ಭ್ರಮಿಸಿದನೆ ಚಂದ್ರಮ

ಭಾನು ಪಡುವಣ ಕಡಲಿಗಿಳಿದಿರೆ

ಬಾನಿಗೇರಿದ ಚಂದ್ರಮ

ತಾನು ರಾತ್ರಿಯ ರಾಜನೆನ್ನುತ

ಜಾಣನೆನ್ನುವ ಸಂಭ್ರಮ

ಗಿಡದ ಮೊಗ್ಗನು ನೋಡಿ ಚಂದಿರ

ತಡೆಯಲಾರದೆ ಹೋದನೆ

ಹಿಡಿವ ಬಯಕೆಯು ಮೂಡಿ ಮನದಲಿ

ಕಡೆಗೆ ಚುಂಬಿಸೆ ಬಂದನೆ?

ತನ್ನ ಪ್ರೇಯಸಿ ಹೂವು ನೈದಿಲೆ-

-ಯನ್ನು ಸೋಮನು ಮರೆತನೆ

ಮುನ್ನ ಯೋಚನೆ ಮಾಡಲಾರದೆ

ಚೆನ್ನ ಮೊಗ್ಗಿಗೆ ಸೋತನೆ?

ಶಶಿಗೆ ಮೊಗ್ಗಿದು ಭ್ರಮೆಯ ತಂದಿತೆ

ಬಸಿರು ಹೊತ್ತಿಹ ಗಿಡವಿದು

ಖುಷಿಯ ತಾಳದೆ ಭ್ರಮರವಾದನೆ

ತುಸುವೆ ವಿಚಲಿತನಾದುದು||

-ಪೆರ್ಮುಖ ಸುಬ್ರಹ್ಮಣ್ಯ ಭಟ್

ಚಿತ್ರ ಕೃಪೆ:  ಶ್ರೀ ಶ್ರೀಪತಿ ಹೆಗ್ಡೆಯವರ ವಾಲ್ನಿಂದ