ನಾ ಹೇಗೆ ಹೇಳಲಿ.....

ನಿನ್ನುಸಿರು ನನ್ನುಸಿರಿಗೆ ತಾಕುವುದ ತಡೆಯಲಾಗದೆ
ಕೋಪಿಸಿಕೊಳ್ಳುವ ನಿನ್ನ ಮೂಗುಬಳೆಗೆ,
ನಾ ಹೇಗೆ ಹೇಳಲಿ.....
ಆ ಉಸಿರು ನನದೆಂದು.....

ನಿನ್ನ ಬೆವರ ಹನಿಗಳು, ನೀ ಮುಡಿದ ಮಲ್ಲಿಗೆಯನು ತೋಯಿಸಿದಾಗೆದ್ದ
ಘಮವನ್ನೆತ್ತಿ, ತಪ್ಪಿಸಿಕೊಳ್ಳಲಾಗದೆ-ನನ್ನೆಡೆಗೇ ತೇಲಿ ಬರುವ ಆ ಗಾಳಿಗೆ,
ನಾ ಹೇಗೆ ಹೇಳಲಿ.....
ಆ ಘಮವು ನನದೆಂದು.....

ನಿನ್ನ ಕೈ-ಬಳೆಗಳು ನನ್ನೆದೆಯ ಮೇಲೆ ಮೂಡಿಸುವ ಹೊಸ ಗುರುತುಗಳನ್ನು
ಕಂಡು, ಮೆಲ್ಲ-ಮೆಲ್ಲನೆ ಮಡಿಯುತಿರುವ ಹಳೆ-ಗುರುತುಗಳು ಹೊಟ್ಟೆಕಿಚ್ಚುಪಟ್ಟಾಗ,
ನಾ ಹೇಗೆ ಹೇಳಲಿ.....
ಆ ಹೊಸ ಗುರುತುಗಳು ನನಗಿಷ್ಟವೆಂದು.....

ನಾನಾಡುವ ಪಿಸುಮಾತಿಗೆ, ನೀ ನಕ್ಕಾಗ,
ಬೇಸರಿಸಿಕೊಳ್ಳುವ ನಿನ್ನ ಕಿವಿಯೋಲೆಗೆ
ನಾ ಹೇಗೆ ಹೇಳಲಿ.....
ಆ ನಗು ಬರೀ ನನಗೆಂದು.....

ಮತ್ತೆ-ಮತ್ತೆ ನನ್ನ ಬೆರಳಿನಿಂದ ತಪ್ಪಿಸಿಕೊಂಡು
ಮೊಗವ ಮುಚ್ಚಿ, ಅಣಕಿಸಿ-ಆಟವಾಡುವ ನಿನ್ನ ಮುಂಗುರುಳಿಗೆ,
ನಾ ಹೇಗೆ ಹೇಳಲಿ.....
ಆ ಹಣೆಯ ಸಾಲು ನನಗಿಷ್ಟವೆಂದು.....