ಹೊಸತು ವರುಷ , ತರಲಿ ಹರುಷ

ಬಯಲ ಮರಗಳ ತುಂಬ
ಜೀವಸೆಲೆಯುಸಿರು
ವಸಂತ ತಂದಿಹ ನೋಡು
ಮರಮರದಿ ಹಸಿರು ||

ಎಲ್ಲೆಲ್ಲೂ ಹೊಸ ಹರುಷ
ಉತ್ಸಾಹ ಕಿರಣ
ನವ ವರುಷ ಹಾದಿಯಲಿ
ನಗೆ ಬಗೆಯ ಸ್ಫುರಣ ||

ಸಂತಸವನುಕ್ಕಿಸುವ
ಸಂತರೆದೆಯಲ್ಲೂ
ಉತ್ಸಾಹವಿರಿಸಿ
ಕಹಿ ಬೇವ ಚಿಗುರಲ್ಲೂ ||

ವಸಂತನದೆ ಹೆಸರಿಹುದು
ಚಿಗುರೆಲೆಯ ತುಂಬ
ಪ್ರಕೃತಿಯ ಒಡಲಿನಲಿ
ಅವನದ್ದೆ ಬಿಂಬ ||

ನವ ಜೀವ ನವ ಭಾವ
ಸಿರಿ ಬಯಲಿನಲ್ಲಿ
ನರ್ತನವಗೈದಿಹುದು
ಹೂ ನಗೆಯ ಚೆಲ್ಲಿ ||

ಪ್ರತಿ ಜೀವದಲಿ ಹೊಸತು
ಹುರುಪು ಬಂದಾಯ್ತು
ಜೀವನಕೆ ಚೇತನದ
ಚಿಲುಮೆ ತಂದಾಯ್ತು ||