ಜಮಾನಾದ ಕಥೆಗಳು - ಯಾರು ಜಾಣರು ಈ ಮೂವರೊಳಗೆ

******

          ಒಬ್ಬ ಇಂಜಿನೀಯರ್ ಬಹಳಷ್ಟು ಕಾಲ ಒಂದು ಮಾರುಮೂಲೆಯ ಊರಿನಲ್ಲಿ ಕೆಲಸ ಮಾಡಿ ರಿಟೈರ್ ಆಗಿ ಹೋದ. ಅವನು ಹೋದ ಮೇಲೆ ಹೊಸ ಇಂಜಿನೀಯರ್ ಒಬ್ಬ ಆ ಜಾಗಕ್ಕೆ ಬಂದ. ಅವನು ಇಲಾಖೆಯ ಕಡತಗಳನ್ನು ಪರಿಶೀಲಿಸುತ್ತಿದ್ದಾಗ ಅಲ್ಲೊಂದು ಜಾಗದಲ್ಲಿ ಹೊಸ ಬಿಲ್ಡಿಂಗನ್ನು (ಸರ್ಕಾರಿ ಅತಿಥಿ ಗೃಹವನ್ನು)  ಕಟ್ಟಲು ಆದೇಶ ಪಡೆದುಕೊಂಡದ್ದನ್ನು ಮತ್ತು ಅದರ ನಿರ್ವಹಣೆಗೆ ಪ್ರತಿ ತಿಂಗಳೂ ಇಂತಿಷ್ಟು ಹಣ ಸರ್ಕಾರಿ ಖರ್ಚಿನ ಬಾಬ್ತಿನಲ್ಲಿ ವಜಾ ಆಗುತ್ತಿತ್ತು. ಈ ಹೊಸ ಇಂಜಿನೀಯರಿಗೆ ಪರಿಸ್ಥಿತಿಯ ಅರಿವಾಯಿತು. ಅದೇನೆಂದರೆ ಅಲ್ಲಿ ಬಿಲ್ಡಿಂಗು ಕಟ್ಟಲು ಹಣ ಸ್ಯಾಂಕ್ಷನ್ ಆಗಿತ್ತು. ಆದರೆ ರಿಟೈರಾದ ಆ ಹಳೇ ಇಂಜಿನಿಯರು ಆ ಹಣವನ್ನೆಲ್ಲಾ ನುಂಗಿ ನೀರು ಕುಡಿದಿದ್ದಲ್ಲದೇ, ಪ್ರತಿ ತಿಂಗಳೂ ಅದರ ನಿರ್ವಹಣೆಗೆಂದೂ ಸಾಕಷ್ಟು ಹಣವನ್ನು ಗುಳುಂ ಮಾಡಿದ್ದ. ಅವನು ಕೆಲಸ ಮಾಡುತ್ತಿದ್ದ ಜಾಗ ಮಾರುಮೂಲೆಯಲ್ಲಿದ್ದುದರಿಂದ ಅಲ್ಲಿಗೆ ಯಾವುದೇ ತನಿಖಾಧಿಕಾರಿಗಳು ಬರುತ್ತಿರಲಿಲ್ಲ. ಒಂದು ವೇಳೆ ಬಂದರೂ ಸಹ ಅವರನ್ನು ಅದು ಹೇಗೋ ಸಮಜಾಯಿಷಿ ಕಳುಹಿಸುತ್ತಿದ್ದ. ಈ ಇಂಜನೀಯರು ಸಹ ಬುದ್ದಿವಂತ, ಅವನೇನು ಮಾಡಿದ ಅಂದರೆ, ಈಗಿರುವ ಬಿಲ್ಡಿಂಗಿಗೆ ಸುಣ್ಣ-ಬಣ್ಣ ಬಳೆಯ ಬೇಕೆಂದು ಮತ್ತು ಸಣ್ಣ-ಪುಟ್ಟ ರಿಪೇರಿ ಮಾಡಬೇಕೆಂದು ಆಗಿಂದಾಗ್ಗೆ ಲೆಕ್ಕ ಬರೆದು ತಾನೂ ಸಾಕಷ್ಟು ಹಣವನ್ನು ನುಂಗಿ ಹಾಕಿದ. ಸ್ವಲ್ಪ ವರ್ಷಗಳ ನಂತರ ಈ ಇಂಜಿನಿಯರೂ ರಿಟೈರಾದ. ಆ ಜಾಗಕ್ಕೆ ಮತ್ತೊಬ್ಬ ಹೊಸ ಇಂಜಿನೀಯರು ಬಂದ. ಅವನೂ ಸಹ ಕಡತಗಳನ್ನೆಲ್ಲಾ ಪರಿಶೀಲಿಸಿದ ನಂತರ ನೋಡುತ್ತಾನೆ ಅಲ್ಲಿ ಯಾವುದೇ ಬಿಲ್ಡಿಂಗಾಗಲಿ ಅಥವಾ ಅತಿಥಿ ಗೃಹವಾಗಲೀ ಇರಲಿಲ್ಲ. ಆದರೆ ಕಡತಗಳ ಪ್ರಕಾರ ಅದನ್ನು ಕಟ್ಟಿಸುವುದಲ್ಲದೇ ಅದನ್ನು ನಿಯಮಿತವಾಗಿ ನಿರ್ವಹಣೆ ಹಾಗೂ ಸಣ್ಣಪುಟ್ಟ ರಿಪೇರಿಗಳನ್ನು ಮಾಡಿಸಿದ್ದಾರೆ. ಅವನಿಗೂ ಸಹ ಪರಿಸ್ಥಿತಿಯ ಅರಿವಾಯಿತು. ಅವನೂ ಕೂಡ ಇಂಜಿನೀಯರನಲ್ಲವೇ, ಪಾಪ ಅವನೇಕೆ ಕಡಿಮೆಯಾದಾನು? ತಕ್ಷಣವೇ ಅವನು ತನ್ನ ಮೇಲಿನಧಿಕಾರಿಗಳಿಗೆ ಈ ಹಿಂದೆ ಕಟ್ಟಿಸಿದ ಕಟ್ಟಡ (ಅತಿಥಿ ಗೃಹ) ಶಿಥಿಲಾವಸ್ಥೆಯಲ್ಲಿದೆ ಅದನ್ನು ರಿಪೇರಿ ಮಾಡಿಸಲು ಸಾಕಷ್ಟು ಖರ್ಚುಗಳನ್ನು ಹಿಂದಿನ ಇಂಜಿನೀಯರ‍್ರರ ಹಯಾಮಿನಲ್ಲಿ ಮಾಡಿದ್ದರೂ ಸಹ ಯಾವುದೇ ಉಪಯೋಗವಾಗಿಲ್ಲ. ಆದ್ದರಿಂದ ಈಗಿರುವ ಕಟ್ಟಡವನ್ನು ಕೆಡವಿ ಹೊಸದೊಂದು ಕಟ್ಟಡವನ್ನು ಕಟ್ಟಲು ಅನುಮತಿ ಕೊಡಿ. ಅದರ ಯೋಜನಾ ವೆಚ್ಚ ಹೀಗಿದೆ ಎಂದು ಹೊಸ ಅತಿಥಿ ಗೃಹದ ನೀಲ ನಕ್ಷೆಯನ್ನು ತಯಾರಿಸಿ ಮತ್ತೆ ಸರ್ಕಾರದಿಂದ ಹೊಸ ಅತಿಥಿ ಗೃಹಕ್ಕೆ ಹಣ ಸ್ಯಾಂಕ್ಷನ್ ಮಾಡಿಸಿಕೊಂಡ ಮತ್ತು ಸ್ವಂತ ಊರಿನಲ್ಲಿ ತನ್ನದೇ ಒಂದು ಸ್ವಂತ ಮನೆಯನ್ನು ಕಟ್ಟಿಸಿಕೊಂಡ.