ಅನಾಮಿಕೆಯ ಪುರಾಣ

ಈ ಹಿಂದೆ ಶಿವಕುಮಾರರವರು ಮಧ್ಯಮ ಬೆರಳಿನ ಬಗ್ಗೆ ಬರೆದಿದ್ದರು. ನನಗೂ ಸಂಸ್ಕೃತದಲ್ಲಿ ಅನಾಮಿಕಾ (ಉಂಗುರ ಬೆರಳಿನ) ಬಗ್ಗೆ ತಿಳಿಸಬೇಕೆನ್ನಿಸಿದೆ.
ಸಂಸ್ಕೃತದಲ್ಲಿ
ಅಂಗುಷ್ಠ=ಹೆಬ್ಬೆರಳು
ತರ್ಜನೀ=ತೋಱುಬೆರಳು (ಕೆರೆಯುವ ಬೆರಳು. ಸಾಮಾನ್ಯವಾಗಿ ಈ ಬೆರಳಿನಿಂದಲೇ ಕೆರೆಯುವುದು).
ಮಧ್ಯಮಾ=ನಡುವಿನ ಬೆರಳು
ಅನಾಮಿಕಾ=ಹೆಸರಿಲ್ಲದವಳು
ಕನಿಷ್ಠಿಕಾ=ಕಿಱುಬೆರಳು.

ಕಾಳಿದಾಸನ ಕಾವ್ಯವೈಶಿಷ್ಠ್ಯ ಹೇೞುವ ಒಂದು ಚಾಟುಪದ್ಯವೊಂದಿದೆ.

ಪುರಾ ಕವೀನಾಂ ಗಣನಾಪ್ರಸಂಗೇ ಕನಿಷ್ಠಿಕಾಧಿಷ್ಟಿತಕಾಲಿದಾಸಾ|
ಅದ್ಯಾಪಿ ತತ್ತುಲ್ಲ್ಯ ಕವೇರಭಾವಾದನಾಮಿಕಾ ಸಾರ್ಥವತೀ ಬಭೂವ||

ಅರ್ಥ: ಹಿಂದೆ ಕವಿಗಳನ್ನು ಲೆಕ್ಕ ಹಾಕುವಾಗ ಮೊದಲಿಗೆ ಕಿಱುಬೆರಳಿನಿಂದ ಪ್ರಾರಂಭಿಸಿದಾಗ ಅದು ಕಾಳಿದಾಸನ ಲೆಕ್ಕಕ್ಕೆ ಸೇರಿತು. ಇಂದಿಗೂ ಅವನಂಥ ಕವಿಗಳು ಸಿಗದಿರುವುದಱಿಂದ ತಱುವಾಯದ ಅನಾಮಿಕೆ (ಉಂಗುರಬೆರಳು) ಹೆಸರಿಗೆ ತಕ್ಕಂತೆ ಹೆಸರಿಲ್ಲದ್ದೇ ಆಯ್ತು.