ಜೀವ ತುಂಬಬೇಕು

ಹೊರಗೆ ಬಟಾಬಯಲು
ಒಳಗೆ ಚಳಿಯ ಕನಲಿತ್ತು
ಕದಡಿದ ಮನಕ್ಕಂಜದೇ
ಬಾನಂಗಳದ ನಕ್ಷತ್ರಗಳೆಡೆಗೆ
ಬೊಟ್ಟು ತೋರಿಸಿ ಲೆಕ್ಕ ಹೇಳಿದವಳು ನೀನು
ತಾರೆಗಳ ಊರಿನಿಂದ ಹೊರಟ ಚೆಂಬೆಳಕು
ನಿನ್ನ ಕೋಣೆಯ ತನಕ ತಲುಪಲಿಲ್ಲ
ಬೆಣ್ಣೆಯಂಥ ಕೈತುಂಬ
ಮದರಂಗಿಯ ಚುಕ್ಕೆ ಇಟ್ಟು
ಬೇರು ಬಿಡುವ ಬಣ್ಣದ ಕೆಳಗೆ
ನಾಳೆಗಳ ಗಂಟು ಕಟ್ಟಿದವಳು

ಹರಡಿಕೊಂಡ ರಾಶಿ ರಾಶಿ ಕನಸುಗಳು
ನಿನ್ನ ಬೆರಳ ತುದಿಯಲ್ಲಿ
ಜೀವ ತುಂಬಲಿಲ್ಲ
ಸುಕ್ಕುಗಟ್ಟಿದ ಹಾಳೆಯ ತುಂಬಾ
ಊರ ತೇರಿನ ಚಿತ್ರ ಬಿಡಿಸಿ
ರಂಗು ರಂಗಿನ ಬಣ್ಣ ತುಂಬಿ
ನನ್ನ ಕಣ್ಣುಗಳಲ್ಲಿ
ಹಬ್ಬದ ಭಾಷ್ಯ ಬರೆದವಳು
ನಿನ್ನ ಕಣ್ಣಂಚಿನಲ್ಲಿ ಹೊರಟ
ನೋವುಗಳ ಮೆರವಣಿಗೆಗೆ
ಮನಸ್ಸಿನ ಸ್ವಾಗತವಿರಲಿಲ್ಲ
ಹಿತ್ತಲ ಬಿದಿರಿನ ಕಡ್ಡಿಗಳನ್ನು ಪೋಣಿಸಿ
ಆಕಾಶಬುಟ್ಟಿ ಕಟ್ಟಿ
ನನ್ನ ಕಣ್ಣಲ್ಲಿ ದೀಪಗಳ ತೊಟ್ಟಿಲು
ಕಟ್ಟಿದವಳು ನೀನು

ಹೊಸ ಮಳೆ ಬಿದ್ದ ನೆಲದಲ್ಲಿ
ಅವಿತಿದ್ದ ಹಳೆಯ ಗರಿಕೆಯ ಬುಡದಲ್ಲಿ
ಜೀವರಸದ ಆಸೆ ಕಂಡವಳು
ನೀನು ಹರಿಸಿದ ಬೆವರ ಹನಿಗಳು ಜೀವಸೆಲೆಯಾಗಲಿಲ್ಲ
ಹರಿಯುವ ನದಿಯ ತಟದಲ್ಲಿ
ಅರಳಿದ ಗುಲಾಬಿ ನೀನು
ಹೂವಿನೆಸಳಿನ ಗಂಧ ನೀನು
ನಿನ್ನ ಅಂತರಂಗದ ಕನಸುಗಳಿಗೆ
ಅಳಿಸಿಹೋದ ಚಿತ್ರಗಳಿಗೆಲ್ಲಾ
ನಾನು ಜೀವ ತುಂಬಬೇಕು