ಅವಳ ಸ್ವಗತ

ಮುಂಜಾನೆಯ ಚಳಿಯಲ್ಲಿ

ಮೈ ಬಿಸಿಯೇರುತ್ತಿದ್ದರೂ

ತಣ್ಣಗಿನ ನೀರಲ್ಲಿ ಜಳಕವ ಮಾಡಿ

ಓದುತ್ತಿದ್ದೆ….ಕನಸ ಹೆಬ್ಬಾಗಿಲಿನಲ್ಲಿ

****

ಕನ್ನಡಿ ನೋಡಿ ಕೆಂಪಾಗುತ್ತಿದ್ದೆ

ಕಾಡಿಗೆ ಕಣ್ಣಲ್ಲಿ ಕಾಡುವ ಕನಸುಗಳು

ಎಲ್ಲಿದ್ದೆ ನೀನು..? ಜೊತೆಗೆ ನಾನು,

ನಗುವ ತೊಟ್ಟಿಲಲ್ಲಿ ನೂರು ಕನಸು..

****

ಶಬರಿಯಾಗಿ ನಾ ಕಾದೆ,ಶಕುಂತಲೆ ನಾನಾದೆ

ಕೊಳಲನೂದುವ ಕೃಷ್ಣನ ಕಾಯೋ ರಾಧೆಯಾದೆ

ಬಿಂದಿಯಾಗಿ ಬಂದ, ಬಂಧಿಯಾಗಿ ಹೋದೆ

ಅಹಲ್ಯೆಯಾಗಿ ನಾನು ಸ್ವತಃ ಕಲ್ಲಾದೆ!

****

ಮಳೆಬಿಲ್ಲ ಪಡೆಯೋ ಬಯಕೆಯಿಂದ

ಗಾಳಿಪಟ ನಾನಾದೆ, ಅವನು ದಾರವಾದ

ಪಂಜರದ ಬಾಗಿಲು ತೆರೆದಿಟ್ಟರೂ,

ಹಾರಲಾಗದ ಗಿಣಿಯಾದೆ ನಾನು..

****

ನನ್ನಿ ಎದೆಯಲ್ಲಿ ಮುಟ್ಟಲಾಗದ ನೋವು

ಮುಖವಾಡದ ಮುಗುಳ್ನಗೆಯ ನೋಡಿ

ಕನಸ ಕಟ್ಟಬೇಡ ಗೆಳೆಯ

ನಗುವ ಹೂವಿನ ಹಿಂದೆ ನೋವಿದೆ

*****

ನಿರಾಶೆ, ಹತಾಶೆ, ಜೊತೆಯಾಗಿದೆ ಈಗ

ನೂರು ನೋವ ಬಿಚ್ಚಿಡಲಾರೆ ನಿನ್ನ ಕವಿತೆಗೆ

ಕ್ಷಮಿಸಿ ಬಿಡು ಗೆಳೆಯ…….

ನನ್ನಕನಸುಗಳು ಕರಗಿ ಹೋಗಿವೆ

****

praveen chandra