ಬಿಡುಗಡೆಯ ಹಾಡುಗಳು (ಭಾಗ ೧೭) - ಅನಾಮಿಕ ಕವಿಗಳು

ಬಿಡುಗಡೆಯ ಹಾಡುಗಳು ಕೃತಿಯಲ್ಲಿ ಬಹಳಷ್ಟು ಅನಾಮಿಕ, ಅಜ್ಞಾತ ಕವಿಗಳ ಕವನಗಳು ಇವೆ. ಈ ವಾರ ಅಂತಹ ಎರಡು ಕವಿಗಳ ಕವನಗಳನ್ನು ಆಯ್ದು ಪ್ರಕಟ ಮಾಡಿದ್ದೇವೆ. 

ಏಕೆ ಧರಿಸುವೆ ಸಾಕು ಬಿಡು ಪರದೇಶಿ ಜನರಾ ವಸ್ತ್ರವಾ

(‘ಮೇರಾ ಮೌಲಾ ಬುಲಾ’ ಎಂಬಂತೆ)

ಮಾತೆ ಭಾರತಿಯ ಸ್ವತಂತ್ರ ಮಂತ್ರ ವಂದೇಮಾತರಂ ।

ಘಾತುಕೀ ವಿದೇಶಿ ಜನರಿಗೆ ದಾಸರಾಗಿರೆ ಸತತಂ ॥

ಏಕೆ ಧರಿಸುವೆ ಸಾಕು ಬಿಡು ಪರದೇಶಿ ಜನರಾ ವಸ್ತ್ರವಾ ।

ಹಾಕು ಬೆಂಕಿಲಿ ಉರಿಲಿ ಧಗಧಗ ಧರಿಸು ಖಾದಿ ಪವಿತ್ರವಾ ॥

ಮಾತಾ ದೇಶಹಿತಾ ಘನಸೇವನವು ।

ಸಖನೆ ತಕಲಿ ತಿರುವೊ ಪಡೆಯೊ ನೀ ಸುಖವಾ

ಭಗಿನಿ ಚರಕವಿದು ಪರಮಪಾವನವು ॥

ಹೂಡಿ ಕೊಡಿ ಸ್ವತಂತ್ರ ಸ್ವರಾಜ್ಯವನು

ಬಿಡದೆ ದೇಶದ ಸೇವೆ ನಡೆಯಿಸಿ ಪಡೆಯು

ಒಡೆಯ ಶೇಷಾದ್ರೀಶ ಪೊರೆವನು ಕಡೆಗೂ ॥

(ಅತ್ಯಂತ ಜನಪ್ರಿಯವಾದ ಈ ಹಾಡಿನ ಮುದ್ರಿತ ಪಾಠ ದೊರೆತಿಲ್ಲ. ಭಾಗಭಾಗವಾಗಿ ಸಂಗ್ರಹಕ್ಕೆ ಕೆ.ರಮೇಶ್ ಕಾಮತ್, ಮಲ್ಪೆ, ಪಿ. ದಾಮೋದರಯ್ಯ, ಬಿ. ಸುಬ್ರಾಯ ಮಲ್ಯ ಇವರು ನೆರವಾಗಿದ್ದಾರೆ.)

***

ಹೊಡೆದೋಡಿಸು

(‘ಯಡಕರಿ ತಯಾರ ವಾವಾ’ ಎಂಬಂತೆ)

ಹೊಡೆದೋಡಿಸಿಬಿಡಿರೀಗ ।ಈಗ ।

ತಡಮಾಡದೆ ಸೆರೆಮಾರಿಯ ಬೇಗ ।

ಲಕ್ಷಾವಧಿ ಬಡವರ ಸಂಸಾರವ ।

ಭಕ್ಷಿಸಿದೀ ರಾಕ್ಷನನ್ನೀಗ ॥

ತಾಮಸ ಮಾದಕ ಮಾರಿಯ ಬಿಡದೆ ।

ನೇಮದಿ ಜನರೆಲ್ಲರು ಬಂದೀಗ ॥

ದಾರಿದ್ರ್ಯವ ದಾವಾನಲ ಸಾಕು ।

ಸ್ವರಾಜ್ಯವ ಸಂಪಾದಿಸಲೀಗ ॥

ಹೆಂಡದ ಮಾರಿಯ ಗಾಂಜಾ ಪಿಶಾಚಿಯ ।

ಬಾಂಡಿಯ ಭೂತವನೋಡಿಸಿರೀಗ ॥

ಕೋಲು ಕಠಾರಿಗಳಿಂದಲಿ ಥಳಿಸಿ ।

ಕಾಲಿನಿಂದಲೊದ್ದೋಡಿಸಿರೀಗ ॥

ವಂಶದ ಮೂಲಕ ದೋಷದ ಭಾಂಡಗೆ ।

ಮೋಸಗೊಂಡುದಕೆ ಹೇಸುತಲೀಗ ॥

(‘ಮಧ್ಯ ನಿಷೇಧ ಪದ್ಯಾವಲಿ’ ಸಿರಸಿ, ೧೯೩೯)