ಹೃತಿಕ್ ನನ್ನ ಮಗನ ಫ್ಯಾನ್..

‘ಹೃತಿಕ್ !! ಅಲ್ರೀ..ನಿಮ್ಮ ಮಗ..’ನನ್ನ ಮಾತನ್ನು ಅರ್ಧಕ್ಕೆ ಕತ್ತರಿಸಿ (ಈ ಹೆಂಗಸರು ನಮಗೆ ಪೂರ್ತಿ ಮಾತನಾಡಲು ಅವಕಾಶ ಎಲ್ಲಿ ಕೊಡುತ್ತಾರೆ) “ ಹೃತಿಕ್ ಅಂಕ್‌ಲ್, ಕೃಶ್
ಫಿಲ್ಮ್ ನೋಡಿಲ್ವಾ ಅಂಕ್‌ಲ್, ಡಿಟೋ ಚಿಂಟೂ ತರಾನೆ ಡ್ಯಾನ್ಸ್ ಮಾಡ್ತಾನೆ... ಅಂಕ್‌ಲ್..... :).. ..ಅಂಕ್‌ಲ್ :( .. ;) ..ಅಂಕ್‌ಲ್.. }:) .. :D ... ”

ಸಿಂಪ್‌ಲ್ ಆಗಿ ಹೇಳುತ್ತೇನೆ: ಅವರ ಮಗನ ಸ್ಕೂಲ್‌ಡೇ ಈದಿನ ಸಂಜೆ. ಅವರ ಯಜಮಾನರು ಕೆಲಸದಿಂದ ಬರುವುದು ಲೇಟ್ ಆಗುತ್ತದೆ. ನಾನು ಸ್ವಲ್ಪ ಮೊದಲೇ ಹೋಗಿ ಅವರಿಗೆ ಸೀಟು ಹಿಡಿದು ಕುಳಿತುಕೊಳ್ಳಬೇಕು.. ಅಷ್ಟೆ.

ನನ್ನ ಕರ್ಮ. ಡಿಸೆಂಬರ್-ಜನವರಿ ತಿಂಗಳು ಬಂತು ಎಂದರೆ ನನಗೆ ನಡುಕ ಸುರುವಾಗುತ್ತದೆ. ಚಳಿಗಲ್ಲ. ‘ಸ್‌ಕೂಲ್ ಡೇ’ಯಿಂದ- ಡೇ ಅನ್ನುತ್ತಾರೆ, ರಾತ್ರಿ ಪ್ರೋಗ್ರಾಂ ಇಟ್ಟುಕೊಳ್ಳುತ್ತಾರೆ. ಸ್ಕೂಲ್‌ನಲ್ಲಿ ೮೦೦ ಮಕ್ಕಳಿದ್ದರೆ ೫೦೦ ಜನ ತುಂಬುವ ಹಾಲ್‌ನಲ್ಲಿ
ಕಾರ್ಯಕ್ರಮ ಇಡುವರು! ನನ್ನಂತಹ ಬಿಟ್ಟಿ ಅಂಕ್‌ಲ್‌ಗಳು ಮೊದಲು ಹೋಗಿ ಸೀಟು ರಿಸರ್ವ್ ಮಾಡಬೇಕು. :(
ಮರಣದಂಡನೆಗಿಂತ ದೊಡ್ಡ ಶಿಕ್ಷೆ ಅಂದರೆ ‘ಸ್ಕೂಲ್‌ಡೇ ಪ್ರೋಗ್ರಾಂ ಸುರುವಿನಿಂದ ಕೊನೆವರೆಗೆ ನೋಡುವುದು’.

‘ಮೈಕಾಸುರ’ ಎಂದು ಯಾರು ಹೆಸರಿಟ್ಟರೋ!?
ನಾನೂ ಯಕ್ಷಗಾನದಲ್ಲಿ ನೋಡಿದ್ದೇನೆ- ರಕ್ಕಸರು ಸ್ಟೇಜ್‌ಗೆ ಎಂಟ್ರಿ ಕೊಡುವಾಗ, ತೂಕಡಿಸುತ್ತಾ ಮಲಗಿದ್ದವರು, ಎದ್ದು ಬಿದ್ದು ಓಡಬೇಕು-ಹಾಗೆ ೩ ಸಲ ಆರ್ಭಟಿಸಿ ಬರುವರು. ನಂತ್ರ ಮಾಮೂಲಿಗಿಂತ ಸ್ವಲ್ಪ ಎತ್ತರದ ಸ್ವರದಲ್ಲಿ ಮಾತನಾಡುವರು.

ಆದರೆ..ಆದರೆ ಈ ಮೈಕಾ ಹಾಗಿಲ್ಲ-ಸೈಲೆಂಸರ್ ತೆಗೆದ ಬೈಕ್‌ನಂತೆ-ಸುರುವಿನಿಂದ ಕೊನೆವರೆಗೂ ಒಂದೇ ಸೌಂಡ್. ಎಡಕಿವಿಯಿಂದ ಬಲಕಿವಿವರೆಗೆ ತೂತು ಬಿದ್ದು-ನೀವು ಕಿವಿ ಮುಚ್ಚಿಕೊಳ್ಳದಿದ್ದರೆ ಮೆದುಳು ಅದರಿಂದ ಹೊರಹೋಗಿ ಬಿಡುವುದು. (ಆ ಗದ್ದಲದಲ್ಲೂ ಹೆಂಗಸರು ಅದು ಹೇಗೆ ಒಬ್ಬರಿಗೊಬ್ಬರು ಮಾತನಾಡಿಕೊಂಡಿರುತ್ತಾರೆ ಎಂಬುದೇ ಆಶ್ಚರ್ಯ!!)

ಸ್ಟೇಜ್‌ಗೆ ಹಾಕಿದ ಬಣ್ಣಬಣ್ಣದ ಲೈಟನ್ನು ಒಳ್ಳೆ ಗಿರಗಿಟ್ಲೆ ತಿರುಗಿಸಿದ ಹಾಗೆ ತಿರುಗಿಸುತ್ತಿರುತ್ತಾರೆ- ಯಾರು ಏನು ಗುರುತೇ ಸಿಗುವುದಿಲ್ಲ. ಅದರಲ್ಲಿ ‘ ನೋಡಿ,
ನೋಡಿ ಅಲ್ಲಿ ಬಲದಿಂದ ಎಂಟನೆಯವನೇ ನಮ್ಮ ಚಿಂಟು’ ಅಂದ್ರು.೧-೨-೩-
ಗೊತ್ತಾಗಲಿಲ್ಲ-ಹೇಳಲಾಗುತ್ತದಾ? ‘ವ್ಹಾವ್, ಚಂದ ಡ್ಯಾನ್ಸ್ ಮಾಡುತ್ತಾನೆ’.
‘ಚಲ್ ಚಂಯ ಚೈಂಯಾ ಚೈಂಯಾ..’ಎಂದಾಗ ಮಧ್ಯಾಹ್ನದಿಂದ ಏನೂ ತಿಂದಿಲ್ಲ,
ಒಂದು ಸೆಟ್ ದೋಸೆನಾದರೂ ತಿಂದು ಬರೋಣ ಅನಿಸಿತು. ಚಪ್ಪಾಳೆ ತಟ್ಟುತ್ತಾ ಡ್ಯಾನ್ಸ್ ಮುಗಿಯುವುದನ್ನು ಕಾಯುತ್ತಿದ್ದೆ.
‘ಸ್ವಲ್ಪ ಸೀಟು ನೋಡಿಕೊಳ್ಳಿ, ನಾನು ಮಗನನ್ನು ಕರಕೊಂಡು ಬರುತ್ತೇನೆ’ ಎಂದು ನಾಪತ್ತೆಯಾದ ಈ ಫ್ಯಾಮಿಲಿ ಕಾರ್ಯಕ್ರಮ ಮುಗೀಲಿಕ್ಕಾಗುವಾಗ,ಹೊಟ್ಟೆ ತುಂಬಾ ತಿಂದು, ಕೈಬಾಯಲ್ಲಿ ಲೇಸ್-ಮಣ್ಣು ಮಸಣ ಮುಕ್ಕಿಕೊಂಡು ಬಂದರು.

‘ಇನ್ನು ಹೋಗೋಣ್ವ ಅಂಕ್‌ಲ್, ನಿಮ್ಮ ಕಾರು ಎಲ್ಲಿ ಪಾರ್ಕ್ ಮಾಡಿದ್ದೀರಿ? ಗೇಟಿನ ಹತ್ತಿರ ತನ್ನಿ ಅಂಕಲ್, ನಾವಲ್ಲಿ ವೈಟ್ ಮಾಡುತ್ತೇವೆ ಅಂಕ್‌ಲ್.’ ಎಂದು ಖಾಲಿ ಲೇಸ್ ಪ್ಯಾಕೆಟ್ ನನ್ನೆದುರು ಬಿಸಾಕಿ ಹೋದರು.