ಜೀತದಾಳು

ಸುಂದರ ಜಗ ಕಾಣಲು ಬಂದೆ ಸಂತಸದಲಿ ಹಾರುಹಕ್ಕಿಯಾಗಿ 

ಸಿಲುಕಿದೆ, ಹಣದ ಬಲೆಯಲಿ ಸೇರಿದೆ ಪಂಜರ, ಜೀತದಾಳಾಗಿ ॥

ಎಳೆ ಎಳೆಯ ಅಂಗಗಳಲ್ಲಿ ಹೊಳೆಹೊಳೆವ ಕಣ್ಣುಗಳಲ್ಲಿ ಬಂದೆ

ಕೇಳುತ್ತ - ಬೇಡುತ್ತಿರುವೆಯಾ? ‘ಸ್ವಾತಂತ್ರ್ಯ’ವ ನೀಡುವವರಾರು? ॥

ಅನಕ್ಷರತೆಯ ತಾಯಿ ತಂದೆಗಳ ಅಂಧತೆಗೆ ಮಣಿದೆಯಾ?

ಹಣರಕ್ಕಸರ ಕೈಗೆ ಸಿಲುಕಿದೆಯಾ? ನರಕದಲ್ಲಿ ನರಳುವೆಯಾ? ॥

ಅನ್ನಬಟ್ಟೆಗಾಗಿ ಜೀತದಾಳಾದೆಯಾ? ವಿಧಿಯಾಟವೊ? ನಿನ್ನೀ ದೌರ್ಬಲ್ಯವೊ

ಹಾಕುವರು ಹಳಸು ಹೊಲಸು, ತೊಡಿಸುವರು ಹರುಕು ಮುರುಕು ॥

ದಿನದಿನದ ಶ್ರಮವು ನಿನ್ನೀ ಒಂದೊಂದು ಬೆವರಹನಿಗಳು

ಒಡೆಯರು ಕುಡಿಯುವ ಮತ್ತಿನ ಸೋಮರಸಗಳಾದವೋ? ॥

ತೇಯುತ್ತಿರುವೆ ದೇಹವ ಗಂಧದ ಕೊರಡು ಕೊರಡಾಗಿ

ಪಡೆಯುವರೊಡೆಯರು ಪರಿಮಳವ ಅಟ್ಟಹಾಸದಲಿ ಮೆರೆಯುತ ॥

ಹಣವಂತರ ನಾಯಿಬೆಕ್ಕು ಸ್ವಾತಂತ್ರ್ಯಗೊಂಡಿರುವವು ಸಂತಸದಲಿ

ಜೀತದಾಳದ ನಿಮಗೇಕೆ? ಮನೆ ಹೊಸ್ತಿಲ ಒಳಪ್ರವೇಶ ನಿಷಿದ್ಧ ? ॥

-ಜಂಬರಗಟ್ಟಿ ಮಂಜಪ್ಪ

ಚಿತ್ರ ಕೃಪೆ: ಇಂಟರ್ನೇಟ್ ತಾಣ