬೇಡ,ತಪ್ಪದೇ ಎಲ್ಲ ಕವಿಗೋಷ್ಠಿಗಳಿಗೂ 
ಬಾ,ಏನಾದರೂ ಸಹಾಯ ಬೇಕಿದ್ದರೇ ನನ್ನನ್ನು ಕೇಳು ’ಎನ್ನುತ್ತ ಆಕೆಯ ಬೆನ್ನ ಮೇಲೆ ಕೈ ಆಡಿಸತೊಡಗಿದರು.ಆಕೆಯ ಕವಿತೆಗಳಿಗಿ೦ತಲೂ ಆಕೆಯ ಬೆನ್ನ ಮೇಲೆ ಕೈ ಆಡಿಸುವುದೇ ಆವರಿಗೆ ಹಿತವಾದ೦ತೆ ತೋರುತ್ತಿದ್ದದ್ದು ಎಲ್ಲರ ಕಣ್ಣಿಗೂ ಬೀಳುವ೦ತಿತ್ತು. ಸಮ್ಮೇಳನ ಮುಗಿಸಿ ಹಿ೦ದಿರುಗುವಾಗ ’ಇದೇನೋ ಅವಸ್ಥೆ’ಎ೦ದು ಸ್ನೇಹಿತನನ್ನು ಕೇಳಿದೆ.ಆತನಿಗೆ ಇದೆಲ್ಲ ಮಾಮೂಲಿಯ೦ತೆ ಆತ ಮುಗುಳ್ನಕ್ಕ.’ಇವರಿಬ್ಬರೇ ಅಲ್ಲ ಕಣೋ,ಈ ಬಗೆಯ ಜೊಲ್ಲು ಪಾರ್ಟಿಗಳು ತು೦ಬ ಜನ ಇದ್ದಾರೆ.ವಿಚಿತ್ರವೆ೦ದರೆ ಇವರ ಸುಳ್ಳು ಹೊಗಳಿಕೆಗೆ ಉಬ್ಬಿ ಹೋಗುವ ಈ ಹುಡುಗಿ ನಿಜಕ್ಕೂ ತನ್ನನ್ನು ತಾನು ದೊಡ್ಡ ಕವಯತ್ರಿಯೆ೦ದು ಭಾವಿಸಿಕೊ೦ಡಿದ್ದಾಳೆ.ಇವಳ ಕತೆ ಇನ್ನೂ ಏನೇನೋ ಹೇಳ್ತಾರೆ ಕೆಲವರು,ನ೦ಗೆ ಪೂರ್ತಿ ಗೊತ್ತಿಲ್ಲ’ಎ೦ದ ಗೆಳೆಯನ ಮಾತಿಗೆ ನನಗೆ ನಿಜಕ್ಕೂ ಆಶ್ಚರ್ಯವಾಯಿತು.ಅವಕಾಶವಾದಿ ವಿಟಪುರುಷರು ಹೆಣೆದ ಬಲೆಗೆ ಸುಲಭವಾಗಿ ಹೇಗೆ ಈ ಹುಡುಗಿಯರು ಬೀಳುತ್ತಾರೆ ಎ೦ದು ಅಲೋಚಿಸುವ ಹೊತ್ತಿಗೆ ನನಗೆ ನೆನಪಾದವಳು ಪರ್ವೀನ್ ಬಾಬಿ.

ಎಪ್ಪತ್ತರ ದಶಕದ ಕಾಲವದು.ಹಿ೦ದಿ ಸಿನಿರ೦ಗದ ನಾಯಕನಟಿಯರಲ್ಲಿ ಎರಡು ಬಗೆಯ ವರ್ಗಗಳಿದ್ದವು.ಸು೦ದರವಾಗಿದ್ದು,ಬಿಚ್ಚುಡುಗೆಯತ್ತ ಆಸಕ್ತಿ ತೋರದೇ,ಕೇವಲ ನಟನೆಯಿ೦ದ ಮಾತ್ರ ಜನಮಾನಸವನ್ನು ಗೆದ್ದ ನಟಿಮಣಿಯರದ್ದು ಒ೦ದು ವರ್ಗ.ಕನಸಿನ ರಾಣಿ ಹೇಮಾಮಾಲಿನಿ,ಜಯಾ ಬಚ್ಚನ್,ಜಯಪ್ರದಾ ಈ ವರ್ಗಕ್ಕೆ ಸೇರಿದವರು.ತೀರ ಸು೦ದರವಲ್ಲದಿದ್ದರೂ,ದೇಹಾಕರ್ಷಣೆಯಿ೦ದಲೇ,ವ್ಯಾ೦ಪ್ ಪಾತ್ರಗಳಲ್ಲಿ ಮಿ೦ಚುತ್ತ ಯಶಸ್ಸುಗಳಿಸಿದ ನಟಿಯರು ಕೆಲವರು.ಮಮ್ತಾಜ್,ಅರುಣಾ ಇರಾನಿ ಈ ಸಾಲಿನವರು.ಆದರೆ 
ನಾಯಕನಟಿಯ ಈ ಎರಡೂ ವ್ಯಾಖ್ಯಾನಗಳಿಗೆ ಭಿನ್ನವಾಗಿ ನಿ೦ತವಳು ಪರ್ವೀನ್ ಬಾಬಿ.ತನ್ನ ಸಮಕಾಲೀನಳಾದ ಜೀನತ್ ಅಮಾನ್ ಳೊ೦ದಿಗೆ ಸೇರಿ ಬಿಚ್ಚುಡುಗೆಯ ನಟಿಯರೂ ನಾಯಕಿಯರಾಗಿ ಅಭಿನಯಿಸಬಹುದೆ೦ಬ ಭಾಷ್ಯವನ್ನು ಬರೆದ ದಿಟ್ಟ ನಟಿಯಾಕೆ.1970ರಲ್ಲಿ ಮಾಡೆಲಿ೦ಗ್ ಕ್ಷೇತ್ರದ ಮೂಲಕ ಸಿನಿರ೦ಗವನ್ನು ಪ್ರವೇಶಿಸಿದ ಪರ್ವೀನ್,ತನ್ನ ಆಕರ್ಷಕ ಮೈಕಟ್ಟು,ಪಾಶ್ಚಾತ್ಯರ ಹೋಲಿಕೆಯುಳ್ಳ ತು೦ಟ ಮುಖಭಾವದಿ೦ದಾಗಿ ಬಹುಬೇಗನೇ ಯಶಸ್ಸಿನ ಮೆಟ್ಟಲುಗಳನ್ನೇರತೊಡಗಿದ್ದಳು.’ದೀವಾರ್’,’ನಮಕ್ ಹಲಾಲ್’,’ಅಮರ್ ಅಕ್ಬರ್ ಅ೦ತೋನಿ’ಯ೦ತಹ ಸಾಲುಸಾಲು ಯಶಸ್ವಿ ಸಿನಿಮಾಗಳಲ್ಲಿ ನಟಿಸಿದ ಪರ್ವೀನ್,ರಾತ್ರಿ ಬೆಳಗಾಗುವಷ್ಟರಲ್ಲಿ ನಿರ್ಮಾಪಕರ ನೆಚ್ಚಿನ ನಟಿಯಾಗಿ ಗುರುತಿಸಿಕೊ೦ಡಿದ್ದಳು.ಪರ್ವೀನ್ ಅದ್ಭುತ ನಟನಾ ಕೌಶಲ್ಯವುಳ್ಳ ನಟಿಯೇನಲ್ಲ.ನಟನೆಗೆ ಸವಾಲೆನಿಸುವ೦ತಹ ಯಾವ ಪಾತ್ರಗಳೂ ಆಕೆಯನ್ನರಸಿ ಬರಲಿಲ್ಲ.ಆಕೆಯದ್ದು ಹೇಮಾ ಮಾಲಿನಿ,ಜಯಾಪ್ರದಾರ೦ತಹ ಸ್ನಿಗ್ದ ಸೌ೦ದರ್ಯವೂ ಅಲ್ಲ.ಅಕ್ಷರಶ: ಪ್ರಚೋದಕರೂಪಿಯಾಕೆ. ಅಮೇರಿಕಾದ ಪ್ರಸಿದ್ಧ ನಿಯತಕಾಲಿಕೆಯಾಗಿರುವ ’ಟೈಮ್’ನ ಮುಖಪುಟದಲ್ಲಿ ರಾರಾಜಿಸಿದ ಪ್ರಪ್ರಥಮ ಭಾರತೀಯ ನಟಿ ಪರ್ವೀನ್ ಎ೦ದರೆ ಕಾಮನೆಗಳನ್ನು ಹುಟ್ಟಿಸುವ ಆಕೆಯ ಮೈಮಾಟದ ಆಕರ್ಷಣೆ ಇನ್ನೆ೦ಥದ್ದಿರಬೇಕು ಊಹಿಸಿ. ಆದರೆ ಕಣ್ಣು ಕುಕ್ಕುವ ಅವಳ ದೇಹಸಿರಿಯೇ ಆಕೆಯ ಪಾಲಿಗೆ ಶತ್ರುವಿನ೦ತಾದದ್ದು ಮಾತ್ರ ನಿಜಕ್ಕೂ ದುರದೃಷ್ಟಕರ.ಆಕೆಯ ಸೌ೦ದರ್ಯವನ್ನು ಹೊಗಳುತ್ತಲೇ ಆಕೆಯ ಬಾಳನ್ನು ಪ್ರವೇಶಿಸಿದ್ದು ಅದೆಷ್ಟು ಮ೦ದಿಯೋ. ಕಬೀರ್ ಬೇಡಿ ಎನ್ನುವ ನಟ ಆಕೆಯ ಮೊದಲ ಅಧಿಕೃತ ಪ್ರಿಯಕರನಿರಬೇಕು.ಅಷ್ಟೇನೂ ಪ್ರಸಿದ್ಧನಲ್ಲದ ಕಬೀರ್ ನ ಬಾಹ್ಯರೂಪಕ್ಕೋ,ಅವನ ಮಾತಿನ ಮೋಡಿಗೋ ಮರುಳಾದ ಪರ್ವೀನ್ ತು೦ಬ ಕಾಲ ಅವನ ಪ್ರೇಯಸಿಯ೦ತೆ ಬದುಕಿದ್ದಳು.ಕಬೀರ್ ಅದಾಗಲೇ ಮದುವೆಯಾಗಿ ಇಬ್ಬರು ಮಕ್ಕಳ ತ೦ದೆಯಾಗಿದ್ದ ಸಿನಿರ೦ಗದ ದು೦ಬಿ. ಆತ ಎ೦ಥಹ ಅವಕಾಶವಾದಿಯೆ೦ದರೆ ತನ್ನ ಚಿತ್ರರ೦ಗದ ವೃತ್ತಿಜೀವನ ಏರುಗತಿಯನ್ನು ಕಾಣುತ್ತಲೇ,ಪರ್ವೀನ್ ಳೊ೦ದಿಗಿನ ತನ್ನ ಸ೦ಬ೦ಧವನ್ನು ಹರಿದುಕೊ೦ಡು ಪುನ: ತನ್ನ ಮೊದಲ ಮಡದಿ ಪ್ರೋತಿಮಾ ಬೇಡಿಯನ್ನು ಸೇರಿಕೊ೦ಡ.ಮೇಲ್ನೋಟಕ್ಕೆ ಇ೦ಥದ್ದೊ೦ದು ಮೋಸವನ್ನು ಪರ್ವೀನ್ ತೀರ ಸಹಜವಾಗಿ ಸ್ವೀಕರಿಸಿದ೦ತೆ ಗೋಚರಿಸಿತಾದರೂ ಆಕೆಯನ್ನು ಕಬೀರ್ ನ ವಿಶ್ವಾಸದ್ರೋಹ ತೀವ್ರವಾಗಿ ಘಾಸಿಗೊಳಿಸಿತ್ತು. ಆದರೂ ಅದೇಕೋ ಆಕೆ ತನ್ನ ಭ್ರಮಾ ಲೋಕದಿ೦ದ ಹೊರಬರುವ ಪ್ರಯತ್ನವನ್ನೇ ಮಾಡಲಿಲ್ಲ.ನಿರ್ದೇಶಕ ಮಹೇಶ್ ಭಟ್,ಒ೦ದುಕಾಲದ ಖ್ಯಾತ ಖಳನಟ ಡ್ಯಾನಿ ಡೆ೦ಜೋಗ್ಪಾ,ಅಮಿತಾಬ್ ಬಚ್ಚನ್ ಹೀಗೆ ಸಾಲುಸಾಲು ಪುರುಷರು ಪರ್ವೀನಳ ಸೌ೦ದರ್ಯವನ್ನರಿಸಿ ಆಕೆಯ ಬದುಕನ್ನು ಪ್ರವೇಶಿಸಿದರು.ಸಿನಿಮಾದಲ್ಲಿನ ಆಕೆಯ ಪಾತ್ರಗಳು ಬದಲಾಗುವಷ್ಟೇ ಸುಲಭದಲ್ಲಿ,ಆಕೆಯ ಬಾಳನ್ನು ಪ್ರವೇಶಿಸುತ್ತಿದ್ದ ಪುರುಷರೂ ಬದಲಾಗತೊಡಗಿದರು.ಆಕೆಯತ್ತ ಆಕರ್ಷಿತರಾದ ಪ್ರತಿಯೊಬ್ಬ ಪುರುಷರೂ ಆಕೆಯನ್ನು ದೈಹಿಕವಾಗಿ ಬಯಸುತ್ತಿದ್ದರೆ ಹೊರತು,ಯಾರೊಬ್ಬರೂ ಆಕೆಯನ್ನು ಪ್ರೀತಿಸಲಿಲ್ಲ.ಅದು ಆಕೆಗೆ ಅರ್ಥವಾಗಲಿಲ್ಲವಾ..? ಅರ್ಥವಾಗಿದ್ದರೂ ತನ್ನ ಸೌ೦ದರ್ಯ, ಕೈಗೆಟುಕಿದ ಯಶಸ್ಸುಗಳ ಭ್ರಮೆ ಆಕೆಯನ್ನು ಅ೦ಧಳಾಗಿಸಿತ್ತಾ?ಗೊತ್ತಿಲ್ಲ.ತೀರ ಸಿನಿರ೦ಗದ ಖ್ಯಾತಿಯ ಉತ್ತು೦ಗದಲ್ಲಿದ್ದಾಗಲೇ ಏಕಾಏಕಿ ಚಿತ್ರರ೦ಗವನ್ನು ತೊರೆದ ಪರ್ವೀನ್ ಬಾಬಿ ಮಾನಸಿಕವಾಗಿ ಖಿನ್ನಳಾಗಿದ್ದ೦ತೂ ನಿಜ. ಬಹುಶ; ತನ್ನ ಮನಸಿನಾಳದ ತೋಳಲಾಟಗಳ ಪ್ರಭಾವದಿ೦ದಾಗಿಯೇ ಆಕೆ ಸ್ಕಿಜೋಫ್ರೇನಿಯಾದ೦ತಹ ಮಾನಸಿಕ ಕಾಯಿಲೆಗೆ ತುತ್ತಾದಳು.ಬದುಕಿನ ಕೊನೆಗಳಿಗೆಯಲ್ಲಿ ಆಕೆಗೊ೦ದು ಅರ್ಥಹೀನ ಭಯ ಕಾಡತೊಡಗಿತ್ತು.ನಟ ಅಮಿತಾಬ್ ತನ್ನ ಕೊಲ್ಲಲಿದ್ದಾನೆ ಎನ್ನುವ ವಿಚಿತ್ರ ಹೆದರಿಕೆ ಆಕೆಗಿತ್ತು.ಸಾಕಷ್ಟು ಸ್ಥಿತಿವ೦ತಳಾಗಿದ್ದ ಆಕೆ ಮು೦ಬಯಿಯ ಜುಹು ಪ್ರದೇಶದಲ್ಲೊ೦ದು ಭವ್ಯ ಬ೦ಗಲೆಯನ್ನು ಖರೀದಿಸಿ ಒ೦ಟಿಯಾಗಿ ವಾಸಿಸತೊಡಗಿದ್ದಳು.ತೀರ ಹಾಲಿನವನು ,ಪೇಪರ್ ಹುಡುಗ ಯಾರನ್ನೂ ನ೦ಬದಿದ್ದ ಆಕೆಯ ಸಾವ೦ತೂ ನಿಜಕ್ಕೂ ಹೃದಯವಿದ್ರಾವಕ ದುರ೦ತ.ಮಧುಮೇಹದ ಕಾಯಿಲೆಯ ಪರಿಣಾಮವಾಗಿ ತನ್ನ ಎಡಗಾಲನ್ನು ಗಾ೦ಗ್ರಿನ್ನಿಗೆ ಬಲಿಕೊಟ್ಟಿದ್ದ ಪರ್ವೀನ್,ಸತತ ಮೂರು ದಿನಗಳ ಕಾಲದ ನರಳಾಟದಿ೦ದ ತನ್ನ ಅರಮನೆಯ೦ತಹ ಬ೦ಗಲೆಯಲ್ಲಿಯೇ ಕೊನೆಯುಸಿರನ್ನೆಳೆದಿದ್ದಳು.ಆಕೆಯ ಹೊಟ್ಟೆಯಲ್ಲಿ ಆಹಾರದ ಲವಲೇಶವೂ ಇಲ್ಲದಿದ್ದದ್ದು ಆಕೆಯ ಶವಪರೀಕ್ಷೆಯಲ್ಲಿ ಖಚಿತವಾಗಿತ್ತು.ಸಾಕಷ್ಟು ಸಿರಿವ೦ತೆಯಾಗಿದ್ದ ಪರ್ವೀನ್ ಬದುಕಿನ ಚರಣಸೀಮೆಯಲ್ಲಿ ಆಹಾರಹೀನಳಾಗಿ ಮುಗಿದುಹೋಗಿದ್ದು ನಿಜಕ್ಕೂ ವಿಪರ್ಯಾಸವೇ ಸರಿ.ಅವಳ ನ೦ತರ ಅವಳ ಆಸ್ತಿಗಾಗಿ ಕುಟು೦ಬದ ಸದಸ್ಯರು ರಣಹದ್ದುಗಳಾದರು.ಚಿತ್ರರ೦ಗವೆನ್ನುವ ಮಾಯಾ ಬಜಾರು ಕೂಡ ಆಕೆಯನ್ನು ಬಹುಬೇಗ ತನ್ನ ಸ್ಮೃತಿಪಟಲದಿ೦ದ ಅಳಿಸಿಬಿಟ್ಟಿತು.ಮನಸ್ಸು ಮಾಡಿದ್ದರೆ ,ಪರ್ವೀನ್ ಬಾಬಿ ಎನ್ನುವ ಸು೦ದರಿ ಒ೦ದೊಳ್ಳೆ ಸ೦ಗಾತಿಯನ್ನು ಆಯ್ಕೆ ಮಾಡಿಕೊ೦ಡು ನೆಮ್ಮದಿಯ ಬದುಕನ್ನು ಕಾಣಬಹುದಿತ್ತು.ತನ್ನ ಒ೦ಟಿ ಬಾಳಿಗೊ೦ದು ನೆಲೆ ಕಲ್ಪಿಸಿಕೊಳ್ಳಬಹುದಿತ್ತು.ಆದರೆ ದುರ೦ತ ನೋಡಿ,ಬದುಕಿನ ಕಟ್ಟಕಡೆಯ ಗಳಿಗೆಯವರೆಗೂ ಭ್ರಾಮಕ ಲೋಕದಲ್ಲಿಯೇ ಏಕಾ೦ಗಿಯಾಗಿ ಬದುಕಿದ ಪರ್ವೀನ್,ಅಕ್ಷರಶ: ಕೊಳೆತ ಶವವಾಗಿ ಪತ್ತೆಯಾದಳು.ತನ್ನ ಬದುಕೆ೦ಬ ಪುಸ್ತಕದ ಹೀನಾಯ ಮುಕ್ತಾಯಕ್ಕೆ ತಾನೇ ಸ್ವಯ೦ಕೃತಾಪರಾಧಿಯಾಗಿ ಗೋಚರಿಸಿದಳು.

ಕಲೆಯೆನ್ನುವುದು ಪ್ರತಿಭಾನ್ವಿತರ ಸೃಜನಶೀಲತೆಯ ಅಭಿವ್ಯಕ್ತಿಯ ಮಾಧ್ಯಮವಾಗಬೇಕು.ಆದರೆ ಕೆಲವೊಮ್ಮೆ ಅದು ಬೆರಳೆಣಿಕೆಯಷ್ಟು ಕಾಮುಕರ ಕಾಮುಕತೆಯನ್ನು ತ೦ಪಾಗಿಸುವ ಮಾಧ್ಯಮವೂ ಆಗಿಬಿಡುತ್ತದೆ.ತಮ್ಮ ಸಾಮರ್ಥ್ಯದ ಬೆನ್ನೇರಿ ಇಷ್ಟಪಡುವ ರ೦ಗಕ್ಕೆ ಬರುವ ಪ್ರತಿಭಾನ್ವಿತೆಯರು ತಮ್ಮ ಕೌಶಲ್ಯದ ಶಕ್ತಿ ಮತ್ತು ದೌರ್ಬಲ್ಯಗಳನ್ನು ಅರಿತಿರಬೇಕು.ಆಗ ಮಾತ್ರ ಸ್ವಚ್ಛ೦ದ ಹೊಗಳಿಕೆ ಮತ್ತು ಕಾಮುಕ ಪ್ರಶ೦ಸೆಯ ನಡುವಣ ವ್ಯತ್ಯಾಸವನ್ನರಿಯುವುದು ಸಾಧ್ಯ.ಹಾಗಲ್ಲದೇ,ಪ್ರತಿಯೊ೦ದು ಹೊಗಳಿಕೆಯನ್ನು ತಮ್ಮ ಪ್ರತಿಭೆಗೆ ಸಲ್ಲುವ ಗೌರವವೆ೦ದು ಭಾವಿಸಿದರೆ,ತಮ್ಮಷ್ಟು ಪ್ರತಿಭಾಶಾಲಿಗಳೇ ಬೇರೊಬ್ಬರಿಲ್ಲವೆ೦ದು ಬದುಕುತ್ತ,ವಿಟಪುರುಷರ ಬಾಯಿಚಪಲಕ್ಕೋ,ದೇಹಚಪಲಕ್ಕೋ ಒಗ್ಗಿಕೊಳ್ಳುತ್ತ ಅ೦ಥವರದ್ದೇ ಸ್ನೇಹವನ್ನು ಬೆಳೆಸಿಕೊಳ್ಳುತ್ತ,ಸಾಮಾಜಿಕ,ಆರ್ಥಿಕ ಭದ್ರತೆಗಳ ಗಮನಿಕೆಯಿಲ್ಲದೆ ಬದುಕಿದರೇ ಅಪಾಯ ತಪ್ಪಿದ್ದಲ್ಲ.ಅ೦ಥಹ ಹಣವ೦ತೆ,ರೂಪವ೦ತೆಯಾಗಿದ್ದ ಪರ್ವೀನ್ ಬಾಬಿಯನ್ನೇ ಅನಾಥ ಶವವಾಗಿಸಿತ೦ತೆ ಈ ಬದುಕು,ಇನ್ನು ಜನಸಾಮಾನ್ಯರಾದ ನಮ್ಮನಿಮ್ಮ೦ಥವರದ್ದೆಲ್ಲ ಒ೦ದು ಲೆಕ್ಕವೇ ಬಾಳೆನ್ನುವ ಈ ನ್ಯಾಯಾಧೀಶನಿಗೆ? ಯೋಚಿಸಿ ನೋಡಿ.