ಐಪ್ಯಾಡ್‌ಗೆ ಚೀನೀ ಉತ್ತರ:ಲೀಪ್ಯಾಡ್
ಐಪ್ಯಾಡ್‌ಗೆ ಚೀನೀ ಉತ್ತರ:ಲೀಪ್ಯಾಡ್
ಆಪಲ್ ಕಂಪೆನಿಯ ಐಪ್ಯಾಡ್ ಒಂದು ವರ್ಷದಲ್ಲಿ ಒಂದೂವರೆ ಕೋಟಿಯಷ್ಟು ಮಾರಾಟವಾಗಿ ದಾಖಲೆ ನಿರ್ಮಿಸಿದೆ.ಲೆನೊವೋ ಕಂಪೆನಿಯು ಚೀನಾದಲ್ಲಿ ಇಂತಹ ಸಾಧನದ ಮಾರುಕಟ್ಟೆಯಲ್ಲಿ ಪಾಲು ಪಡೆಯಲು ಯೋಜಿಸಿ,ಲೀಪ್ಯಾಡ್ ಸಾಧನವನ್ನು ಬಿಡುಗಡೆ ಮಾಡುವುದರಲ್ಲಿದೆ.ಇದು ಐಪ್ಯಾಡಿಗೆ ಹೋಲಿಸಿದರೆ,ಮುನ್ನೂರು ಡಾಲರು ಅಗ್ಗ-ಐನೂರ ಮೂವತ್ತಮೂರು ಡಾಲರು ಬೆಲೆಯಲ್ಲಿ ಸಿಗಲಿದೆ.ವೈ-ಫೈ ಮತ್ತು ತ್ರೀಜಿ ಹೀಗೆ ಎರಡು ವಿಧದ ಆವೃತ್ತಿಗಳೂ ಲಭ್ಯವಾಗಲಿವೆ.ಸದ್ಯಕ್ಕೆ ಚೀನೀ ಮಾರುಕಟ್ಟೆಯ ಮೇಲೇ ಗಮನ ಹರಿಸುವುದು ಕಂಪೆನಿಯ ಲೆಕ್ಕಾಚಾರ-ನಂತರ ಇತರೆಡೆಯೂ ಸಾಧನ ಲಭ್ಯವಾಗಬಹುದು.ಲೀಪ್ಯಾಡಿನಲ್ಲಿ ಆಂಡ್ರಾಯಿಡ್ ವ್ಯವಸ್ಥೆ ಬಳಕೆಯಾಗಲಿದೆ.ಚೀನಾದಲ್ಲಿ ಒಂದು ದಶಲಕ್ಷ ಐಪ್ಯಾಡುಗಳ ಮಾರಾಟವಾಗಿರಬಹುದು ಎನ್ನುವ ಅಂದಾಜಿದೆ.ಈಗ ಬಳಕೆದಾರರಿಗೆ ಅಗ್ಗದ ಸಾಧನ ದೊರಕಿ,ಆವರಿಗೆ ಹೆಚ್ಚಿನ ಆಯ್ಕೆ ದೊರಕಲಿದೆ.
------------------------------------
ಆಂಡ್ರಾಯಿಡ್:ಟಾಪ್
ಕಂಪ್ಯೂಟರುಗಳ ಮಟ್ಟಿಗೆ ವಿಂಡೋಸ್ ಆಪರೇಟಿಂಗ್ ವ್ಯವಸ್ಥೆ ಅತಿ ಜನಪ್ರಿಯವಾದಂತೆ,ಮೊಬೈಲ್ ಸಾಧನಗಳ ಮಟ್ಟಿಗೆ ಆಂಡ್ರಾಯಿಡ್ ತಂತ್ರಾಂಶವು ನಿರ್ವಹಣಾ ವ್ಯವಸ್ಥೆ ತಂತ್ರಾಂಶವಾಗಿ ಬಳಕೆಯಾಗುವ ಲಕ್ಷಣವಿದೆ.ಹೆಚ್ಚಿನೆಲ್ಲಾ ಹ್ಯಾಂಡ್‌ಸೆಟ್ ತಯಾರಕರುಗಳು ಮತ್ತು ಮೊಬೈಲ್ ಸೇವೆ ಒದಗಿಸುವ ಕಂಪೆನಿಗಳು ಆಂಡ್ರಾಯಿಡ್ ಪರವಾಗಿವೆ.ಮುಕ್ತ ಮತ್ತು ಸ್ವತಂತ್ರ ತಂತ್ರಾಂಶಗಳ ಅಭಿವೃದ್ಧಿಯೂ ತ್ವರಿತಗತಿಯಲ್ಲಿ ನಡೆಯುತ್ತಿರುವುದು ಆಂಡ್ರಾಯಿಡ್ ವ್ಯವಸ್ಥೆಗೇ ಆಗಿದೆ.ಹೀಗಾಗಿ,ಗ್ರಾಹಕರೂ ಆಂಡ್ರಾಯಿಡ್ ವ್ಯವಸ್ಥೆಯನ್ನೇ ಬಯಸುತ್ತಿದ್ದಾರೆ.ಮೊಬೈಲ್ ಹ್ಯಾಂಡ್‌ಸೆಟ್‌ಗಳು ಅಲ್ಲದೆ ಸ್ಮಾರ್ಟ್‌ಪೋನ್ ಮತ್ತು ಟ್ಯಾಬ್ಲೆಟ್ ಸಾಧನಗಳ ಮಟ್ಟಿಗೂ ಇದೇ ಮಾತು ಅನ್ವಯವಾಗುತ್ತದೆ. ಆಂಡ್ರಾಯಿಡ್ ವ್ಯವಸ್ಥೆಯು ಟ್ಯಾಬ್ಲೆಟ್ ಸಾಧನಗಳ ಆವೃತಿಯನ್ನೂ ಹೊಂದಿರುವುದು ಇನ್ನೊಂದು ವಿಶೇಷ.ಗೂಗಲ್ ಸ್ವತ: ತನ್ನದೇ ಸ್ಮಾರ್ಟ್ ಫೋನ್ ಹೊರ ತಂದು,ಅದನ್ನು ಜಗತ್ತಿನಲ್ಲೆಡೆ ಒದಗಿಸುವ ಯೋಜನೆ ಹೊಂದಿದೆ ಎನ್ನುವ ವದಂತಿಯೂ ಇದೆ.ಹೀಗಾಗಿ,ಯಾವ ರೀತಿ ವಿಂಡೋಸ್ ಆಪರೇಟಿಂಗ್ ವ್ಯವಸ್ಥೆ ಕಂಪ್ಯೂಟರ್ ಮಾರುಕಟ್ಟೆಯ ಪಾರುಪತ್ಯ ಹೊಂದಿತ್ತೋ,ಅದೇ ಮಟ್ಟಿನ ಪಾರುಪತ್ಯ ಆಂಡ್ರಾಯಿಡ್ ವ್ಯವಸ್ಥೆಯೂ ಮಾಡುವತ್ತ ಮುನ್ನಡೆದಿದೆ.ಈ ಮಧ್ಯೆ ನೋಕಿಯಾ ಮಾತ್ರಾ ವಿಂಡೋಸ್ ಹಿಂದೆ ಬಿದ್ದು ಅಚ್ಚರಿ ಮೂಡಿಸಿದ್ದನ್ನು ಈ ಅಂಕಣದಲ್ಲಿಯೂ, ತಾವು ಓದಿದ್ದೀರಿ.
----------------------------------------
ಅಮೆಜಾನ್ ಕಂಪೆನಿಯ ಕ್ಲೌಡ್ ಸೇವೆ
ಅಮೆಜಾನ್ ಕಂಪೆನಿಯೂ ತನ್ನ ಇ-ವ್ಯವಹಾರದಿಂದ ಹೊಸ ಹಾದಿಯತ್ತ ಹೊರಳಿಕೊಳ್ಳುವುದರಲ್ಲಿದೆ.ಈಗ ಅದು ತನ್ನ ಗ್ರಾಹಕರಿಗೆ ಅಂತರ್ಜಾಲದಲ್ಲಿ ಐದು ಗಿಗಾಬೈಟುಗಳಷ್ಟು ಉಚಿತ ಆನ್‌ಲೈನ್ ಸ್ಮರಣ ಸಾಮರ್ಥ್ಯದ ಅವಕಾಶವನ್ನು ಒದಗಿಸಲಿದೆ.ಇಲ್ಲಿ ಯಾವುದೇ ಕಡತವನ್ನು ಕಾಪಿಡಬಹುದು.ಸಂಗೀತ,ಚಲನಚಿತ್ರಗಳ ಕಾಪಿರೈಟುಳ್ಳ ಕಡತಗಳನ್ನಿಡಲೂ ಅವಕಾಶವಿದೆ.ಇದರಿಂದ ಹಾಲಿವುಡ್ ಚಿತ್ರ ನಿರ್ಮಾಪಕರು ಮತ್ತು ಸಂಗೀತ ಉದ್ಯಮಕ್ಕೆ ತಲೆಬಿಸಿಯಾಗಬೇಕಿತ್ತು.ಆದರೆ,ಅಂತಹದ್ದೇನೂ ಆಗಿಲ್ಲ.ಯಾಕೆಂದರೆ,ಐದು ಗಿಗಾಬೈಟ್‌ನಷ್ಟು ಅವಕಾಶದಲ್ಲಿ ಹೆಚ್ಚು ಕಡತಗಳು ಹಿಡಿಯವು ಎನ್ನುವ ಲೆಕ್ಕಾಚಾರ ಒಂದಾದರೆ,ಕಡತಗಳನ್ನು ಇತರ ಜತೆ ಹಂಚಿಕೊಳ್ಳಲು,ಖಾತೆಯ ಗುಪ್ತಪದವನ್ನು ಇತರರ ಜತೆ ಹಂಚಿಕೊಳ್ಳಬೇಕಾಗುತ್ತದೆ ಎನ್ನುವ ವಾಸ್ತವದ ಅರಿವು.ಈ ಅಗತ್ಯದ ಕಾರಣ ಯಾರೂ ಕಡತಗಳನ್ನು ಹಂಚಿಕೊಳ್ಳುವ ಸಾಹಸಕ್ಕೆ ಕೈಹಾಕರು-ಹಾಗಾಗಿ ಕಾಪಿರೈಟ್ ಕಾಯಿದೆಯ ಉಲ್ಲಂಘನೆಗೆ ಅಮೆಜಾನ್ ಕ್ಲೌಡ್ ಸೇವೆ ಹೆಚ್ಚು ಬಳಕೆಯಾಗದು ಎನ್ನುವ ಸಮಾಧಾನ ಹಾಲಿವುಡ್ ನಿರ್ಮಾಪಕರದ್ದು.
----------------------------------
"ಸ್ಪರ್ಶ" ಮೂಲಕ ಕಾಪಿ ಮಾಡಿ!
ಒಂದು ಸಾಧನದಿಂದ ಕಡತಗಳನ್ನು ಇನ್ನೊಂದು ಸಾಧನಕ್ಕೆ ನಕಲು ಮಾಡುವುದು ತ್ರಾಸದಾಯಕವೇ ಸರಿ.ಬ್ಲೂಟೂತ್,ನಿಸ್ತಂತು ಸಂಪರ್ಕಗಳ ಮೂಲಕ ಈ ಕ್ರಿಯೆ ಸಾಕಷ್ಟು ಸರಳವಾಗಿದೆ.ಜತೆಗೆ ಆಂಡ್ರಾಯಿಡ್ ಅಪ್ಲಿಕೇಶನ್‌ಗಳನ್ನು ಡೆಸ್ಕ್‌ಟಾಪ್ ಕಂಪ್ಯೂಟರಿನಲ್ಲಿ ಇಳಿಸಿಕೊಂಡು,ತನ್ನ ಮೊಬೈಲ್ ಸಾಧನದಲ್ಲಿ ಅನುಸ್ಥಾಪಿಸಲು ಅನುವು ಮಾಡುವಂತಹ ಅನುಕೂಲತೆಗಳೂ ಈಗ ಲಭ್ಯ.ಸ್ಪರ್ಶ ಸಂವೇದಿ ತೆರೆಯುಳ್ಳ ಸಾಧನಗಳಲ್ಲಿ ಬಳಸಲು ತಂತ್ರಾಂಶವನ್ನು ಎಂಐಟಿಯ ಖ್ಯಾತ ಸಂಶೋಧಕ ಪ್ರಣವ್ ಮಿಸ್ತ್ರಿ ಸಿದ್ಧ ಪಡಿಸಿದ್ದಾರೆ."ಸ್ಪರ್ಶ" ಎಂದೇ ತಂತ್ರಾಂಶದ ಹೆಸರು.ಇದನ್ನು ಎರಡೂ ಸಾಧನದಲ್ಲಿ ಅಳವಡಿಸಿಕೊಳ್ಳಬೇಕು.ಎರಡೂ ಸಾಧನದಲ್ಲಿ ಒಂದೇ ಫೋಲ್ಡರ್ ಬಳಸುತ್ತಿರಬೇಕು.ಆಗ ಒಂದು ಸಾಧನದ ತೆರೆಯನ್ನು ಸ್ಪರ್ಶಿಸುವ ಮೂಲಕ,ಕಡತವನ್ನು ಕಾಪಿ ಮಾಡಿಕೊಂಡು,ಅದನ್ನು ನಮ್ಮ ದೇಹದಲ್ಲಿ ಧರಿಸಿದೆವೆಯೋ ಎನ್ನುವಂತ ಪರಿಣಾಮ ಉಂಟು ಮಾಡಬೇಕು.ನಂತರ ಇನ್ನೊಂದು ಸಾಧನದ ತೆರೆಯನ್ನು ಮುಟ್ಟಿದರೆ ಸರಿ,ಕಡತ ಅಲ್ಲಿಗೆ ವರ್ಗಾವಣೆಯಾಗಲಾರಂಭಿಸುತ್ತದೆ.ಮನುಷ್ಯ-ಕಂಪ್ಯೂಟರ್ ನಡುವಣ ಸಂವಹನವನ್ನು ಸಲೀಸುಗೊಳಿಸಲು ಪ್ರಣವ್ ಮಿಸ್ತ್ರಿ ಇಂತಹ ಅನೇಕ ಯೋಜನೆಗಳನ್ನು ಟೆಡೆಕ್ಸ್ ಎನ್ನುವ ಸಮಾವೇಶದಲ್ಲಿ ಸೋದಾಹರಣವಾಗಿ ತೋರಿಸಿ,ಯುವಜನರ ಕಣ್ಮಣಿಯಾಗಿರುವುದು ನಿಮಗೆ ತಿಳಿದೇ ಇದೆ.ಈ ತಂತ್ರಾಂಶವನ್ನು ಆಪರೇಟಿಂಗ್ ವ್ಯವಸ್ಥೆಯ ತಂತ್ರಾಂಶದ ಭಾಗವಾಗಿಸಿ,ನಕಲು ಮಾಡುವುದನ್ನು ಸುಲಭವಾಗಿಸಬಹುದು ಎಂಬುದು ಮುಂದಿನ ಯೋಜನೆ.
--------------------------------------------
ಜಿಮೇಲ್ ಮೋಶನ್:ಬೇಸ್ತು
ಜನರನ್ನು ಬೇಸ್ತು ಬೀಳಿಸುವ ಎಪ್ರಿಲ್ ಫೂಲ್ ಜೋಕುಗಳಲ್ಲಿ ಗೂಗಲ್‌ನ ಪ್ರಯೋಗ ಪರಿಣಾಮಕಾರಿಯಾಗಿತ್ತು.ಜಿಮೇಲ್ ಲಾಗಿನ್ ಪುಟದಲ್ಲಿ ಜಿಮೇಲ್ ಮೋಶನ್ ಎಂಬ ಹೊಸ ಅಪ್ಲಿಕೇಶನ್ ವಿವರ ಎಲ್ಲರ ಗಮನ ಸೆಳೆಯುವಂತಿತ್ತು.ಕ್ಲಿಕ್ಕಿಸಿದರೆ,ತೆರೆಯುವ ಹೊಸ ಪುಟದಲ್ಲಿ,ಹೊಸ ಅಪ್ಲಿಕೇಶನ್ ಡೌನ್‌ಲೋಡ್ ಬಟನ್,ಅಪ್ಲಿಕೇಶನ್ ಬಗ್ಗೆ ವಿವರಣೆ ನೀಡುವ ವಿಡಿಯೋ ಕೊಂಡಿ ಎಲ್ಲವೂ ಇತ್ತು.ಜಿಮೇಲ್ ಮೋಶನ್ ಅಪ್ಲಿಕೇಶನ್ ಅನುಸ್ಥಾಪಿಸಿದರೆ,ಕಂಪ್ಯೂಟರ್ ಮುಂದೆ ನಟಿಸುವ ಮೂಲಕ,ಮಿಂಚಂಚೆ ಓದುವುದರಿಂದ ಹಿಡಿದು,ರಚಿಸಲು ಸಾಧ್ಯ ಎಂಬ ವಿವರಣೆ ವಿಡಿಯೋದಲ್ಲಿ ಬಹಳ ಮನ ಮುಟ್ಟುವಂತೆ ವಿವರಿಸಲಾಗಿತ್ತು.ಆದರೆ,ಡೌನ್‌ಲೋಡ್ ಬಟನ್ ಕ್ಲಿಕ್ಕಿಸಿದಿರೋ,ಇದೊಂದು ಎಪ್ರಿಲ್ ಫೂಲ್ ತಂತ್ರ,ಸದ್ಯಕ್ಕಂತೂ ಇಂತಹ ಸವಲತ್ತು ಲಭ್ಯವಿಲ್ಲ ಎನ್ನುವ ಗುಟ್ಟು ಬಹಿರಂಗವಾಗುತ್ತಿತ್ತು.
--------------------------------------------------
ತುಷಾರ:ವಾರ್ಷಿಕ ಚಂದಾ ಗೆಲ್ಲಿ!
ಈ ಪ್ರಶ್ನೆಗಳಿಗೆ ಸರಿಯುತ್ತರ ಕಳುಹಿಸಿ,ತುಷಾರ ಮಾಸಿಕದ ವಾರ್ಷಿಕ ಚಂದಾ ಗೆಲ್ಲಿ! ಬಹುಮಾನ ಪ್ರಾಯೋಜಿಸಿದವರು ಉಡುಪಿ ಬ್ರಹ್ಮಗಿರಿಯ ಡಾ.ಶ್ರೀನಿವಾಸ್ ರಾವ್,ಪ್ರೊಫೆಸರ್,ನಿಟ್ಟೆ.
*ಡೆಬಿಯನ್ ಲೀನಕ್ಸ್ ವಿತರಣೆಯ ಮುಖ್ಯ ಹೆಗ್ಗಳಿಕೆ ಏನು?
*ಐ ಆರ್ ಸಿ ಏನು?ಯಾಕೆ ಜನಪ್ರಿಯ?
(ಉತ್ತರಗಳನ್ನು nistantusansaara@gmail.comಗೆ ಮಿಂಚಂಚೆ ಮಾಡಿ ಅಥವಾ 725927022ಗೆ ಎಸ್ಸೆಮ್ಮೆಸ್ ಮಾಡಿ.ವಿಷಯ:NS25 ನಮೂದಿಸಿ.)
ಕಳೆದ ವಾರದ ಸರಿಯುತ್ತರಗಳು:
*ಕಂಪ್ಯೂಟರಿನ ಹಾರ್ಡ್ ಡಿಸ್ಕ್ ಕೈಕೊಟ್ಟಾಗ,ಕಂಪ್ಯೂಟರ್ ಬಳಸಲು ಲೀನಕ್ಸ್ ಲೈವ್ ಸಿಡಿ ಬಳಸಿ.
*ಮತ ಯಾಚನೆಗೆ ಲ್ಯಾಪ್‌ಟಾಪ್ ಆಮಿಷ ಒಡ್ಡುತ್ತಿರುವ ರಾಜಕೀಯ ಪಕ್ಷಗಳು ಡಿಎಂಕೆ ಮತ್ತು ಎಐಡಿಎಂಕೆ. ಬಹುಮಾನ ಗೆದ್ದವರು ಸ್ವಾತಿ ಎನ್,ಜಾಲ್ಸೂರು. ಅಭಿನಂದನೆಗಳು.
-----------------------------------------------------
ಟ್ವಿಟರ್ ಚಿಲಿಪಿಲಿ
*ರಾಜಹಂಸ ಬಸ್ ಸರಿಯಿರಲಿಲ್ಲ-ಹಾಗಾಗಿ ಅದು ರಾಜಹಿಂಸೆಯಾಯ್ತು..
*ಅಶೋಕ್‌ಕುಮಾರ್ ಎ