ಶೀಮ ಶಾಲೆಗೆ ಹೋದ ... ಇನ್ನಷ್ಟು ...

 

೧] ಅಕ್ಕೋರು: ಶೀಮಾ, ನಿನ್ನ ಕಾಲು ಚೀಲದ ಜೋಡಿ ವಿಚಿತ್ರವಾಗಿದೆ (ಶೀಮ ಒಂದು ಕಾಲಿಗೆ ನೀಲಿ ಬಣ್ಣದ ಕಾಲು ಚೀಲ, ಇನ್ನೊಂದು ಕಾಲಿಗೆ ಕೆಂಪು ಬಣ್ಣದ ಕಾಲುಚೀಲ ಹಾಕಿ ಕೊಂಡಿದ್ದ).

ಶೀಮ: ಹ್ಞೂ ... ಅಕ್ಕೋರೇ, ಮನೇಲಿ ಕೂಡ ಇನ್ನೊಂದು ಇದೇ ಥರದ ಜೋಡಿ ಇದೆ. 

 

೨] ಅಕ್ಕೋರು: ಶೀಮಾ, ನೀನು ಇವತ್ತು ಬರ್ಕೊಂಡು ಬಂದಿರೋ 'ನಮ್ಮ ಮನೆ ನಾಯಿ' ನಿಬಂಧ, ಎರಡು ವರ್ಷದ ಹಿಂದೆ ನಿನ್ನಣ್ಣ ಬರೆದುಕೊಂಡು ಬಂದಿದ್ದ ನಿಬಂಧದ ನಕಲು ಇದ್ದ ಹಾಗೆ ಇದೆ.

ಶೀಮ: ನಕಲಲ್ಲ, ಅಕ್ಕೋರೇ. ನಮ್ಮನೇಲಿ ಇನ್ನೂ ಅದೇ ನಾಯಿ ಇರೋದಲ್ವಾ? ಅದಿಕ್ಕೆ ಹಾಗೆ.

 

೩] ಅಕ್ಕೋರು: ನಮ್ಮ ಕೈಗಳನ್ನು ಸಾಬೂನು ಉಪಯೋಗಿಸಿ ತೊಳೆಯುವುದರಿಂದ ಭೇದಿ ಮುಂತಾದ ರೋಗಗಳನ್ನು ಹೆಚ್ಚಿನ ಪ್ರಮಾಣದಲ್ಲಿ ತಡೆಗಟ್ಟಬಹುದು. ಈಗ ಹೇಳಿ, ಸೊಳ್ಳೆ ಕಡಿಯೋದ್ರಿಂದ ಹರಡೋ ರೋಗಗಳನ್ನು ಹೇಗೆ ನಿಯಂತ್ರಿಸಬಹುದು?

ಶೀಮ: ಜನರಿಗೆ ಸೊಳ್ಳೆಗಳನ್ನು ಕಡೀಬೇಡಿ ಅಂತ ತಿಳುವಳಿಕೆ ನೀಡಬೇಕು. 

 

೪] ಅಕ್ಕೋರು: ಮಮ್ಮಿಗಳು ಈಜಿಪ್ಟಿನಲ್ಲಿ  ಇರುತ್ತವೆ. ನಾಳೆ ನಿಮಗೆ ಅದರ ಬಗ್ಗೆ ಪಾಠ ಮಾಡುವೆ. 

ಮನೆಗೆ ಬಂದ ಶೀಮ: ಅಪ್ಪಾ, ನೀನ್ಯಾವತ್ತು ಈಜಿಪ್ಟಿಗೆ ಹೋಗಿದ್ದೆ?

ಅಪ್ಪ: ಯಾವತ್ತೂ ಇಲ್ಲವಲ್ಲ ... 

ಶೀಮ: ಹಾಗಾದ್ರೆ ನೀನು ಅಮ್ಮನ್ನ ಎಲ್ಲಿಂದ ತಂದೆ?

 

೫] ಅಕ್ಕೋರು: ಶೀಮಾ, ನೀನ್ಯಾಕೆ ಯಾವತ್ತೂ ಮೈಯೆಲ್ಲಾ ಮಣ್ಣು ಮಾಡ್ಕೊತೀಯಾ? ನನ್ನನ್ನು ನೋಡು, ನಾನು ಹಾಗೆ ಮಾಡ್ಕೊತೀನಾ?

ಶೀಮ: ನಿಮಗಿಂತ ನಾನು ನೆಲಕ್ಕೆ ಹತ್ತಿರ ಇರ್ತೀನಲ್ವಾ, ಅದಕ್ಕೆ ಹಾಗಾಗುತ್ತೆ.

 

೬] ಶೀಮನ ಶಾಲೆಯ ತುಸು ದೂರ ಹೊಸ ಫಲಕವೊಂದನ್ನು ಹಾಕಿದರು. ಅವತ್ತು ಶೀಮ ಶಾಲೆಗೆ ತಡವಾಗಿ ಬಂದ.

ಅಕ್ಕೋರು: ಶೀಮಾ, ಏಕೆ ತಡ?

ಶೀಮ: ಫಲಕದಿಂದಾಗಿ. 

ಅಕ್ಕೋರು: ಅಂದ್ರೆ?

ಶೀಮ: 'ಮುಂದೆ ಶಾಲೆ ಇದೆ, ನಿಧಾನಕ್ಕೆ ಚಲಿಸಿ' ಅಂತ ದೊಡ್ಡದಾಗಿ ಬರೆದಿದ್ದಾರೆ. 

 

೭] ಅಕ್ಕೋರು: ಶೀಮಾ, ಮನೆಯಲ್ಲಿ ನೀನು ಊಟದ ಮೊದಲು ಪ್ರಾರ್ಥನೆ ಮಾಡ್ತೀಯೋ ಇಲ್ವೋ? 

ಶೀಮ: ಮಾಡಲ್ಲ; ನೀವ್ಯಾಕೆ ಕೇಳ್ತೀದಿರೋ ಗೊತ್ತಾಗ್ತಿಲ್ಲ. ನಮ್ಮಮ್ಮ ಅಡಿಗೇನ ಚೆನ್ನಾಗೇ  ಮಾಡ್ತಾರೆ.

 

೮] ಅಕ್ಕೋರು: ಇಂಗ್ಲೀಷಿನಲ್ಲಿ ಆಯ್ (I) ಉಪಯೋಗಿಸಿ ಒಂದು ವಾಕ್ಯ ಮಾಡು.

ಶೀಮ: ಆಯ್ ಇಸ್ (I is)  ... 

ಅಕ್ಕೋರು (ಶೀಮನನ್ನು ಅಷ್ಟಕ್ಕೇ ತಡೆದು): ಮೂರ್ಖ ಶಿಖಾಮಣಿ, ಆಯ್ ಆಮ್ ... (I am ...) ಎಂದು ಹೇಳಬೇಕು.

ಶೀಮ: ಸರಿ ಅಕ್ಕೋರೇ, ಆಯ್ ಆಮ್ ದ ನೈಂತ್ ಲೆಟರ್ ಆಫ್ ಇಂಗ್ಲೀಷ್ ಆಲ್ಫಾಬೆಟ್ (I am the ninth letter of English alphabet)       

...

 

ಮುಂದಿನದು ಸುಮ್ನೆ ತಮಾಷೆಗೆ ...

ಸರಿ, ಸರಿ ... ಮೊದಲಿನದು ಎಲ್ಲಾನೂ ತಮಾಷೆಗೆನೇ :-)  

 

೯] ಅಕ್ಕೋರು: ಶೀಮ, ನೀನು ತುಂಬಾ ಮಾತಾಡ್ತೀಯ.

ಶೀಮ: ಅದು ನಮ್ಮ ಪರಿವಾರದಲ್ಲೇ ಇದೆ.

ಅಕ್ಕೋರು: ಅಂದ್ರೆ?

ಶೀಮ: ನಮ್ಮಜ್ಜ ಮಾಸ್ಟ್ರಾಗಿದ್ರು, ನಮ್ಮಪ್ಪ ವಕೀಲ.

ಅಕ್ಕೋರು: ನಿಮ್ಮಮ್ಮ?

ಶೀಮ: ಅವಳು ಹೆಂಗಸು. 

...

ಪ್ರತೀ ನಗೆಹನಿಗೂ ಒಂದರಿಂದ ಹತ್ರವರೆಗಿನ ಯವುದಾದರೂ ಒಂದು ಅಂಕ ನೀಡಿದರೆ ಚೆನ್ನಾಗಿರುತ್ತೇನೋ? (ಯಾವ ನಗೆಹನಿ ಹೆಚ್ಚು ಜನರಿಗೆ ಇಷ್ಟ ಅಂತ ತಿಳಿಯುತ್ತೆ) ಸರಿ. ಸೊನ್ನೆ ಕೂಡ ಕೊಡಬಹುದು, ಉಣಾ [ಮೈನಸ್] ಬೇಡ ದಯವಿಟ್ಟು :-)