ಅಭಿಜ್ಞಾ ಗೌಡ ಅವರ ಭಾವಗೀತೆ

ಮನದಭಾವದ ಮಿಳಿತ

ಭಾವದ ವೀಣೆಯು ಮೀಟಿದೆ ಹೃದಯದಿ

ಜೀವದ ತಾಣದ ಅಂಗಳದಿ

ತಾಯಿಯ ಮಡಿಲಲಿ ಕುಣಿದಿಹ ಬಂಧದಿ

ನಾನಾ ನೀನಾ ಗೊಂದಲದಿ||

ದಿವ್ಯತೆ ತೇರಲಿ ಸಾಗಿದೆ ಕನಸದು

ಭವ್ಯತೆ ನಾಡಲಿ ಚಿಗುರುತಿದೆ

ನವ್ಯತೆ ಕಾವ್ಯದ ವಿಶೇಷ ವಿಸ್ಮಯ

ಗಮ್ಯತೆಯಿಂದಲೆ ಮೆರೆಯುತಿದೆ||

ಪದವನು ಕಟ್ಟುತ ರಾಗವ ಹಾಕುತ

ಕದವನು ತಟ್ಟುತ ಹೊಮ್ಮುತಿದೆ

ವದನದ ಖುಷಿಯಲಿ ಚಿಮ್ಮಿದೆ ಸಂತಸ

ಮದನನ ರೂಪ ಚೆಲ್ಲುತಿದೆ||

ವೀಣೆಯ ನಾದದ ಮಿಡಿತದ ಸೊಬಗದು

ವಾಣಿಯ ಪರಿಯದು ಪಸರಿಸಿದೆ

ಕಾಣದ ಭಾವದ ತುಡಿತದ ಬೆರಗದು

ರಾಣಿಯ ಸೊಗಸನು ಹೆಚ್ಚಿಸಿದೆ||

ಹೃನ್ಮನ ಸೆಳೆದಿಹ ಭಾವದ ಮೇಳವು

ತನ್ಮಯಳಂತೆಯೆ ಕುಳಿತಿರುವೆ

ವಿಸ್ಮಯ ಸಿರಿಯದು ಭಾತಿಯ ತಾಳವು

ಕಣ್ಮನ ತುಂಬುತ ನಿಂತಿರುವೆ||

ಪ್ರಕೃತಿಯ ತಾವಡಿ ಮನಸಿಗೆ ತಂದಿದೆ

ಸುಕೃತಿ ಕಾಯಕ ಮಾಡುತಲಿ

ವಿಕೃತಿಯ ಹೆದರಿಸಿ ಧೃತಿಯನು ಹೆಚ್ಚಿಸಿ

ಆಕೃತಿ ರಾಗದಿ ಬೆಸೆಯುತಲಿ||

-ಅಭಿಜ್ಞಾ ಪಿ ಎಮ್ ಗೌಡ