ಮಳೆ ಹನಿ

ಮಳೆ ಹನಿ

ತುಸು ಮಣ್ಣ ಬಿಸಿ ನೆಲಕೆ
ಬರಡಾದ ಬಡ ಮನಕೆ
ಕುದಿಯುತಿಹ ಇಳೆ ತಳಕೆ
ಪ್ರೀತಿ ಹೊನಲಿನ ದಡಕೆ
ಸಾಯುತಿಹ ಮರಿ ಮೊಳಕೆ
ಬಿಸಿಲ ಬೇಗೆಯ ಝಳಕೆ
ಎಲ್ಲರಲೂ ಬತ್ತಿಹುದು
ಮಳೆ ಹನಿಯ ಬಯಕೆ.

ಬಿಸಿಲ ರಶ್ಮಿಯ ಬಿಸಿಗೆ
ಹಸಿರು ಚಿಗುರಿದ ಎಲೆಗೆ
ಅಡಗಲಾಗದು ಹೊರಗೆ
ತವಿಸಲಾಗದು ಬೇಗೆ
ಕುಸಿದ ಕನಸಿನ ಕೆಳಗೆ
ದೂರ ಮನಗಳ ಬೆಸುಗೆ
ಕೊನೆಯುಸಿರು ಕಾಯುವುದೆ
ತಣ್ಣನೆಯ ಮಳೆಗೆ.

ಜೀವವನೆ ಮರೆತಿತ್ತು
ಚಿಪ್ಪಿನೊಳಗಣ ಮುತ್ತು
ಕನಸು ಕಣ್ಣೊಳಗಿತ್ತು
ಮನಸುಗಳು ಸೋತಿತ್ತು
ಬತ್ತಿ ಬರಡಾಗಿತ್ತು
ಹಸಿರು ಕುಂದುತಲಿತ್ತು
ದೂರದಲೆ ಉಳಿದಿತ್ತು
ಹನಿ ಮಳೆಯ ಮುತ್ತು.