ಒಡ್ಡೋಲಗ

ಬನ್ನಿರಿ ನೋಡಿರಿ ಆನಂದಿಸಿರಿ

ಪ್ರಚಾರ ಧ್ವನಿವರ್ಧಕದ ವೈಖರಿ|

ಝಗಮಗಿಸುವ ವೇದಿಕೆಯ ನೋಟದೈಸಿರಿ

ಹದಿನಾಲ್ಕು ಲೋಕಗಳ ಸೃಷ್ಟಿಯ ಲಹರಿ||

ಚೆಂಡೆ ಮದ್ದಳೆ ತಾಳಗಳ ಮೋದ

ಭಾಗವತರ ಆಲಾಪನೆಯ ನಿನಾದ|

ಸಂಗೀತ ಪೆಟ್ಟಿಗೆಯ ಶ್ರುತಿಯ ನಾದ

ಶುದ್ಧ ಕನ್ನಡಮ್ಮನ ನುಡಿ ವಾದ||

ರಾಜ ಕಿರೀಟ ಪುಂಡು ವೇಷಗಳ ಪ್ರವೇಶ

ಭಲ್ಲಿರೇನಯ್ಯ ಒಡ್ಡೋಲಗ  ಗತ್ತು ಗಾಂಭೀರ್ಯ|

ಧೀಂಕಿಟ ಕಿಟತಕ ತರಿಕಿಟ ಕಿಟತಕ ಹೆಜ್ಜೆ

ಕರ್ಣಾನಂದವ ನೀಡುವ  ಗೆಜ್ಜೆ ಸುನಾದ||

ಚಕ್ಷುಗಳ ಸೆಳೆಯುವ ವೇಷಭೂಷಣ

ಪದಲಾಲಿತ್ಯದ ಅಪೂರ್ವ ಸಂಗಮ|

ದಪ್ಪ ಮೀಸೆಯ ಹೊತ್ತ ರಕ್ಕಸರ ಗಡಣ

ಕೊಂಬು ಕಹಳೆಯಲಿ ಮಹಿಷನ ಅಬ್ಬರ||

ವಿಚಿತ್ರ ಹೆಜ್ಜೆ ಮೊಗದ ಭಾವದಲಿ

ಬರುವರು ಹಾಸ್ಯ ಉಣಬಡಿಸುತಲಿ/

ಪದಪುಂಜಗಳ ವೈಖರಿಯಲಿ

ತೇಲಿಸುವರು ಸೇರಿಹ ಪ್ರೇಕ್ಷಕರ//

ವೈಯ್ಯಾರದ ಚೆಲುವು ಚಂದ್ರಿಕೆಯರ ನಾಟ್ಯ

ಪುರಾಣ ಇತಿಹಾಸ ಸಂಸ್ಕೃತಿಗಳ ಪ್ರತಿಬಿಂಬ|

ನಮ್ಮ ನೆಲದ ಗಂಡುಕಲೆ ಯಕ್ಷಗಾನ  ಪ್ರದರ್ಶನ

 ತನು ಮನವ ಸೆಳೆವ ಬಲೆ ಉಲ್ಲಾಸದ ಸೆಲೆ||

ರತ್ನಾ ಕೆ.ಭಟ್, ತಲಂಜೇರಿ

ಚಿತ್ರ ಕೃಪೆ: ಇಂಟರ್ನೆಟ್ ತಾಣ