ಪ್ರೀತಿಯೊಳಗಿನ ನೋವು

ನೀನೆ ರಾಧೆಯು ನಾನೆ ಮೋಹನ

ಸನಿಹ ನಿಂತರೆ ಮಧುವನ

ಒಲವ ಚುಂಬನ ಸುತ್ತಲೆಲ್ಲವು

ಬಯಕೆ ತೋಟದಿ ಹೂಮನ

ನೂರು ತಾರೆಯು ಚಂದ್ರ ಬೆಳಕಲಿ

ನಾಚಿ ದೂರಕೆ ನಿಲ್ಲಲು

ಬರಲು ಹತ್ತಿರ ಮೋಹ ಸುತ್ತಲು

ಕೈಯ ಹಿಡಿಯುತ ಸಾಗಲು

ಮೈಯ ವರ್ಣಕೆ ತುಂಬು ಯೌವನ

ಬಳುಕಿ ನಿಲ್ಲುತ ಅಪ್ಪಲು

ಮದನ ಬೆಸುಗೆಗೆ ರತಿಯ ರೀತಿಯೆ

ಮಧುವ ಚೆಲ್ಲುತ ರಮಿಸಲು

ಜಲದ ಹೊಳಪಿಗೆ ನಿನ್ನ ಕಂಗಳು

ನನ್ನ ನೋಡುತ ನಗುತಿವೆ

ರಾತ್ರೆಯಾಗುತ ತಂಪ ಚೆಲ್ಲಿದೆ

ಸುಖದ ಮತ್ತಲಿ ತೇಲಿವೆ

ಪ್ರೀತಿ ಆಸರೆ ಹೀಗೆ ಸಿಗುತಿರೆ

ಸವಿಯು ಏಳಿಗೆ ಕಾಣಲಿ

ಬಾಳ ಪಯಣದಿ ಹೂವ ಹಾಸಿಗೆ

ನೋವ ಮರೆಯುತ ಹಾಡಲಿ

***

ಮುಂದಿನ ಪಯಣ

ಬಾಳಿನ ನೆಮ್ಮದಿ ದೂರದಿ ನಿಂತಿದೆ

ಕಾಣದೆ ಹೋಗಿದೆ ಹುರುಪೆ

ಜೀವನ ಪಯಣದಿ ಗೆಲುವದು ಇಲ್ಲದೆ

ಸೋಲುತ ಸಾಗಿದೆ ಬದುಕೆ

ಮಾತಿನ ಚಕಮಕಿ ಮನೆಯೊಳು ತುಂಬುತ

ಮನದಲಿ ಶಾಂತಿಯು ಸವೆಯೆ

ಕರುಣೆಯ ಹೊಸಿಲದು ಸಿಡುಕಲಿ ಹೊತ್ತುತ

ಹೃದಯದ ಒಲವದು ಕರಗೆ

ಕೈಯನು ಹಿಡಿದಿಹ ತಪ್ಪಿಗೆ ಮರುಗುತ

ನೆಮ್ಮದಿ ಹೋಗುತ ಮಲಗೆ

ಸ್ನೇಹದ ಪಲ್ಲವಿ ಮೌನಕೆ ಜಾರುತ

ಚಾಡಿಯು ಬೆನ್ನಿಗೆ ಬಡಿಯೆ

ಹೊಂದಿಕೆ ಮುರುಟುತ ಸಂಶಯ ಮೂಡಲು

ಹಿಂಬದಿ ಬಾಗಿಲು ತೆರೆಯೆ

ನವಿರಿನ ಭಾವನೆ ಸುಡುತಲಿ ಸಾಗಲು

ಮುಂದಿನ ಜನುಮಕೆ ನಡೆದೆ

-ಹಾ ಮ ಸತೀಶ ಬೆಂಗಳೂರು

ಚಿತ್ರ ಕೃಪೆ: ಇಂಟರ್ನೆಟ್ ತಾಣ