ಎಂದೋ ಮಾಡೋ ಕೆಲಸ ಇಂದೇ ಮಾಡೋಣ !

ನಾಳೆ ಮಾಡೊ ಅಡುಗೆಗೆ ಅಂತ ಇಂದೇ ತರಕಾರಿ ಹೆಚ್ಚಿಟ್ಟ ಹಾಗೆ
ನಾಳೆ ತೊಡೋ ಉಡುಗೆಯನ್ನು ಇಂದೇ ಇಸ್ತ್ರಿ ಮಾಡಿಟ್ಟುಕೊಂಡ ಹಾಗೆ
ನಾಳೆ ಹೋಗೋ ಸಿನಿಮಾಕ್ಕಂತ ಇಂದೇ ಟಿಕೆಟ್ ಕೊಂಡಿಟ್ಟ ಹಾಗೆ
ನಾಳೆ ಹುಟ್ಟೋ ಕೂಸಿಗಂತ ಇಂದೇ ಕುಲಾವಿ ಹೊಲೆದಿಟ್ಟ ಹಾಗೆ
ನಾಳೆ ತಿನ್ನೋ ದೋಸೆಗಾಗಿ ಇಂದೇ ಅಕ್ಕಿ-ಬೇಳೆ ನೆನೆಸಿಟ್ಟ ಹಾಗೆ

ಎಂದೋ ಹೋಗಬಹುದಾದ ವಿದ್ಯುತ್’ಗೆಂದು ಇಂದೇ ಟಾರ್ಚ್ ಸಿದ್ದ ಮಾಡಿಟ್ಟ ಹಾಗೆ
ಎಂದೋ ತಾಳಿಕಟ್ಟೋ ಗಂಡನ್ನು ನೆನೆಸಿಕೊಂಡು ಇಂದೇ ನಾಚಿ ಕೆಂಪಾದ ಹಾಗೆ
ಎಂದೋ  ಕಾಡಬಹುದಾದ ಸಂಕಟಕ್ಕೆ ಇಂದೇ ಜೋಲುಮೋರೆ ಹಾಕಿಕೊಂಡ ಹಾಗೆ
ಎಂದೋ ರೈಲಿನಲ್ಲಿ ಮಾಡೋ ಪಯಣಕ್ಕಂತ ಇಂದೇ ರಿಸರ್ವೇಷನ್ ಮಾಡಿಸಿಟ್ಟ ಹಾಗೆ
ಎಂದೋ ಕೆಲಸದಿಂದ ನಿವೃತ್ತನಾಗೋದಕ್ಕೆ ಇಂದಿನಿಂದಲೇ ಹಣ ಉಳಿಸಿಟ್ಟ ಹಾಗೆ

ರೋಗದಿಂದ ಬಿದ್ದೊದ್ದಾಡದಂತೆ ಮುನ್ನವೇ ತಪಾಸಣೆ ಮಾಡಿಸೋ ಹಾಗೆ
ಕುಡಿಯಲು ನೀರು ಬೇಕಾದಲೇ ಬಾವಿ ಅಗೆಯಲಾಗದೆಂದು ಅರಿತಿರೋ ಹಾಗೆ
ಫಲವೀವ ಮರಕ್ಕಾಗಿ ಇಂದು ಸಸಿಯ ನೆಟ್ಟು ಪೋಷಿಸಿ ಬೆಳೆಸಿದ ಹಾಗೆ
ಅರಿಗಳಿಂದ ದೇಶ ರಕ್ಷಿಸಿಕೊಳ್ಳಲು ಸೇನೆಯನ್ನು ಸಿದ್ದವಿಟ್ಟುಕೊಂಡ ಹಾಗೆ
ರಂಗದ ಮೇಲೆ ಆಟವಾಡಿ ಜನರ ರಂಜಿಸಲು ರಂಗತಾಲೀಮು ನೆಡೆಸೋ ಹಾಗೆ

ನಾವು ಇಂದು ಬದುಕುತ್ತಿರುವುದೇ ಮುಂದೊಂದು ದಿನಕ್ಕೆ ಎಂದಾದ ಮೇಲೆ
ಮೇಲೆ ಹೋಗೋಕ್ಕಂತ ಹುಟ್ಟೋವಾಗ್ಲೇ ರಿಟರ್ನ್ ಟಿಕೆಟ್ ಹಿಡಿದು ಬಂದಿರೋ ನಾವು

ನಾಳೆ ನಮ್ಮನ್ನ ಕಾಯಲಿ ಅಂತ ಇಂದೇ ಒಳ್ಳೇ ಕೆಲಸ ಮಾಡೋದಕ್ಕೆ ಹಿಂದೆ-ಮುಂದೆ ನೋಡೋದ್ಯಾಕ?
ನಮ್ ಪಾಪದ ಗುಡ್ಡೆ ಕರಗಿಸೋಕ್ಕಂತ ಅಡಕಸುಬಿ ಸ್ವಾಮಿ, ಸ್ವಾಮಿಣಿಗಳ ಪಾದಕ್ಕೆ ಬೀಳೋದ್ಯಾಕ?
ಬಾಹ್ಯ ಜಗತ್ತಿಗೆ ಬೈರಾಗಿತನ ತೋರಿಕೊಂಡು ಐಹಿಕ ಸುಖ ಉಣ್ಣೋ ಕಾವಿಗೆ ಕೈ ಮುಗಿಯೋದ್ ಯಾಕ?
ಮನದಾಗೆ ಕಲ್ಮಶ ತುಂಬ್ಕೊಂಡು, ಡೋಂಗಿತನದಿ ಪೂಜೆ ಮಾಡಿ, ನಾಕದ ಕನಸು ಕಾಣೋದ್ಯಾಕ?

ನಾ ಆಡಿದ್ದು ತಪ್ಪಾಗಿದ್ರೆ, ತಪ್ಪೊಪ್ಪುಗೆಯಾಗಿ ’ತುಳಸೀದಳ’ವನ್ನರ್ಪಿಸುವೆನೈ ಅಚ್ಚುತ !