ಶಿಲಾಯುಗದತ್ತ ಅಮೇರಿಕದ ಆಳುಗರು?

ಇದು ಗೆಲುವಿನ ಅಮಲು ತಂದಿತ್ತ ಧಾರ್ಷ್ಟ್ಯವೇ ಅಥವಾ ಅಸಹಿಷ್ಣುತೆಯ ಪರಮಾವಧಿಯೇ? ವಿಶ್ವದ ದೊಡ್ಡಣ್ಣ ಎಂದೇ ಕರೆಸಿಕೊಳ್ಳುವ ಅಮೇರಿಕದ ನೂತನ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರೇ ಈ ಪ್ರಶ್ನೆಗೆ ಉತ್ತರಿಸಬೇಕು. ಕೊರೋನಾ ಮಹಾಮಾರಿಯ ಅಪ್ಪಳಿಸಿದ ನಂತರ ಪರಸ್ಪರ ಸಹಾಯದ ನೆಲೆಯಲ್ಲಿ ಒಂದಿಡೀ ವಿಶ್ವವೇ ಸೌಹಾರ್ದಮಂತ್ರ ಜಪಿಸುವ ಚಿತ್ತಸ್ಥಿತಿಯಲ್ಲಿರುವಾಗ ಅಮೇರಿಕದ ಆಳುಗ ವ್ಯವಸ್ಥೆಯು ತೀರಾ ಅನಾಗರಿಕ ರೀತಿಯಲ್ಲಿ ನಡೆದುಕೊಂಡಿದೆ. ಬಿಜಮ್ ಅಕ್ರಮ ವಲಸೆಗಾರಿಕೆಯನ್ನು ಯಾವ ದೇಶವೂ ಸಹಿಸಲಾಗದು ಮತ್ತು ಅಕ್ರಮ ವಲಸಿಗರು ತಂದಿಕ್ಕುವ ಸಮಸ್ಯೆಗಳನ್ನು ಅಷ್ಟು ಸುಲಭಕ್ಕೆ ನೀಗಿಕೊಳ್ಳಲಾಗದು. ಈ ಹಿನ್ನಲೆಯಲ್ಲಿ, ಅಧ್ಯಕ್ಷೀಯ ಚುನಾವಣೆಗೆ ಪೂರ್ವಭಾವಿಯಾಗಿ ತಾವು ನೀಡಿದ್ದ ಆಶ್ವಾಸನೆಯಂತೆ ಅಕ್ರಮ ವಲಸಿಗರನ್ನು ತಮ್ಮ ನೆಲದಿಂದ ಗಡಿಪಾರು ಮಾಡುವ ಅಮೇರಿಕ ಅಧ್ಯಕ್ಷ ಟ್ರಂಪ್ ಅವರ ನಿಲುವು ಸಮರ್ಥನೀಯವೇ ಇರಬಹುದು ; ಆದರೆ ಅದಕ್ಕಾಗಿ ಅನುಸರಿಸಲಾದ ಮಾರ್ಗವಿದೆಯಲ್ಲಾ, ಅದನ್ನು ನಾಗರಿಕ ಸಮಾಜ ಖಂಡಿತಾ ಒಪ್ಪುವುದಿಲ್ಲ. 

ಅದರಲ್ಲೂ ನಿರ್ದಿಷ್ಟವಾಗಿ, ಅಮೇರಿಕಾದೊಂದಿಗೆ ಸೌಹಾರ್ದಯುತ ಒಡನಾಟ ಮತ್ತು ವಾಣಿಜ್ಯಿಕ ಬಾಂಧವ್ಯಗಳನ್ನು ಹೊಂದಿರುವ ಭಾರತದ ವಿಷಯದಲ್ಲೂ ಅಮೇರಿಕ ಆಳುಗ ವ್ಯವಸ್ಥೆ ತೋರಿದ ಧಾರ್ಷ್ಟ್ಯವನ್ನು ಖಂಡಿಸಲೇಬೇಕು. ೧೦೪ ಮಂದಿ ಅಕ್ರಮ ಭಾರತೀಯ ವಲಸಿಗರನ್ನು ಗಡಿಪಾರು ಮಾಡುವ ಕಸರತ್ತಿನ ಭಾಗವಾಗಿ ಅವರಿಗೆ ಕೈಕೋಳ ತೊಡಿಸಿದ್ದು ಎಷ್ಟರ ಮಟ್ಟಿಗೆ ಸರಿ? ಎಂಬುದು ಕೇವಲ ಭಾರತೀಯರ ಪ್ರಶ್ನೆಯಲ್ಲ, ಅದು ಪ್ರತಿಯೊಬ್ಬ ಸಹೃದಯಿ ಮತ್ತು ಮಾನವತಾವಾದಿಯ ಆಕ್ಷೇಪವೂ ಹೌದು. ಇಂಥದೊಂದು ವಿಲಕ್ಷಣ ಕ್ರಮಕ್ಕೆ ಮುಂದಾಗುವುದಕ್ಕೂ ಮೊದಲು ಅಮೇರಿಕ ಆಳುಗ ವ್ಯವಸ್ಥೆಗೆ ಭಾರತೀಯರ ಸಂಸ್ಕಾರ ಮತ್ತು ಶ್ರೇಷ್ಟ ಪರಂಪರೆಯ ನೆನಪು ಒಂದಿನಿತೂ ಬರಲಿಲ್ಲವೇ? ‘ಮೇಕ್ ಅಮೇರಿಕ ಗ್ರೇಟ್ ಅಗೇನ್’ ಎಂದು ಶುರುವಿನಿಂದಲೇ ಹೇಳಿಕೊಂಡೇ ಬಂದ ಟ್ರಂಪ್ ರಿಗೆ ಎಲ್ಲಕ್ಕಿಂತ ಮೊದಲಿಗೆ ಅಮೇರಿಕನ್ನರ ವಿಶ್ವಾಸ ಗಳಿಸಿ ‘ಹವಾ’ ಸೃಷ್ಟಿಸಬೇಕಾದ ಅನಿವಾರ್ಯತೆಯಿದೆ. ಹೀಗಾಗಿ ಇಂಥ ಅತಿರೇಕಗಳು ಹೊಮ್ಮಿರಬಹುದು. ಆದರೆ ಇದೇ ನಡೆಯೇ ಅವರಿಗೆ ದುಬಾರಿಯಾಗಿ ಪರಿಣಮಿಸಿದರೆ ಅಚ್ಚರಿಯಿಲ್ಲ!

ಕೃಪೆ: ವಿಶ್ವವಾಣಿ, ಸಂಪಾದಕೀಯ, ದಿ: ೦೮-೦೨-೨೦೨೫ 

ಚಿತ್ರ ಕೃಪೆ: ಅಂತರ್ಜಾಲ ತಾಣ