ಅದ್ವಿತೀಯ ಚೆಲುವೆ

ಪ್ರೇಮ ಸುಧೆಯನು ಎದೆಯ ಗೂಡಲಿ

ಮೆಲ್ಲ ಮೆಲ್ಲನೆ ಸುರಿದಳು

ಸುಮವು ಬಿಮ್ಮನೆ ಬಿರಿದು ನಿಲ್ಲುತ

ಕಂಪು ಸೂಸಿತು ಮನದೊಳು||

ಚೆಲುವ ಚಂದ್ರಿಕೆ ಕಾವ್ಯ ಕನ್ನಿಕೆ

ಚೆಲುವೆ ರೂಪವು ಸುಂದರ

ಒಲವೆ ಹಾಸಿಗೆ ಒಲವೆ ಹೊದಿಕೆಯು

ಪ್ರೀತಿ ಬಾಳಿಗೆ ಹಂದರ||

ಇಂದ್ರ ಲೋಕದ ಯಾವ ಅಪ್ಸರೆ

ಸಾಟಿ ಇಲ್ಲವೊ ಚೆಲುವೆಗೆ

ಚಂದ್ರ ಬಾನಲಿ ನಾಚಿ ಕರಗಿದ

ಇವಳ ಅಂದದ ಚೆಲುವಿಗೆ||

ಮೇಘರಾಜನು ಮಳೆಯ ರೂಪದಿ

ಜೊಲ್ಲು ಸುರಿಸಿದ ಬಾಲೆಗೆ

ಸೂರ್ಯಕಾಂತಿಯ ಕುಸುಮ ತಿರುಗಿತು

ಚೆಲುವೆ ಇರುವೆಡೆ ಮೆಲ್ಲಗೆ||

ಭವ್ಯ ಬಾಲೆಯು ದಿವ್ಯ ಕೋಮಲೆ

ಮತ್ತೆ ಬಾರಳು ಭುವಿಯಲಿ

ಇಂಥ ಸೊಬಗಿನ ಭವ್ಯ ಬೆಡಗಿಯ

ವರಿಸಿ ನಿಂದೆನು ಇಳೆಯಲಿ||

-*ಶ್ರೀ ಈರಪ್ಪ ಬಿಜಲಿ*