ಎರಡು ಜಾನಪದ ಗೀತೆಗಳು

ಪ್ರೀತಿಯ ಅಕ್ಕ

ಅಕ್ಕನ ಗುಡಿಯದು ಬಕ್ಕುಡಿ ಕಂಡೈತಿ

ಪಕ್ಕದ ಮನೆಯ ಸೊಬಗು|ನೋಡುತ||

ಚಕ್ಕನೆ ಬಂದು ಹೋಗ್ಯಾಳಾ||

ತಂದಳು ಹೂವನು ಬಂದಳು ಕೇರಿಗೆ

ಚಂದದ ಪುಷ್ಪ ಘಮಘಮ|ಬೀಸ್ಯಾವ|

ಚಂದಿರ ಬಾನೊಳು ಹರಡ್ಯಾವ||

ಚೆಲುವಿನ ರೂಪಸಿ ಒಲವಿನ ಷೋಡಶಿ

ಪಿಳಪಿಳ ಕಣ್ಣ ಬಿಟ್ಯಾಳಾ|ನೋಡ್ಯಾವ|

ಥಳಥಳ ಮಿಂಚಿ ನಿಂತ್ಯಾಳಾ||

ಸೊಬಗಿನ ವದನದ ವಿಭವದಿ ಮೆರೆಯುತ

ಕಬರಿನ ಚೆಲ್ಲಿ ನಾಚುತ|ಮಲ್ಲಿಯು|

ನಭವನು ನೋಡಿ ಕುಂತ್ಯಾಳಾ|| 

ಹಸಿರಿನ ಸೀರೆಯು ಖುಷಿಯಲಿ ಹುಟ್ಟಳು

ನಸುನಗು ನಾಚಿ ಚಿಮ್ಮುತ|ಹೊಮ್ಮುತ|

ಹೊಸತನ ಮೆರಗು ಕಂಡ್ಯಾಳಾ||

ಅಮ್ಮನ ಪ್ರೀತಿಯು ಬಿಮ್ಮನೆ ನೀಡುತ

ಸುಮ್ಮನೆ ನಿಂತು ನೋಡ್ಯಾಳಾ|ಅಕ್ಕಳು|

ಕಮ್ಮನೆ ಬೀರಿ ಹೊಳೆದ್ಯಾಳಾ||

********

ತವರುಮನೆ

ತವರೂರ ಸಿರಿಗಾಗಿ ತವಕದಿ ಕಾಯುತ

ದವನದ ಗಂಧ ಸೂಸೈತಿ|ನೋಡವ್ವ|

ಭವನದ ಮುಂದೆ ನಿಂತೈತಿ||

ಅಣ್ಣನ ನೆನಪಾಗಿ ಬಣ್ಣದ ಕನಸೊಂದು

ಚಿಣ್ಣರ ಆಟ ಥಕಥೈತ|ತಾರವ್ವ|

ಬೆಣ್ಣೆಯ ಮಾತು ನುಡಿದೈತಿ||

ಅಪ್ಪನ ಹೆಗಲಲಿ ತೆಪ್ಪನೆ ಕುಳಿತಿದೆ

ಕಪ್ಪನೆ ಹಸುವ ಹಾಲದು|ಸವಿದಿದ್ದೆ|

ಬೊಪ್ಪನ ನಡೆಯು ಚಂದೈತಿ||

ಹಳ್ಳಿಯ ಸೊಗಡು ಬಳ್ಳಿಯ ಮರದಲಿ

ಮಳ್ಳಿಯ ಹಾಗೆ ಬರುತಿದ್ದೆ|ಬಾರವ್ವ|

ತಳ್ಳುತ ಗಾಡಿ ಸಾಗೈತಿ||

ಹೊಲದಲಿ ಹಸಿರಿನ ಕಲೆಯದು ಮೆರೆದಿದೆ

ಚೆಲುವಿನ ರಾಗ ಹಾಡುತ|ಕಾಣವ್ವ|

ಒಲವಿನ ಹಸಿರು ಕುಣಿದೈತಿ||

ಸಂಜೆಯ ಹೊತ್ತಲ್ಲಿ ಮಂಜಿನ ಹನಿಯಲಿ

ಗಂಜಿಯ ಕುಡಿದು ಆಡ್ತಿದ್ದೆ|ಕೂಗವ್ವ|

ನಂಜಿನ ಬೆಳಕು ಕವಿದೈತಿ||

ಗಂಡನ ಮನೆಯಲಿ ಬಂಡಿಯ ಹೂಡ್ಯಾಳು

ಕಂಡ್ಯಾಳು ತವರ ಸಿರಿಯನು|ನಿಲ್ಲವ್ವ||

ಬಂಡೆಯ ಹತ್ತಿ ನಡಿತ್ತೈತಿ||

-ಅಭಿಜ್ಞಾ ಪಿ ಎಮ್ ಗೌಡ