ಸುಖಾನುಭವ

ಸುಖಾನುಭವ ಸಿಗುವುದೆಲ್ಲಿ?
ಸುಗ್ರಾಸ ಪಂಚಭಕ್ಷ್ಯ ಪರಮಾನ್ನ ಸೇವನೆಯಲ್ಲಿಯೇ?
ಗೀತ ನೃತ್ಯ ಮೋದ ಆನಂದದಲ್ಲಿಯೇ?
ಮೋಜು ಜೂಜು ವ್ಯರ್ಥ ವ್ಯಯದಲ್ಲಿಯೇ?

ನಾ ಕಾಣುವೆ ಸುಖಾನುಭವ ಹಸಿದ ಹೊಟ್ಟೆಯಲ್ಲಿ
ತೂಕಡಿಸುತಿಹ ಕಣ್ಣಲಿ, ಪಸೆ ಆರಿದ ಬಾಯಿಯಲಿ
ಚರಿತ್ರೆ ಸೇರಿದ ಅಪ್ಪ ಅಮ್ಮನ ನೆನಪಿನಲಿ
ಇನ್ನೂ ಕಾಣದ ಪರಮಾತ್ಮನ ಹುಡುಕುವಿಕೆಯಲಿ

ವಿಕೃತರು ಕಾಣುವರು ಇತರರ ನೋವಿನಲಿ ಸುಖ
ಕೆಲವರಿಗೆ ಇತರ ಸುಖ ನೀಡುವುದು ದು:ಖ
ಗೌತಮ ಹೇಳಿದ ಸುಖದ ಹಿಂದೆ ದು:ಖ
ಏನ ಪರಿಯದು ದು:ಖದ ನಂತರದ ಸುಖ

ಸುಖಾನುಭವ ಸ್ವಾದಾನುಭವದ ಪರಿ
ನೋಡುಗನ ಕಣ್ಣಿನೊಳಗಿಹ ಸಿರಿ
ಒಬ್ಬನ ಕುರೂಪಿ ಇನ್ನೊಬ್ಬಗೆ ಸ್ಫುರದ್ರೂಪಿ
ನಿಮ್ಮ ಮನದ ಪರಿ ಎಲ್ಲಿ ಇದೆ ಹೇಳಿ

ಇತರರ ನೋವಿನಲಿನ ನಲಿವೋ
ನಿಮ್ಮ ನೋವಿನಲಿ ನಲಿವೋ?