ರಸ-ವಿರಸ

ಸಂಜೆಗತ್ತಲು ಕವಿಯೆ

ಸುಳಿದು ಬಹ ತಂಗಾಳಿ

ವೀಣೆಯಿನಿದನಿಯನನುಕರಿಸುತಿಹುದು

ಜೀರುಂಡೆ ಕೊರೆತವನು

ಮೀರಿಸುತ ಮರದಲ್ಲಿ

ಬಾವಲಿಯ ಗುಂಪು ಕಲಕಲಗೈವುದು      [೧]

ಒಳ ಮನೆಯ ಕತ್ತಲಲಿ

ತಾಯ ಜೋಗುಳ ಹಾಡು

ಪಸರಿಸಿದೆ ಗೃಹವ ಸಂಗೀತದಂತೆ

ಹಠ ಬಿಡದ ಹಸುಗೂಸು

ಕೈಕಾಲ ಫಡಫಡಿಸಿ

ತೊಟ್ಟಿಲನು ತುಳಿಯುತಿದೆ ತಾಳದಂತೆ   [೨]

ದೂರದಿಂ ಕೇಳುತಿದೆ

ಯಕ್ಷಗಾನದ ಪದ್ಯ

ಸುರಿಯುತಿಹ ಮಳೆಯ ಅಬ್ಬರದ ಹಾಗೆ

ಅರ್ಥಕ್ಕೆ ತಲೆದೂಗಿ

ಹೂಮ್ಗುಡಲು ಭಾಗವತ

ಸೇರಿಸುತ್ತಿದೆ ತನ್ನ ದನಿಯ ಗೂಗೆ!       [೩]

ಬೆಳಕಿನೊಂದಿಗೆ ತಮವು

ಹೂವಿನೊಡನಿದೆ  ಮುಳ್ಳು

ಜೀವನದಿ ಸುಖ-ದುಃಖವಿರಲೆಬೇಕು

ಇದನರಿತು ನಾವೆಲ್ಲ

ಸಿಹಿಕಹಿಯ ಸಮಗೊಳಿಸಿ

ಸಮರಸದ ಸಹಬಾಳ್ವೆ ನಡೆಸಬೇಕು      [೪]