ವಿಖ್ಯಾತನಾದ

ಬೇರೆಯವರ ಸಾಹಿತ್ಯಕೆ

ಜರಡಿಯ ಹಿಡಿಯುತ ತಾನು

ತನ್ನದೆನುತಲೆ ಬರೆದು

ವಿಖ್ಯಾತನಾದ !

ಆ ನುಡಿ ಮುನ್ನುಡಿ

ಹಿತನುಡಿಯೆನುತ

ಸ್ವಂತಿಕೆ ಮರೆಯುತ

ವಿಖ್ಯಾತನಾದ !

ಸಾಧನೆಯಿರದೆಲೆ

ಬರೆವುದು ಸಾಧ್ಯವು

ಎನುತಲೆ ನುಡಿಯುತ

ವಿಖ್ಯಾತನಾದ !

ಮೊದಲ ಚರಣವದು

ಯಾರದೊ ಏನೋ

ನಂತರದಲ್ಲಿ ಕಸವನು ಹೊಸೆದು

ವಿಖ್ಯಾತನಾದ !

ಈಗಿನ ಕಾಲದ ಪಂಡಿತರೆಲ್ಲ

ಹಿಂದಿನ ಸಾಹಿತ್ಯ ತಿಳಿದವರಲ್ಲ

ಕಾಲದ ಮಹಿಮೆಯ ನಡುವೆಯೇ

ವಿಖ್ಯಾತನಾದ !

ತನ್ನದೆ ನೀತಿಯು ಸರಿಯಿದೆಯೆನುತ

ಉಳಿದಿಹ ಕವಿಗಳ ಅರೆಬರೆಯೆನುತ

ಜಂಭದ ಕೋಳಿಯ ರೀತಿಯೆ ತಿರುಗಿ

ವಿಖ್ಯಾತನಾದ !

ಉಪಕರಿಸಿದವರ ಮರೆಯುತ ಸಾಗಿ

ತನ್ನದೆ ಅರಮನೆ ಕಟ್ಟುತ ಕುಳಿತ

ಮೋಹದ ಮಾಯೆಯ ಹರಡುತ ನಡೆದ

ವಿಖ್ಯಾತನಾದ !

ಹೀಗೆಯೆ ಸಾಗಲು ಮುಂದಕೆ ಹೋಗಲು

ಕಾಲದ ಚಕ್ರವು ಉರುಳಿತು ನೋಡು

ಮಾಡಿದ ಪಾಪಕೆ ಮಣ್ಣನು ಸೇರುತ

ವಿಖ್ಯಾತನಾದ !

-ಹಾ ಮ ಸತೀಶ ಬೆಂಗಳೂರು

ಚಿತ್ರ ಕೃಪೆ: ಇಂಟರ್ನೆಟ್ ತಾಣ