ಅವಧೂತ ಮುಕುಂದೂರು ಸ್ವಾಮಿಗಳು ಹೇಳಿದ 'ರಾಮಣ್ಯ'

ಅವಧೂತ ಮುಕುಂದೂರು ಸ್ವಾಮಿಗಳು ಹೇಳಿದ 'ರಾಮಣ್ಯ'

By kavinagaraj on Tue, 06/11/2013 - 15:42
     ಅವಧೂತ ಮುಕುಂದೂರು ಸ್ವಾಮಿಗಳು ಹಳ್ಳಿಯ ಜನರಿಗೆ ಅವರು ಆಡುವ ಭಾಷೆಯಲ್ಲಿಯೇ ಜೀವನಾದರ್ಶದ ವಿಚಾರಗಳನ್ನು ಅವರಿಗೆ ಅರ್ಥವಾಗುವಂತೆ ಹೇಳುತ್ತಿದ್ದರು. ದಿ.ಬೆಳಗೆರೆ ಕೃಷ್ಣಶಾಸ್ತ್ರಿಗಳು ಅವರ ಕುರಿತು ಬರೆದ ವೈಚಾರಿಕ ಕೃತಿ 'ಯೇಗ್ದಾಗೇನೈತೆ?'ಯಲ್ಲಿ ಅವಧೂತರು ರಾಮಾಯಣದ ಕುರಿತು ವ್ಯಾಖ್ಯಾನಿಸಿದ ಕುರಿತು ತಿಳಿಸಿರುವುದು ಮನೋಜ್ಞವಾಗಿದೆ. ರಾಮಾಯಣ ಕುರಿತು ಒಬ್ಬರು, "ಅದರಲ್ಲೇನು ವಿಶೇಷ? ರಾವಣಾಸುರ ಸೀತೇನ ಕದ್ದ, ಕಪಿಸೈನ್ಯ ಕಟ್ಕೊಂಡು ಲಂಕಾ ಪಟ್ಣಕ್ಕೆ ಹೋಗಿ ಅವನನ್ನು ಕೊಂದು ರಾಮ ಸೀತಮ್ಮನ್ನ ತಂದ ಅಷ್ಟೇ ತಾನೆ?" ಎಂದಾಗ ಅವಧೂತರು, "ಅದು ಮ್ಯಾಗಳ ಕಥೆ ನೀನೇಳೋದು. ಆದರೆ ಒಳಗೈತಪ್ಪಾ ಅದರ ಸಕೀಲು. ಆ ಸಕೀಲು ಇಡಕಂಡ್ರೆ ನೋಡಪ್ಪ ಆ ಕತೇನೇ ಬೇರೆ." 
     "ಆ ಸಕೀಲನ್ನು ನಮಗೂ ತಿಳಿಯುವಂತೆ ಹೇಳಿ ಸ್ವಾಮಿ ನೋಡೋಣ" ಎಂದಾಗ ಅವರು, "ಅದು ಸಕೀಲು ಅಂದ್ರೆ ನೋಡೋದಲ್ಲ ಮಗ. ಅದನ್ನು ಇಡೀಬೇಕು. ಇಡಿದು ನಡೀಬೇಕು. ನಡೆದು ಪಡೀಬೇಕು. ಆಗ ಅದರ ಸವಿ, ಸೊಗಸು, ಸುಖ. ಅದಕ್ಕೇನಪ್ಪಾ ರಾಮಣ್ಯ ಅಂದ್ರೆ ಸಾಮನ್ಯ ಅಲ್ಲ. ಅದೊಂದು ಇನ್ನೊಂದು ಮಾತೈತೆ. ಅದೇನು ಮಹಾ ಬ್ರಹ್ಮವಿದ್ಯೆನೇನೋ ಅಂತಾರೆ. ಬ್ರಹ್ಮವಿದ್ಯೆ ಅಂದ್ರೆ ಸಾಮಾನ್ಯ ಅಲ್ಲ. ಅದು ಎಲ್ರಿಗೂ ಎಂಗಂದ್ರಂಗೆ ಸಿಗೋದಲ್ಲ. ಸಾಧಿಸಿ ತಿಳಿದವರಿಗೆ ಸಿಗತೈತೆ ಅದರ ರಾಸ್ಯ."
     "ನೋಡಪ್ಪಾ ದಸರತ ಅಂತ ಒಬ್ಬ. ಅಂಗಂದ್ರೇನು? ಕರ್ಮೇಂದ್ರಿಯಗಳು ಐದು. ಜ್ಞಾನೇಂದ್ರಿಯಗಳು ಐದು. ಇವು ಅತ್ತು ಸೇರಿಸಿ ರಥ ಮಾಡಿಕೊಂಡು ಹತ್ತಿ ಸವಾರಿ ಮಾಡಿದ ಅವನು, ಅಂದ್ರೆ ಇಂದ್ರಿಯಗಳನ್ನು ಸ್ವಾಧೀನ ಮಾಡಿಕೊಂಡವನು ಯಾರೇ ಆಗಿರಲಿ ಅವನು ದಸರತ. ಅಂತವನು ಯಾವಾಗಲೂ ಸಂತೋಸಾನೇ ಪಡೀತಾನೆ. ಆ ಸಂತೋಸಾನೇ ರಾಮ. ಅವನೇ ಆನಂದ, ರಾಮ ಅಂದ್ರೆ ಆನಂದ. ಅವನ ತಮ್ಮಗಳು ಲಕ್ಷ್ಮಣ, ಭರತ, ಸತೃಗ್ನ, ಆನಂದದ ಬೆಳಕು ಮನಾನಂದ, ಆತ್ಮಾನಂದ, ಬ್ರಹ್ಮಾನಂದ."
     "ಸೀತಮ್ಮನಿಗೆ ತಂದೆ ತಾಯಿ ಇಲ್ಲ. ಅಂಗೇ ತಾನಾಗೇ ಬಂದವಳು ಸೀತೆ. ಜ್ಞಾನಾಂಬಿಕೆ. ಜನಕ ರಾಜ ಯಗ್ನ ಮಾಡಿದ. ಸಾಧನೆ ಮಾಡಿದ. ಜ್ಞಾನಾಂಬಿಕೆ ಸಿಕ್ಕಿದಳು. ಜನಕರಾಜನು ರುಸೀನೂ ಆಗಿದ್ದ. ರಾಮ ಧನಸ್ಸು ಮುರಿದ. ಧನಸ್ಸು ಅಂದ್ರೆ ಶರೀರ. ಇದನ್ನು ಮುರಿದ್ರು, ಅಂದ್ರೆ ಸ್ಥೂಲ ಶರೀರ ದಾಟಿ ವೋಗಿ ಸೀತೆಯನ್ನು ಪಡೆದ. ಅಲ್ಲಿಗೆ ರಾಮ ಅಂದ್ರೆ ಆನಂದ, ಸೀತೆ ಅಂದ್ರೆ ಜ್ಞಾನ. ಎರಡೂ ಬಂದದ್ದು ಅಂದ್ರೆ ಜ್ಞಾನಾನಂದ ಅಂಬೋದು ಮೂಡಿಬಂತು."
     "ಇನ್ನು ಮಾಯಾಮೃಗ. ಅದು ಜಿಂಕೆ. ಬಂಗಾರದ ಜಿಂಕೆ. ಅಂದಮೇಲೆ ಇದ್ದ ಕಡೆ ಇರೋದಲ್ಲ. ಅದನ್ನ ಇಡ್ಕೊಂಡು ಬಾ ಅಂದ್ಲು ಸೀತಮ್ಮ. ರಾಮ ಕೊಂದೇಬಿಟ್ಟ. ಅಂದ್ರೆ ಈ ಜಗತ್ತಿನ ಐಶ್ವರ್ಯದ ಆಸೆ ಮಾಯೆ. ಅದನ್ನು ಕೊಂದೇಬಿಟ್ಟ. ಅಂದ್ರೆ ಜ್ಞಾನಾನಂದ ಇದ್ದಲ್ಲಿ ಮಾಯೆ ಸತ್ತುಹೋಗುತ್ತೆ ಅಂಬೋ ಮಾತು ಅದು."
     "ರಾವಣ ಅತ್ತು ತಲೆ. ಅದೇ ಜ್ಞಾನೇಂದ್ರಿಯ, ಕರ್ಮೇಂದ್ರಿಯಗಳು. ದಸರತ ಅವನ್ನೇ ರತ ಊಡಿಕೊಂಡು ಸವಾರಿ ಮಾಡ್ದ. ಅಂದ್ರೆ ಅವನ್ನ ತಾನೇಳ್ದಂಗೆ ಕೇಳಾಂಗೆ ಸ್ವಾಧೀನ ಮಾಡಿಕೊಂಡಿದ್ದ. ಅದೇ ರಾವಣಾಸುರ ಜ್ಞಾನೇಂದ್ರಿಯ, ಕರ್ಮೇಂದ್ರಿಯಗಳನ್ನು ತಲೆ ತುಂಬ ತುಂಬಿಕೊಂಡು ಅವನ್ನೇ ಒತ್ಕೊಂಡು ಓಡಾಡ್ತಿದ್ದ. ಅವು ಅವನ್ತಲೆ ಮೇಲೆ ಕುಂತು ಅವನ್ನ ಆಟ ಆಡಿಸ್ತಿದ್ವು. ಅಂದ್ರೆ ಇಂದ್ರಿಯಗಳಿಗೆ ದಾಸನಾಗಿದ್ದ. ಇವನಿಗೆ ಇಪ್ಪತ್ತು ಕೈಗಳು. ನಿಜ-ನಿಜ ಇಪ್ಪತ್ತು ಕೈಗಳು, ಸಪ್ತಧಾತುಗಳು, ಸಪ್ತ ವ್ಯಸನಗಳು, ಅರಿಷಡ್ವರ್ಗಗಳು. ಅಲ್ಲಿಗೆ ಇಪ್ಪತ್ತು ಕೈಗಳು ಆದವಲ್ಲಾ, ಅವುಗಳದೇ ಕಾರುಬಾರು. (ನಗುತ್ತಾ) ಎಂಗೈತೆ ನೋಡು."
     "ಅವನು ಸೀತಮ್ಮನನ್ನು ಬಯಸಿದ. ಅಂದರೆ ಜ್ಞಾನಾಂಬಿಕೆಯನ್ನು ಅಲ್ಲ. ಸಪ್ತ ಧಾತುಗಳು, ಸಪ್ತ ವ್ಯಸನಗಳು, ಅರಿಷಡ್ವರ್ಗಗಳನ್ನು ಒತ್ಕೊಂಡು ಮೆರೆಯೋರಿಗೆ ಜ್ಞಾನಾಂಬಿಕೆ ವಶವಾದಾಳೆ? ಅವಳು ಅಶೋಕವನದಾಗಿದ್ಲು. ಅವಳಿಗೆ ಶೋಕ ಎಲ್ಲೀದು?" ನಕ್ಕರು.
     "ನೋಡು ಸುಗ್ರೀವ ಅಂದ್ರೆ ಒಳ್ಳೆ ತಲೆ, ಅಂದ್ರೆ ಒಳ್ಳೆ ಯೋಚನೆಗಳು. ಜಾಂಬುವಂತ, ಅವನು ಬ್ರಮ್ಮನ ಮಗ, ಅಂದ್ರೆ ಬ್ರಮ್ಮಾನಂದ. ಇನ್ನು ಆಂಜನೇಯ ಒಳ್ಳೇ ದೃಷ್ಟಿ ಇರೋ ಇವರೆಲ್ಲಾ ಆನಂದ ಅಂಬೋ ರಾಮರ ಗುಂಪು. ರಾವಣ ಅಂಬೋ ಅಹಂಕಾರ, ಮಮಕಾರಗಳನ್ನು ಕತ್ತರಿಸಿ ಆಕಿಬಿಟ್ರೆ ಆಗ ಒಳ್ಳೆ ಮನಸ್ಸು, ಒಳ್ಳೇ ದೃಷ್ಟಿ ಬ್ರಮ್ಮಗ್ನಾನ, ಎಲ್ಲಾ ಒಂದಾದವು. ಅಂದ್ರೆ ಗ್ನಾನಾನಂದ ಸಿಕ್ಕಿತು."
     "ನೋಡಪ್ಪ ಸಾಧಿಸಿದರೆ (ತಮ್ಮ ಶರೀರವನ್ನು ತೋರಿಸಿ) ಎಲ್ಲಾ ಇದ್ರಾಗೆ ಐತೆ ರಾಮಾಯಣ. ಇದೇ ಅದರ ಸಕೀಲು."
     "ಅವನ್ನೋಡು, ವಾಲ್ಮೀಕಿ ರುಸಿ, ಅವನೇ ಅಂತೆ ಈ ಸಕೀಲೆಲ್ಲಾ ಇಂಗಡಿಸಿ ಕತೆ ಮಾಡಿ ಬರೆದೋನು. ಅವನಿನ್ಯಾರು? ವಾಲ್ಮೀಕಿ ಅಂದ್ರೆ ವುತ್ತ ಅಂತಾರೆ. ಈ ಶರೀರವೇ ವುತ್ತ. ಇದ್ರಾಗೆ ತಯಾರಾದ ಗ್ನಾನಾನಂದ ಪಡೆದೋನೆ ರುಸಿ. ಅವನೇ ವಾಲ್ಮೀಕಿ ರುಸಿ. ಅವನಿಗಲ್ದೆ ಇನ್ಯಾರಿಗೆ ಸಾಧ್ಯ ಆದಾತು ಈ ಒಳಗಿನ ಸಕೀಲೆಲ್ಲಾ ಸೇರಿಸಿ ಅನುಭವ ತಕ್ಕಂಡು ಅವನ್ನೇ ಇಂಗೆ ಕತೆ ಕಟ್ಟಿ ಏಳಾಕೆ? ಆನ ಪುರಾಣ ಓದಿ ವರಗೇ ತಿಳ್ಕಂಡು ವರಗೇ ಅದಕ್ಕೆ ತಕ್ಕಂತ ವರಗಿನ ಆಟ ಆಡ್ತಾರೆ."
*************

Comments

Submitted by nageshamysore Tue, 06/11/2013 - 18:06

ನಾಗರಾಜ್ ಸಾರ್, ಸೊಗಸಾದ ಮಾರ್ಮಿಕ ರೀತಿಯಲ್ಲಿ ರಾಮಾಯಣ ಹೇಳಿಸಿ - ಅದನ್ನು ನೋಡುವ ದೃಷ್ಟಿಕೋನವನ್ನೆ ಬದಲಾಯಿಸಿಬಿಟ್ಟಿರಿ. ಯಾವುದೊ ಸಂಘಟನೆ ನಡೆಯುವುದನ್ನು ನೋಡಿ, ಕೇಳಿ ಅರಿಯುವುದಲ್ಲ ಮುಖ್ಯ , ಅದರೊಳಗೇನಿದೆಯೆಂದು ಅರಿಯುವುದು ಮುಖ್ಯವೆನ್ನುವೆ ಸಂದೇಶ ತುಂಬ ಚೆನ್ನಾಗಿ ಬಿಂಬಿತವಾಗಿದೆ..- ನಾಗೇಶ ಮೈಸೂರು, ಸಿಂಗಪುರದಿಂದ
Submitted by kavinagaraj Wed, 06/12/2013 - 10:34

ಮೈಸೂರು ನಾಗೇಶರೇ, ನೀವು ಹೇಳಿರುವುದು ಸರಿ. 'ಯೇಗ್ದಾಗೇನೈತೆ?' ಪುಸ್ತಕದಲ್ಲಿ ಇಂತಹ ಹಲವು ಘಟನೆಗಳ ನಿರೂಪಣೆಯಿದೆ. ಅವಕಾಶವಾದರೆ ಓದಿರಿ. ಧನ್ಯವಾದಗಳು.
Submitted by partha1059 Tue, 06/11/2013 - 18:39

ನಾಗರಾಜರೆ ಮುಕುಂದೂರು ಸ್ವಾಮಿಗಳ ಜೀವನ ಕತೆ, ಅದು ನಾನು ಓದಿದ್ದೆ. ತುಂಬಾ ಚೆನ್ನಾಗಿದೆ. ಹಾಗೆ ಅದರಲ್ಲಿ ಒಮ್ಮೆ ಅವರು ಬೆಂಗಳೂರಿಗೆ ಬಂದಿದ್ದನು ಇದೆ ರೀತಿ ಬೇರೆಯೆ ಅರ್ಥಕೊಟ್ಟು ಹೇಳಿದ್ದರು. ಅವರ ಪ್ರತಿ ಲೌಕಿಕ ಮಾತಿಗು ಒಂದು ಪಾರಮಾರ್ಥಿಕ ಅರ್ಥಕೊಟ್ಟು ಹೇಳುತ್ತಿದ್ದರು. ಒಮ್ಮೆ ಬಲಗಾಲು ಮುರಿದಿ ಆಸ್ಪತ್ರೆಯಲ್ಲಿದ್ದಾಗ ಹೇಳಿದ್ದರು, ಎದ್ದು ಓಡಿಹೋಗಬಾರದು ಎಂದು ಕಾಲು ಕಟ್ಟಿಹಾಕಿದ್ದಾರೆ, ಆದರೆ ಕಟ್ಟಿರುವರು ದಡ್ಡರು, ಯಾರು ಓಡಾಡುತ್ತಾನೊ ಅವನನ್ನು ಕಟ್ಟೆ ಇಲ್ಲ, ಯಾರಿಗೆ ಓಡಾಡಲು ಆಗಲ್ಲವೊ ಅವನನ್ನು ಕಟ್ಟಿಹಾಕಿದ್ದಾರೆ ಎಂದು. ಆ ರೀತಿ ಅನೇಕ ಮಾತುಗಳು ನಮ್ಮ ಮನಗೆಲ್ಲುತ್ತವೆ, ಒಮ್ಮೆ ಇದೆ ಪುಸ್ತಕ ಆದರಿಸಿದ ನಾಟಕವನ್ನು ಹೋಗಿ ನೋಡಿದ್ದೆ ಅದ್ಬುತವಾಗಿ ಮೂಡಿತ್ತು.
Submitted by nadahalli Wed, 06/12/2013 - 10:37

ಸಂಪೂರ್ಣ ಕತೆಯನ್ನು ಪುಸ್ತಕದಿಂದ ಯತಾವತ್ತಾಗಿ ಇಳಿಸಿದ ಲೇಖಕರು ಪುಸ್ತಕದ ಹೆಸರಿನ ವಿಷಯದಲ್ಲಿ ಎಚ್ಚರ ತಪ್ಪಿದಂತಿದೆ. "ಏಗ್ದಾಗೆಲ್ಲಾ ಐತೆ" ಪುಸ್ತಕವನ್ನು ನಾನು ಓದಿದ್ದೇನೆ. ಈ 'ಯೇಗ್ದಾಗೇನೈತೆ?' ಎನ್ನುವ ಹೆಸರು ಹೊಸತು. ಇದೆಲ್ಲಿಂದ ಬಂತೆಂದು ಸ್ವಲ್ಪ ತಿಳಿಸಿದರೆ ಒಳ್ಳೆಯದು.
Submitted by kavinagaraj Wed, 06/12/2013 - 10:41

ನಿಜ ನೀವು ಹೇಳಿರುವುದು. ಅದು 'ಏಗ್ದಾಗೆಲ್ಲಾ ಐತೆ'ಯೂ ಅಲ್ಲ. ಅದು 'ಯೇಗ್ದಾಗೆಲ್ಲಾ ಐತೆ'. ಆ ಪುಸ್ತಕವನ್ನು ಎಲ್ಲರೂ ಓದಲಿ ಎಂಬುದು ನನ್ನ ಆಶಯ. ಪುಸ್ತಕದ ಶೀರ್ಷಿಕೆ ತಪ್ಪಾಗಿದ್ದು, ಸರಿಪಡಿಸಲು ಸಂಪದ ನಿರ್ವಾಹಕರಲ್ಲಿ ನನ್ನ ಬೇಡಿಕೆಯಿದೆ.
Submitted by kavinagaraj Wed, 06/12/2013 - 10:37

ನಿಜ ಪಾರ್ಥರೇ, ಜಾವಗಲ್ ಸಮೀಪವಿರುವ ಮುಕುಂದೂರು ಮಠದಲ್ಲಿರುವ ಫಲಕದಲ್ಲಿದ್ದ ಸ್ವಾಮಿಗಳ ಫೋಟೋ ಸೆರೆ ಹಿಡಿದು ಇಲ್ಲಿ ಹಾಕಿರುವೆ. ಈಗ ಆ ಮಠ ಇತರ ಮಠಗಳಂತೆ ಸಾಮಾನ್ಯ ಮಠವಾಗಿದೆ. ಮುಕುಂದೂರು ಸ್ವಾಮಿಗಳ ಗದ್ದುಗೆ ನೋಡಬಹುದು. ನೋಡಬೇಕಾದ ಪರಿಸರ ಅಲ್ಲಿದೆ. ಧನ್ಯವಾದಗಳು.
Submitted by Premashri Wed, 06/12/2013 - 11:19

ಹೊಸ ದೃಷ್ಟಿಕೋನದಿಂದ ರಾಮಾಯಣವನ್ನು ವ್ಯಾಖ್ಯಾನಿಸಿದ ರೀತಿ ಇಷ್ಟವಾಯಿತು.ಈ ಪುಸ್ತಕವನ್ನು ಓದಬೇಕೆನಿಸಿದೆ.ಧನ್ಯವಾದಗಳು.
Submitted by kavinagaraj Wed, 06/12/2013 - 15:02

2007ರಲ್ಲೇ 7 ಮುದ್ರಣಗಳನ್ನು ಕಂಡ ಈ ಪುಸ್ತಕದ ಬೆಲೆ ರೂ.50/-. ಪ್ರಕಾಶಕರು: ಅಭಿನವ, 17/18-2, ಮೊದಲನೆ ಮುಖ್ಯ ರಸ್ತೆ, ಮಾರೇನಹಳ್ಳಿ, ವಿಜಯನಗರ, ಬೆಂಗಳೂರು. ಓದಬೇಕಾದ ಪುಸ್ತಕವಿದು. ಧನ್ಯವಾದಗಳು.