ಎಲ್ಲರು ಒಂದಾಗೋಣ...

ಶಾಲೆಗೆ ಹೋಗೋಣ ತಂಗವ್ವಾ

ಶಾಲೆಗೆ ಹೋಗೋಣ/

ಶಾಲೆಗೆ ಹೋಗಿ ಪಾಠವ ಕಲಿತು

ಜಾಣರಾಗೋಣ ತಂಗವ್ವಾ

ಜಾಣರಾಗೋಣ//

ಹೊಲಕೆ ಹೋಗೋಣ ಅಣ್ಣಯ್ಯಾ

ಹೊಲಕೆ ಹೋಗೋಣ/

ಹೊಲಕೆ ಹೋಗಿ ಉತ್ತು ಬಿತ್ತಿ 

ಕಳೆಯನು ಕೀಳೋಣ  ಅಣ್ಣಯ್ಯಾ

ಕಳೆಯನು ಕೀಳೋಣ//

ಹಟ್ಟಿಗೆ ಹೋಗೋಣ ಅಕ್ಕಯ್ಯಾ

ಹಟ್ಟಿಗೆ ಹೋಗೋಣ/

ಹಟ್ಟಿಗೆ ಹೋಗಿ ಹಾಲನು ಹಿಂಡಿ

ಸೆಗಣಿ ಬಾಚೋಣ ಅಕ್ಕಯ್ಯಾ

ಸೆಗಣಿ ಬಾಚೋಣ//

ಊಟಕೆ  ಹೋಗೋಣ ಅಪ್ಪಯ್ಯಾ

ಊಟಕೆ ಹೋಗೋಣ/

ದೇವರ ನೆನೆಯುತ ಊಟವ ಮಾಡುತ

ಸಂತಸ ಪಡೆಯೋಣ ಅಪ್ಪಯ್ಯಾ

ಸಂತಸ ಪಡೆಯೋಣ//

ಭೂಮಿ ತಾಯಿಯ ಮಕ್ಕಳು ನಾವು

ತಾಯಿಯ ಋಣವನು ತೀರಿಸಲಾರೆವು/

ಎಷ್ಟೋ ಜನುಮದ ಪುಣ್ಯವು ನಮ್ಮದು

ಬಾಳಲ್ಲಿ ಎಲ್ಲರು ಒಂದಾಗೋಣ//

-ರತ್ನಾ ಕೆ.ಭಟ್, ತಲಂಜೇರಿ

ಚಿತ್ರ ಕೃಪೆ: ಇಂಟರ್ನೆಟ್