ಹೈಕು

ಬರೆಯಬೇಕೆಂದೆ ಅವಳ ಮೇಲೊಂದು ಹೈಕು

ಮರೆತೇ ಬಿಟ್ಟಿದ್ದೆ, ಓ!

ಆಗಲೇ ನನ್ನ ಮನ ಅವಳಿಂದ ಹೈಜಾಕು!

............................................................

ಸಂಧ್ಯೆಯಲಿ ಇಳಿಯುತ್ತಿದ್ದ ಸೂರ್ಯ 

ಇವಳಲ್ಲಿ ಏರುತ್ತಿದ್ದ ಕೆನ್ನೆಗೆಂಪು

ನನ್ನದು ಬೆರಗುಗಣ್ಣು!

............................................................

ಸುತ್ತಲೂ ಹೊನಲು, ಚಂದ್ರನೂ ಬೆತ್ತಲು

ನನ್ನೊಳು-ನಿನ್ನೊಳು

ಯಾತರ ಅಂತರ-ಆಳ?

.............................................................

ಹೊರಗಿನ ತಂಗಾಳಿಗೆ ಎಡೆಗೊಡದೆ

ನಿನ್ನುಸಿರು ನನಗೆ

ಬೆಚ್ಚನೆಯ ಕಾವು ನೀಡಿತು

.............................................................

ಕದ ಹಾಕಿಬಿಟ್ಟಿದ್ದೇನೆ

ಮನೆಯೊಳಗೆ ತಂಗಾಳಿ ಬಾರದಂತೆ

ಮನದೊಳಗೆ ನಿನ್ನ ನೆನಪು ಇಣುಕದಂತೆ.

..............................................................

ಆ ಪುಸ್ತಕ ತೆರೆದದ್ದೇ ತಪ್ಪಾಯಿತು..

ನೀನೇ ಇಟ್ಟಿದ್ದ ನವಿಲುಗರಿ

ನನ್ನ ಕಣ್ಣ ಮಂಜಾಗಿಸಿತು.

............................................................

ನೆನಪ ಬೆಂಕಿ

ಕೆಲವರು ಮೈ ಕಾಯಿಸಿಕೊಳ್ಳುತ್ತಾರೆ

ಹಲವರು ಮೈ ಸುಟ್ಟುಕೊಳ್ಳುತ್ತಾರೆ

...........................................................

ಆ ಮರವನ್ನೇಕೆ ಕಡಿದರು?

ಅದರ ತುಂಬ ಸುಂದರ ಹೂ-ಹಣ್ಣಿದ್ದವು

ಒಂದು ಜೀವವೇ ಅದರಲ್ಲಿತ್ತು!

...........................................................

ಸೂರ್ಯೋದಯಕೆ ಕೈ ಮುಗಿಯುತ್ತಾರೆ

ಅಸ್ತವ ಕೈ ಕಟ್ಟಿ ನಿಂತು ನೋಡುತ್ತಾರೆ

ಇದು ಮನುಜ ವರ್ತನೆ.

...........................................................

ನಾನು ಮುಗಿಯುವುದಿಲ್ಲ

ಮುಗಿಲೂ ಕರಗುವುದಲ್ಲ

ಕಾಲ-ಹರಣವೇ ಎಲ್ಲ!

............................................................................................................................................