ಅವಾಂತರ - (ಕಥೆ)

ಹಲೋ....ಹಲೋ...ಲೋ..ಲೋ...ಮಧು ಏನೋ ಆಗಿಂದ ಮೂರು ಸಲ ಕರೆಯುತ್ತಿದ್ದೇನೆ. ಒಳ್ಳೆ ಕಿವುಡನ ಹಾಗೆ ಕೂತಿದ್ದೀಯ. ಯಾಕೋ ಏನಾಯ್ತೋ?

ನಾನು ಐದಾರು ದಿನದಿಂದ ನೋಡ್ತಾ ಇದೀನಿ. ಒಂಥರಾ ಇದ್ದೀಯ? ಯಾಕೋ ಹುಷಾರಿಲ್ವಾ?

ಇಲ್ಲ ಹರಿ...ಹಾಗೇನಿಲ್ಲ ಕಣೋ. ಐದು ದಿನ ಆಯ್ತು ಪೂರ್ವಿ ಇಂದ ಒಂದು ಫೋನ್ ಸಹ ಇಲ್ಲ. ಫೋನ್ ಮಾಡಿದ್ರೆ ಸ್ವಿಚ್ ಆಫ್ ಅಂತ ಬರ್ತಿದೆ, ಅವಳು ಆಫೀಸಿಗೂ ಬರುತ್ತಿಲ್ಲ. ಏನಾಯ್ತೋ ಏನೋ ಒಂದೂ ಅರ್ಥ ಆಗದೆ ತಲೆ ಕೆಟ್ಟು ಹೋಗಿದೆ ಕಣೋ.

ಹೋಗಲಿ ಅವಳ ಟೀಮ್ನಲ್ಲಿ ಕೇಳೋಣ ಅಂದ್ರೆ ಅಲ್ಲಿ ಯಾರೂ ನನಗೆ ಪರಿಚಯದವರು ಇಲ್ಲ. ಅವಳ ಮನೆಯ ಅಡ್ರೆಸ್ಸೂ ಅವಳು ಕೊಟ್ಟಿಲ್ಲ ಕಣೋ. ಹಿಂದೊಮ್ಮೆ ಕೊಡು ಎಂದಿದ್ದಕ್ಕೆ ಸಮಯ ಬಂದಾಗ ಮನೆಗೆ ಕರೆದುಕೊಂಡು ಹೋಗುತ್ತೀನಿ ಎಂದಿದ್ದಳು.ಥೂ...ನನಗೆ ಯಾಕೋ ಮನಸೇ ಸರಿ ಇಲ್ಲ ಕಣೋ. ಅವಳು ನನ್ನನ್ನು ಪ್ರೀತಿಸಲು ಶುರು ಮಾಡಿ ಆರೇಳು ತಿಂಗಳಾಗಿದೆ. ಯಾವತ್ತೂ ಹೀಗೆ ಆಗಿರಲಿಲ್ಲ.

ಪ್ರತಿದಿನ ಕನಿಷ್ಠ ಪಕ್ಷ ಏನಿಲ್ಲ ಅಂದರೂ ಹತ್ತರಿಂದ ಇಪ್ಪತ್ತು ಸಲ ಫೋನ್ ಮಾಡುತ್ತಿದ್ದವಳು ಈಗ ಐದು ದಿನವಾದರೂ ಫೋನಿಲ್ಲ. ಯಾರಾದರೂ ಸ್ನೇಹಿತರ ಮನೆಗೋ, ಬಂಧುಗಳ ಮನೆಗೆ ಹೋಗಬೇಕಾದರೂ ನನಗೆ ಫೋನ್ ಮಾಡಿ ಹೇಳುತ್ತಿದ್ದವಳು ಈಗ ಎಲ್ಲಿ ಹೋಗಿದ್ದಾಳೋ, ಹರಿ ಈಗ ಏನು ಮಾಡುವುದು?

ಮಧು ನೀನು ಲಾಸ್ಟ್ ಅವಳ ಜೊತೆ ಮಾತಾಡಿದ್ದು ಯಾವತ್ತು?

ಹರಿ, ಐದಾರು ದಿನದ ಹಿಂದೆ ಹಾ...ಕರೆಕ್ಟ್ ಅವತ್ತು ಆಗಸ್ಟ್ 14, ಮರುದಿನ ಸ್ವಾತಂತ್ರ್ಯ ದಿನಾಚರಣೆ ರಜೆ ಇತ್ತು. ರಾತ್ರಿ ಊಟ ಆದ ನಂತರ ಮಾಮೂಲಿನಂತೆ ಸುಮಾರು ಒಂದು ಘಂಟೆ ಮಾತನಾಡಿ ಫೋನ್ ಇಟ್ಟೆವು. ಮರುದಿನ ಪೂರ್ತಿ ಮನೆಯವರ ಜೊತೆ ಆಚೆ ಹೋಗುತ್ತೇನೆ ಫೋನಿನಲ್ಲಿ ಮಾತಾಡಲು ಆಗುವುದಿಲ್ಲ ಎಂದಿದ್ದಳು. ಆದರೆ ಮರುದಿನದಿಂದಲೇ ಅವಳ ಫೋನ್ ಆಫ್ ಬರುತ್ತಿದೆ.

ಹೇ ಮಧು...ಹೌದು ನೀನು ಯಾವಾಗಲೂ ಪೂರ್ವಿ ಜೊತೆ ಫೇಸ್ಬುಕ್ ನಲ್ಲಿ ಚಾಟ್ ಮಾಡುತ್ತಿದ್ದೆ ಅಲ್ವ...ಅಲ್ಲಿ ಟ್ರೈ ಮಾಡಿ ನೋಡು ಅವಳನ್ನು ಸಂಪರ್ಕಿಸಲು.

ಹೌದು ಹರಿ...ಆದರೆ ಅದೇನೋ ಗೊತ್ತಿಲ್ಲ ಅದೇ ದಿನದಿಂದ ಅವಳ ಪ್ರೊಫೈಲ್  ಫೇಸ್ಬುಕ್ ನಲ್ಲೂ ಕಾಣುತ್ತಿಲ್ಲ.

ಹೌದಾ, ಅಂದರೆ ಅವಳು ನಿನ್ನ ಪ್ರೊಫೈಲನ್ನು ಡಿಲೀಟ್ ಮಾಡಿದ್ದಾಳ?

ಅದು ಸಾಧ್ಯವೇ ಇಲ್ಲ ಹರಿ...ಅವಳೇಕೆ ನನ್ನ ಪ್ರೊಫೈಲನ್ನು ಡಿಲೀಟ್ ಮಾಡುತ್ತಾಳೆ? ನಮ್ಮಿಬ್ಬರ ನಡುವೆ ಯಾವುದೇ ಜಗಳ ಆಗಿಲ್ಲ...ಏನೂ ಇಲ್ಲ...ಹರಿ ಏನೋ ಯಡವಟ್ ಆಗಿದೆ ಎನಿಸುತ್ತಿದೆ ಕಣೋ...ಬಹುಶಃ ಅವರ ಮನೆಯಲ್ಲಿ  ಅವಳಿಗೆ ಮದುವೆ ಏನಾದರೂ ಮಾಡಿಬಿಟ್ಟಿದ್ದಾರ? ಹರಿ ಹಾಗೇನಾದರೂ ಆದರೆ ನಾನು ಜೀವಂತವಾಗಿ ಉಳಿಯಲ್ಲ.

ಲೇ ಹುಚ್ಚು ಹುಚ್ಚಾಗಿ ಮಾತಾಡಬೇಡ. ಮೊದಲು ಅವಳು ಯಾವ ಟೀಮ್ ಹೇಳು.

ಅವಳು ಇನ್ಸೂರೆನ್ಸ್ ಟೀಮಿನಲ್ಲಿ ಇದಾಳೆ ಕಣೋ.

ಓಹ್ ಓಕೆ..ಅಲ್ಲಿ ನನಗೆ ಪರಿಚಯ ಇರುವ ವ್ಯಕ್ತಿ ಒಬ್ಬನಿದ್ದಾನೆ. ಅವನ ಬಳಿ ಕೇಳಿ ತಿಳಿದುಕೊಂಡು ನಾನು ನಿನಗೆ ತಿಳಿಸುತ್ತೇನೆ. ನೀನು ಇಲ್ಲೇ ಇರು.

ಅರ್ಧಗಂಟೆಯ ನಂತರ.

ಮಧು...ಮಧು...ಸಾರಿ...ಬ್ಯಾಡ್ ನ್ಯೂಸ್ ಕಣೋ....

ಹರಿ...ನನಗೆ ಗೊತ್ತಿತ್ತು ಕಣೋ ಅವಳಿಗೆ ಬೇರೆ ಹುಡುಗನ ಜೊತೆ ಮದುವೆ ಮಾಡಿರುತ್ತಾರೆ ಎಂದು. ಛೇ...ನನ್ನ ಅನುಮಾನ ನಿಜ ಆಗೋಯ್ತು ಕಣೋ...

ಮಧು ಅದಲ್ಲ ಕಣೋ...ಅದು ಆಗಸ್ಟ್ 15 ರಂದು ಬೆಳಿಗ್ಗೆ ಅವರ ತಾಯಿ ಹೋಗಿಬಿಟ್ಟರಂತೆ ಕಣೋ. ಅದಕ್ಕೆ ಅವಳು ಆಫೀಸಿಗೆ ಬರುತ್ತಿಲ್ಲವಂತೆ. ನಾಳೆಯಿಂದ ಬರುತ್ತಾಳೆ. ಆದರೆ ಅದಕ್ಕೂ ನಿನ್ನ ಜೊತೆ ಮಾತಾಡದಿರುವುದಕ್ಕೂ ಏನು ಸಂಬಂಧ ಎಂದು ಅರ್ಥವಾಗುತ್ತಿಲ್ಲ.

ಓಹ್ ಹೌದಾ....ಅವಳು ನನಗೆ ವಿಷಯವನ್ನೂ ತಿಳಿಸಿಲ್ಲವಲ್ಲೋ....ಅವತ್ತು ಬೇಡ ಬಿಡು...ಅವಳು ದುಃಖದಲ್ಲಿರುತ್ತಾಳೆ ಆದರೆ...ಮರುದಿನವಾದರೂ ತಿಳಿಸಬಹುದಿತ್ತು....ಬಿಡು ಹೇಗಿದ್ದರೂ ನಾಳೆ ಬರುತ್ತಾಳಲ್ಲ ಆಗಲೇ ಮಾತಾಡುತ್ತೇನೆ.

ಮರುದಿನ....ಮಧ್ಯಾಹ್ನ ಊಟದ ಸಮಯ...ಸ್ಥಳ ಆಫೀಸ್ ಕ್ಯಾಂಟೀನ್

ಹಾಯ್ ಪೂರ್ವಿ...ಇವನ ಮಾತನ್ನು ಕೇಳಿಯೂ ಕೇಳದಂತೆ ಸುಮ್ಮನೆ ಊಟ ಮಾಡುತ್ತಿದ್ದಳು.

ಪೂರ್ವಿ...ಸಾರಿ ನಿಮ್ಮ ತಾಯಿ ಹೋಗಿಬಿಟ್ಟರಂತೆ. ನನಗೆ ನೆನ್ನೆ ತಾನೇ ವಿಷಯ ಗೊತ್ತಾಯ್ತು...ಐ ಆಮ್ ವೆರಿ ಸಾರಿ ಫಾರ್ ದಟ್..

ಏನು....ನೆನ್ನೆ ನಿನಗೆ ಗೊತ್ತಾಯ್ತ? ಆ ಮಾತು ಹೇಳುವುದಕ್ಕೆ ನಾಚಿಕೆ ಆಗುವುದಿಲ್ವ ಎಂದು ಮುಖ ಸಿಂಡರಿಸಿಕೊಂಡು ಅಲ್ಲಿಂದ ಎದ್ದು ಕೈ ತೊಳೆದುಕೊಳ್ಳಲು ಹೋದಳು. ಮಧುವಿಗೆ ಮುಖಕ್ಕೆ ಹೊಡೆದ ಹಾಗಾಗಿ...ಅವಳ ಹಿಂದೆಯೇ ಹೋದ.

ಪೂರ್ವಿ...ಪ್ಲೀಸ್ ನನಗೊಂದೂ ಅರ್ಥ ಆಗುತ್ತಿಲ್ಲ. ಹದಿನೈದನೆ ತಾರೀಖಿನಿಂದ ನಿನ್ನ ಫೋನ್ ಆಫ್ ಎಂದು ಬರುತ್ತಿದೆ, ಫೇಸ್ಬುಕ್ನಲ್ಲೂ ನೀನು ಸಿಗಲಿಲ್ಲ ನನಗೆ ವಿಷಯ ಗೊತ್ತಾಗಿದ್ದೆ ನೆನ್ನೆ. ಅದೂ ಸಹ ನನ್ನ ಸ್ನೇಹಿತ ಹರಿ ನಿಮ್ಮ ಟೀಮ್ ಮೇಟ್ ಬಳಿ ವಿಚಾರಿಸಿದ ಮೇಲೆಯೇ ಗೊತ್ತಾಗಿದ್ದು. ಆದರೆ ನೀನು ನೋಡಿದರೆ ಹೀಗೆ ಹೇಳುತ್ತಿದ್ದೀಯ? ಪ್ಲೀಸ್ ಪೂರ್ವಿ ನನಗೆ ಎಲ್ಲ ಗೊಂದಲಮಯವಾಗಿದೆ. ನನ್ನಿಂದ ಏನಾದರೂ ತಪ್ಪಾಗಿದ್ದರೆ ತಿಳಿಸು.

ಮಧು...ನಿಜವಾಗಿಯೂ ನಿನಗೆ ನಿನ್ನ ತಪ್ಪು ಗೊತ್ತಿಲ್ಲ್ವ? ಬಾ ನಿನ್ನ ತಪ್ಪು ಏನೆಂದು ತೋರಿಸುತ್ತೇನೆ...ಎಂದು ತನ್ನ ಲ್ಯಾಪ್ ಟಾಪ್ ಓಪನ್ ಮಾಡಿ ಫೇಸ್ಬುಕ್ ಓಪನ್ ಮಾಡಿ ಐದು ದಿನದ ಹಿಂದೆ ಅವಳು ಹಾಕಿದ್ದ ಸ್ಟೇಟಸ್ ಅನ್ನು ತೋರಿಸಿದಳು. "Today is the most sad day in my life, my mother passed away this morning". ನೋಡು ಮಧು ಈಗಲಾದರೂ ಗೊತ್ತಾಯ್ತ ನಿನ್ನ ತಪ್ಪೇನೆಂದು?

ಪೂರ್ವಿ ನಿಜ ಹೇಳಬೇಕೆಂದರೆ ಈಗಲೂ ನನ್ನ ತಪ್ಪೇನೆಂದು ಅರ್ಥವಾಗುತ್ತಿಲ್ಲ. ಹೌದು ನೀನು ನನ್ನ ಪ್ರೊಫೈಲನ್ನು ಡಿಲೀಟ್ ಮಾಡಿದ್ದೀಯ?

ಮಧು ಡಿಲೀಟ್ ಮಾಡದೆ ಇನ್ನೇನು ಮಾಡಬೇಕಿತ್ತು? ನಾನು ಅಂಥಹ ಸ್ಟೇಟಸ್ ಹಾಕಿದ್ದರೂ ಅದನ್ನೂ "ಲೈಕ್" ಮಾಡಿದ್ದೀಯಲ್ಲ..ನಿನಗೆ ಮನಸಾದರೂ ಹೇಗೆ ಬಂತು?

ಆಗ ಮಧುಗೆ ಜ್ಞಾನೋದಯವಾಯಿತು. ಅವನು ಮಧು ಏನು ಪೋಸ್ಟ್ ಮಾಡಿದರೂ ಅದನ್ನು ಹಿಂದೂ ಮುಂದು ನೋಡದೆ ಲೈಕ್ ಮಾಡುತ್ತಿದ್ದ. ಈಗಲೂ ಅದೇ ತಪ್ಪು ಮಾಡಿದ್ದ. ನಂತರ ಅವಳಿಗೆ ತನ್ನ ತಪ್ಪಿನ ಅರಿವನ್ನು ತಿಳಿಸಿ ಇನ್ನು  ಮುಂದೆ ಯಾವುದೇ ಆಗಲಿ, ಯಾರದೇ ಆಗಲಿ ಪೋಸ್ಟನ್ನು ಓದದೆ ಅಪ್ಪಿ ತಪ್ಪಿ ಲೈಕ್ ಮಾಡುವುದಿಲ್ಲ ಎಂದು ತಿಳಿಸಿದ ಮೇಲೆ ಪೂರ್ವಿ ಸಮಾಧಾನವಾದಳು.