ನದಿ

ಬೆಟ್ಟದ ಬುಡದಲ್ಲಿ ಹುಟ್ಟುತ್ತಾ ಚಿಮ್ಮುತ್ತ

ತೊಟ್ಟಾಗಿ ತೊರೆಯಾಗುತಲಿ

ಪುಟ್ಟ ರೂಪವ ತಾಳಿ ಗೆಳೆಯರ ಪಥದಲ್ಲಿ

ಒಟ್ಟಾಗುತಗಲವಾಗುತಲಿ                    [೧]

ಒಲ್ಲದೆ ಪಥದಲ್ಲಿರುವ ವಸ್ತುಗಳನ್ನು

ಮೆಲ್ಲನೆ ದಡಕೆ ನೂಕುತಲಿ

ಕಲ್ಲು ಮಣ್ಣುಗಳನ್ನು ತೀರದಿ ಹರವುತ್ತ

ಚೆಲ್ಲುತ್ತ ನೀರನಿಕ್ಕಡೆಗೆ                       [೨]

ಹಾರುತ್ತ ಬೀಳುತ್ತಲೇಳುತ್ತಾ ನಲಿಯುತ್ತ

ದಾರಿಯ ಹಸನು ಮಾಡುತ್ತಾ

ವಾರಿಯನು ಪಶುಪಕ್ಷಿಗಳಿಗೆಲ್ಲ  ನೀಡುತ್ತ

ಕಾರುಣ್ಯವನು ತೋರುವುದು                 [೩]

ಮಳೆಗಾಲ ಬಂದರೆ ಕೋಪದಿ ಬುಸುಗುಟ್ಟಿ

ಇಳೆಯನ್ನು ಮುಳುಗಿಸಲೆಳಸಿ

ಬೆಳೆಗಳ ತರುಬುತ್ತ ನಾಶವ ಗೈವುದು

ಪ್ರಳಯ ಕಾಲದ ರುದ್ರನಂತೆ                 [4]

ತಪಿಸುವ  ಬೇಸಗೆಯಲಿ ನೀರುಣಿಸುತ್ತ

ಉಪಕರಿಸುತ್ತಲಿ ಬಳಿಕಾ

ತಪಕೆ ಮೈಯೊಡ್ದುತ ಬಳಲುತ್ತಾ ಮಳೆಗಾಗಿ

ತಪವನ್ನೇ ಮಾಡುತ್ತಲಿಹುದು                 [೫]

ವಿಧಿಯನ್ನು ಮೀರದೆ ಇದುವೇ ಭಾಗ್ಯವು

ಇದುಯೆನ್ನ ಕರ್ತವ್ಯವೆಂದು

ಮುದದಿಂದ ಮುಂದಕ್ಕೆ ಮುಂದುವರಿಯುತ್ತ ಜ

ಲಧಿಯೊಡಗೂಡುತ್ತಲಿಹುದು                  [೬]

        [ಈ ಕವನ ಸಾಂಗತ್ಯ ಛಂದಸ್ಸಿನಲ್ಲಿದೆ .]