ನಮ್ಮ ಹೆಮ್ಮೆಯ ಭಾರತ (ಭಾಗ 67 - 68)

೬೭.ಜಗದ್ವಿಖ್ಯಾತ ವ್ಯಕ್ತಿ ಎನ್.ಆರ್. ನಾರಾಯಣ ಮೂರ್ತಿ; ಜಗದ್ವಿಖ್ಯಾತ ಐಟಿ ಕಂಪೆನಿ ಇನ್ಫೋಸಿಸ್
ಜಗದ್ವಿಖ್ಯಾತ ಐಟಿ ಕಂಪೆನಿ ಇನ್ಫೋಸಿಸ್‌ ಇದರ ಸ್ಥಾಪಕರಲ್ಲಿ ಒಬ್ಬರಾದ ಸರಳ, ಸಜ್ಜನ, ಧೀಮಂತ ವ್ಯಕ್ತಿ ಎನ್.ಆರ್. ನಾರಾಯಣ ಮೂರ್ತಿ ಅವರೂ ಜಗದ್ವಿಖ್ಯಾತರು. ಮಾಹಿತಿ ತಂತ್ರಜ್ನಾನ ಕ್ಷೇತ್ರದಲ್ಲಿ ಜಗತ್ತೇ ಗುರುತಿಸುವಂತಹ ಪ್ರಗತಿಯನ್ನು ಭಾರತ ಸಾಧಿಸಿದೆ; ಇದರಲ್ಲಿ ಇನ್ಫೋಸಿಸ್ ಕಂಪೆನಿಯ ಪಾತ್ರ ಪ್ರಮುಖವಾದುದು.

೧೯೮೧ರಲ್ಲಿ ಸ್ಥಾಪಿಸಲಾದ ಇನ್ಫೋಸಿಸ್ ಕಂಪೆನಿ, ಮಾಹಿತಿ ತಂತ್ರಜ್ನಾನ ಸೇವೆಯಲ್ಲಿ ಕೆಲವು ಪ್ರಧಾನ ಬದಲಾವಣೆಗಳನ್ನು ತಂದಿತು. ಇದರಿಂದಾಗೆ ಸಾಫ್ಟ್-ವೇರ್ ಸೇವೆಗಾಗಿ ಇಡೀ ಜಗತ್ತೇ ಭಾರತದತ್ತ ನೋಡುವಂತಾಯಿತು. “ಗ್ಲೋಬಲ್ ಡೆಲಿವರಿ ಮಾಡೆಲ್” ಮೂಲಕ ಮಾಹಿತಿ ತಂತ್ರಜ್ನಾನದ ಕ್ಷೇತ್ರದಲ್ಲಿ ದಾಪುಗಾಲು ಹಾಕಿದ ಇನ್ಫೋಸಿಸ್ ಕಂಪೆನಿ, “ನಾಸ್‌ಡಾಕ್"ನಲ್ಲಿ ಹೆಸರಿಸಲಾದ ಪ್ರಪ್ರಥಮ ಭಾರತೀಯ ಕಂಪೆನಿ ಎಂಬ ಹೆಗ್ಗಳಿಕೆಗೆ ಪಾತ್ರವಾದದ್ದರಲ್ಲಿ ಅಚ್ಚರಿಯೇನಿಲ್ಲ.

ಇವತ್ತು ಭಾರತ, ಯುಎಸ್‌ಎ, ಚೀನಾ, ಆಸ್ಟ್ರೇಲಿಯಾ, ಜಪಾನ್, ಯುನೈಟೆಡ್ ಕಿಂಗ್‌ಡಮ್, ಜರ್ಮನಿ ಮುಂತಾದ ದೇಶಗಳಲ್ಲಿ ೬೮ ಕಚೇರಿಗಳನ್ನು ಮತ್ತು ೭೦ ಅಭಿವೃದ್ಧಿ ಕೇಂದ್ರಗಳನ್ನು ಹೊಂದಿದೆ ಇನ್ಫೋಸಿಸ್. “ಅತ್ಯುತ್ತಮ ಕಾರ್ಪೊರೇಟ್ ಗವರ್ನ್-ನೆನ್ಸಿ”ಗೆ ಇನ್ಫೋಸಿಸ್ ಕಂಪೆನಿ ಜಗತ್ತಿನಲ್ಲೇ ಶ್ರೇಷ್ಠ ಮಾದರಿಯಾಗಿದೆ.

೬೮.ಭಾರತದ ಬಾಹ್ಯಾಕಾಶ ಸಾಧನೆಗಳ ಹೆಮ್ಮೆಯ ಸಂಸ್ಥೆ “ಇಸ್ರೋ”
ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ಒಂದಾದ ಮೇಲೊಂದರಂತೆ ಸಾಧನೆಗಳನ್ನು ಮಾಡುತ್ತಾ, ಬಾಹ್ಯಾಕಾಶದಲ್ಲಿ ದಿಟ್ಟ ಹೆಜ್ಜೆಗಳನ್ನಿಡುತ್ತಿದೆ. ಎಪ್ರಿಲ್ ೨೦೦೮ರಲ್ಲಿ, ಇಸ್ರೋದ ಪೋಲಾರ್ ರಾಕೆಟ್ (ಪಿಎಸ್‌ಎಲ್‌ವಿ - ಸಿ೯)  ಒಂದೇ ಜಿಗಿತದಲ್ಲಿ ಹತ್ತು ಉಪಗ್ರಹಗಳನ್ನು ಬಾಹ್ಯಾಕಾಶದ ಕಕ್ಷೆಗೆ ಏರಿಸಿದ್ದು ಅಭೂತಪೂರ್ವ ಜಾಗತಿಕ ದಾಖಲೆ. ೨೦೧೭ರ ಇಸ್ರೋದ ಸಾಧನೆಯಂತೂ ಜಗತ್ತನ್ನೇ ನಿಬ್ಬೆರಗಾಗಿಸಿತು; ರಾಕೆಟಿನ ಒಂದೇ ಜಿಗಿತದಲ್ಲಿ, ಕೇವಲ ೧೮ ನಿಮಿಷಗಳಲ್ಲಿ ೧೦೪ ಕೃತಕ ಉಪಗ್ರಹಗಳನ್ನು ಇಸ್ರೋ ಕಕ್ಷೆಗೆ ಏರಿಸಿತು!

ಫೋಟೋ ೧: ಇನ್ಫೋಸಿಸ್ - ಬೆಂಗಳೂರು ಕ್ಯಾಂಪಸ್

ಫೋಟೋ ೨: ಇಸ್ರೋದಿಂದ ೨೮ ಫೆಬ್ರವರಿಯಂದು ೨೦೨೧ರ ಮೊದಲ ರಾಕೆಟ್ ಉಡ್ಡಯನ