ಚಂದನವನದೊಳ್

ಒಂಬತ್ತು ದಶಕಗಳ ಕನ್ನಡ ಚಿತ್ರರಂಗದಲ್ಲಿ ಸುಮಾರು ಐದು ಸಾವಿರ ಚಿತ್ರಗಳು ಬಿಡುಗಡೆಯಾಗಿವೆ. ಬಹುಶಃ ಬೇರೆ ಯಾವುದೇ ಭಾಷೆಯಲ್ಲೂ ಬಿಡುಗಡೆಯಾಗದಷ್ಟು ಅತೀ ಹೆಚ್ಚು ಪೌರಾಣಿಕ ಚಿತ್ರಗಳು, ಐತಿಹಾಸಿಕ ಸಿನಿಮಾಗಳು, ಸಾಹಿತ್ಯಾಧಾರಿತ, ಕಲಾತ್ಮಕ, ಮಕ್ಕಳ, ಉಪಭಾಷೆಯ ಚಿತ್ರಗಳು ಕನ್ನಡದಲ್ಲಿ ಬಿಡುಗಡೆಯಾಗಿವೆ. ಕನ್ನಡ ಸಾಹಿತ್ಯ ಲೋಕದ ಹಲವು ದಿಗ್ಗಜರು ಚಿತ್ರರಂಗದಲ್ಲಿ ಪ್ರತ್ಯಕ್ಷವಾಗಿ ತೊಡಗಿಸಿಕೊಂಡಿದ್ದಾರೆ. ಹಲವರ ಕಥೆ, ಕಾದಂಬರಿಗಳು ಚಿತ್ರಗಳಾಗಿವೆ. ಕಾವ್ಯಗಳು ಹಾಡುಗಳಾಗಿವೆ. ಎಂಟು ಜ್ಞಾನಪೀಠ ಪ್ರಶಸ್ತಿ ಪುರಸ್ಕೃತರ ಪೈಕಿ ಮೂವರು ಚಿತ್ರ ನಿರ್ದೇಶನ ಮಾಡಿದ್ದಾರೆ. ಸಂಭಾಷಣೆಯೇ ಇಲ್ಲದ ಚಿತ್ರಗಳು, ಒಂದೇ ಟೇಕ್‌ನಲ್ಲಿ ತಯಾರಾದ ಚಿತ್ರಗಳು, ಅತ್ಯಂತ ಕಡಿಮೆ ಅವಧಿಯಲ್ಲಿ ಚಿತ್ರೀಕರಣವಾದ ಚಿತ್ರಗಳು, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಗಮನಸೆಳೆದ ಚಿತ್ರಗಳು, ರಾಜ್ಯ ಮತ್ತು ರಾಷ್ಟ್ರೀಯ ಮಟ್ಟದಲ್ಲಿ ಹಲವು ಪ್ರಶಸ್ತಿಗಳನ್ನು ಬಾಚಿಕೊಂಡ ಚಿತ್ರಗಳು ಇಲ್ಲಿವೆ. ಇನ್ನು ಕನ್ನಡದಲ್ಲಾದ ಪ್ರಯೋಗಗಳಿಗೆ ಲೆಕ್ಕವಿಲ್ಲ. ಹಲವು ದಾಖಲೆಗಳು, ಸಾಹಸಗಳು, ವೈಶಿಷ್ಟ್ಯಗಳು, ಸ್ವಾರಸ್ಯಗಳು, ಹೆಗ್ಗಳಿಕೆಗಳು ಕನ್ನಡ ಚಿತ್ರರಂಗದಲ್ಲಿ ಆಗಿದೆ. ಇವೆಲ್ಲವನ್ನೂ ಮೆಲುಕು ಹಾಕುವ ಪ್ರಯತ್ನವೇ 'ಚಂದನವನದೊಳ್'. ಮುಂದಿನ ತಲೆಮಾರಿನ ಚಿತ್ರಕರ್ಮಿಗಳಿಗೆ ಮತ್ತು ಸಿನಿಮಾಸಕ್ತರಿಗೆ ಕೈಪಿಡಿಯಾಗಬಲ್ಲ ಪುಸ್ತಕ ಇದು.

‘ಚಂದನವನದೊಳ್’ ಕೃತಿಯ ಲೇಖಕರಾದ ಚೇತನ್ ನಾಡಿಗೇರ್ ಅವರು ಬರೆದ ಲೇಖಕರ ಮಾತಿನಿಂದ ಆಯ್ದ ಕೆಲವು ಸಾಲುಗಳು…”ಭಾರತೀಯ ಚಿತ್ರರಂಗದಲ್ಲಿ ಕನ್ನಡ ಚಿತ್ರರಂಗಕ್ಕೆ ವಿಶಿಷ್ಟವಾದ ಸ್ಥಾನವಿದೆ. ಇತರೆ ಚಿತ್ರರಂಗಗಳಿಗೆ ಹೋಲಿಸಿದರೆ, ಅತೀ ಹೆಚ್ಚು ಸಾಹಿತ್ಯಾಧಾರಿತ. ಐತಿಹಾಸಿಕ, ಮಕ್ಕಳ, ಹೊಸ ಅಲೆಯ, ಹಲವು ಉಪಭಾಷೆಗಳಿರುವ, ರಾಷ್ಟ್ರೀಯ ಮತ್ತು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ದೊಡ್ಡ ಸಾಧನೆ ಮಾಡಿರುವ ಚಿತ್ರರಂಗವೆಂದರೆ ಅದು ಕನ್ನಡ ಚಿತ್ರರಂಗ ಮಾತ್ರ.

ಹಿಂದಿ, ತಮಿಳು, ತೆಲುಗು, ಮಲಯಾಳಂ ಸೇರಿದಂತೆ ಬೇರೆ ಭಾಷೆಗಳ ಚಿತ್ರರಂಗಗಳಿಗೆ ಹಾಲಿವುಡ್ ಮಾದರಿಯಲ್ಲಿ ಬಾಲಿವುಡ್, ಕಾಲಿವುಡ್, ಟಾಲಿವುಡ್, ಮಾಲಿವುಡ್ ಎಂದು ಗುರುತಿಸಲಾಗುತ್ತಿದೆ. ಕನ್ನಡ ಚಿತ್ರರಂಗಕ್ಕೆ ಅಚ್ಚಕನ್ನಡದ 'ಚಂದನವನ' ಎಂಬ ಹೆಸರಿದೆ. 90ಕ್ಕೂ ಹೆಚ್ಚು ವರ್ಷ ಇತಿಹಾಸವಿರುವ ಚಂದನವನದಲ್ಲಿ ಸುಮಾರು ಐದು ಸಾವಿರ ಚಿತ್ರಗಳು, ಹಲವು ದಾಖಲೆಗಳು, ವೈಶಿಷ್ಟ್ಯಗಳು, ಹೆಗ್ಗಳಿಕೆಗಳು, ಸಾಧನೆಗಳಿವೆ. ಅದರ ಕುರಿತು ಹೇಳುವ ಪ್ರಯತ್ನವೇ ಈ 'ಚಂದನವನದೊಳ್'.

ಇಲ್ಲಿರುವ ವಿಷಯಗಳು ಹೊಸದೇನಲ್ಲ. ಈ ಕುರಿತು ನೀವು ಓದಿರಬಹುದು, ಕೇಳಿರಬಹುದು ಅಥವಾ ನೋಡಿರಬಹುದು. ಕೆಲವು ವಿಷಯಗಳು ನಡೆದ ಸಂದರ್ಭದಲ್ಲಿ ಸಾಕಷ್ಟು ಸುದ್ದಿಯಾಗಿವೆ. ಇನ್ನೂ ಕೆಲವು ವಿಷಯಗಳು ಬೆಳಕಿಗೆ ಬಾರದೆ ಮಾಯವಾಗಿವೆ. ಇದೆಲ್ಲದರ ಕುರಿತು ಇಷ್ಟು ವರ್ಷ ಬೇರೆಬೇರೆ ಪತ್ರಿಕೆ, ನಿಯತಕಾಲಿಕೆಗಳು ಮತ್ತು ವೆಬ್‌ಸೈಟ್‌ಗಳಿಗೆ ಬರೆದ ಅನುಭವದ ಹಿನ್ನೆಲೆಯಲ್ಲಿ ಈ ಪುಸ್ತಕ ಬರೆದಿದ್ದೇನೆ.

ಈ ಪುಸ್ತಕದಲ್ಲಿ 38 ಅಧ್ಯಾಯಗಳಿದ್ದು, ಈ ಪೈಕಿ 37 ಅಧ್ಯಾಯಗಳು ವಿಷಯಾಧಾರಿತವಾಗಿವೆ. ಕೊನೆಯ ಅಧ್ಯಾಯದಲ್ಲಿ ಕನ್ನಡ ಚಿತ್ರರಂಗದ ಕುರಿತು 150 ಆಸಕ್ತಿಕರ ಮಾಹಿತಿಗಳಿವೆ. ಈ ಅಧ್ಯಾಯಗಳ ಪೈಕಿ ಕೆಲವು ವಿಷಯಗಳ ಬಗ್ಗೆ ಪ್ರತ್ಯೇಕವಾಗಿ ಇಡೀ ಪುಸ್ತಕವನ್ನೇ ಮಾಡುವಷ್ಟು ಆ ವಿಷಯಗಳು ಬೃಹತ್ ಆಗಿವೆ. ಆದರೆ, ಈ ಪುಸ್ತಕದ ಮುಖ್ಯ ಉದ್ದೇಶ ಕನ್ನಡ ಚಿತ್ರರಂಗದ ಹೆಗ್ಗಳಿಕೆಗಳ ಬಗ್ಗೆ ಹೇಳುವುದಾದ್ದರಿಂದ, ವಿಶ್ಲೇಷಣೆ ಮಾಡದೆ, ಮಾಹಿತಿ ರೂಪದಲ್ಲಿ ಮಾತ್ರ ನೀಡಲಾಗಿದೆ.

ಹಲವರ ಸಹಕಾರ ಮತ್ತು ಪ್ರೋತ್ಸಹವಿಲ್ಲದ ಈ ಪುಸ್ತಕ ಸಾಧ್ಯವಾಗುತ್ತಿರಲಿಲ್ಲ. ಪುಸ್ತಕ ಓದಿ ಸೂಕ್ತ ಮಾರ್ಗದರ್ಶನ ನೀಡಿದ ಹಿರಿಯ ಪತ್ರಕರ್ತರಾದ ಬಿ.ಎನ್. ಸುಬ್ರಹ್ಮಣ್ಯ ಮತ್ತು ಮುರಳೀಧರ ಖಜಾನೆ ಅವರಿಗೆ ಚಿರಋಣಿ. ಬೇರೆಬೇರೆ ವಿಷಯಗಳಿಗೆ ಸಂಬಂಧಿಸಿದಂತೆ ಸೂಕ್ತ ಮಾಹಿತಿ ಮತ್ತು ಸಲಹೆ ಕೊಡುವುದರ ಜೊತೆಗೆ ಪ್ರೋತ್ಸಾಹಿಸಿದ ಹಿರಿಯ ಪರ್ತಕರ್ತರಾದ ಕೆ.ಎಸ್. ವಾಸು, ಎನ್.ಎಸ್. ಶ್ರೀಧರಮೂರ್ತಿ ಮತ್ತು ವಿಕಾಸ್ ನೇಗಿಲೋಣಿ ಅವರಿಗೆ ಧನ್ಯವಾದಗಳು. ಈ ಪುಸ್ತಕದಲ್ಲಿ ಯಾವುದು ಮಾಹಿತಿಯೋ, ಹೆಗ್ಗಳಿಕೆಯೋ, ದಾಖಲೆಯೋ, ವೈಶಿಷ್ಟ್ಯವೋ ಅದು ಓದುಗರಿಗೆ ಬಿಟ್ಟಿದ್ದು. ಈ ಪುಸ್ತಕದಲ್ಲಿ ಸಾಕಷ್ಟು ವಿಷಯಗಳನ್ನು ಕ್ರೋಢೀಕರಿಸುವ ಪ್ರಯತ್ನ ಮಾಡಲಾಗಿದೆ. ಹಾಗಂತ ಇದೇ ಅಂತಿಮ ಅಥವಾ ಪರಿಪೂರ್ಣವಲ್ಲ. ಇದರಲ್ಲಿ ಹಲವು ವಿಷಯಗಳು ಬಿಟ್ಟು ಹೋಗಿರಬಹುದು. ಅವೆಲ್ಲವೂ ಕಣ್ಣಪ್ಪಿನಿಂದ ಅಥವಾ ಮರೆವಿನಿಂದ ಆಗಿದ್ದೇ ಹೊರತು, ಯಾವುದೂ ಉದ್ದೇಶಪೂರ್ವಕವಲ್ಲ. ಯಾವುದೇ ವಿಷಯವನ್ನೂ ದುರದ್ದೇಶಪೂರ್ವಕವಾಗಿ ಇಲ್ಲಿ ಬಿಟ್ಟಿಲ್ಲ. ಈ ಪುಸ್ತಕ ಪುನರ್ ಮುದ್ರಣವಾಗುವಾಗುವ ಸಂದರ್ಭದಲ್ಲಿ ಬಿಟ್ಟು ಹೋದ ವಿಷಯಗಳು ಗಮನಕ್ಕೆ ಬಂದರೆ, ಆಗ ಖಂಡಿತವಾಗಿಯೂ ಸೇರಿಸಿಕೊಳ್ಳಲಾಗುವುದು. ಪುಸ್ತಕವನ್ನು ಓದಿ ಕನ್ನಡಿಗರಿಗೆ ಕನ್ನಡ ಚಿತ್ರರಂಗದ ಬಗ್ಗೆ ಹೆಮ್ಮೆ ಮೂಡಿದರೆ, ಪ್ರಯತ್ನ ಸಾರ್ಥಕ.”