ದೀಪದ ನೆರಳ ಬೆಳಕು

ಕತ್ತಲು ಹರಿಯಲು

ಉರಿವ ಹಣತೆಯೇ ಬೇಕಿಲ್ಲ

ಬೆಳಕು ಸೃಜಿಸುವುದು

ಮನದ ಅಂತರ್ ದೃಷ್ಟಿಯಲ್ಲಿ

ಸಾಲು ದೀಪಗಳ ನಡುವೆಯೂ

ಕತ್ತಲ ತುಣುಕುಗಳಿರುತ್ತವೆ

ಬೆಳಗಲಿಚ್ಚಿಸುವ ಎದೆಯೊಳಗೆ

ಕಂದೀಲು ಅವಿತಿರುತ್ತದೆ ;

ಶತ್ರು ಕತ್ತಲಲೂ ಕಾಣಬಹುದು

ವಿದ್ವೇಷಕೆ ಬೆಳಕಿನ ಹಂಗಿಲ್ಲ

ಅಂತ್ಯವೇ ಅಂತಿಮ ಗುರಿಯಾದರೆ

ದೀವಿಗೆಯ ಗೊಡವೆಯೇಕೆ

ಪ್ರೀತಿ ಸೃಜಿಸುವ ಎದೆಯಲ್ಲಿ

ಮುಳ್ಳೂ  ಕುಸುಮಿಸಬಹುದು

ತೆರೆದ ಬಾಹುಗಳ ನಡುವೆ

ಸಂಕೋಲೆಗೆ ಎಡೆಯಿರದು ;

ಕಾರ್ಗತ್ತಲಿನ ನಡಿಗೆಯಲೂ

ಹೆಜ್ಜೆ ಗುರುತಿಸಬಹುದು

ವಿಸ್ಮೃತಿಯ ಚಾದರಗಳಲಿ

ನೆನಪು ಮೊಳೆಯಬಹುದು

ಹಾಲು ಬೆಳಕಿನ ಚಪ್ಪರದಡಿ

ಉರಿವ ಕೆಂಡ ಕಪ್ಪಾಗುತ್ತದೆ

ಸಂವೇದನೆಯ ಹಂದರದಲಿ

ಜಾಲಿಯೂ ನೆರಳಾಗುತ್ತದೆ ;

ಕಳೆದು ಹೋದ ಬೆಳಕಿಗೆ

ಹಣತೆಯೊಂದೇ ಸಾಕ್ಷಿ

ಕಾರ್ಗತ್ತಲ ನಿಗೂಢತೆಗೆ

ಕತ್ತಲೆಯೊಂದೇ ಸಾಕ್ಷಿ

ನೀರಲೆಯ ಮೇಲಿನ ಪ್ರಣತಿಗೆ

ಜಲಚರಗಳಷ್ಟೇ ಸಾಕ್ಷಿ

ಕತ್ತಲೆಯಿಂದ ಬೆಳಕಿನೆಡೆಗೆ

ಮಾನವತೆಯೇ ಅಂತ್ಯಸಾಕ್ಷಿ ;

-ನಾ ದಿವಾಕರ, ಬೆಂಗಳೂರು

ಚಿತ್ರ ಕೃಪೆ: ಇಂಟರ್ನೆಟ್ ತಾಣ