ಎರಡು ಗಝಲ್ ಗಳು…

ಗಝಲ್ ೧

ಏಕೆ ಕಾಡುತಿರುವೆ , ಸಖಿಯೆ ?

ನೋವ ನೀಡುತಿರುವೆ ಸಖಿಯೆ ?

ಕಷ್ಟದಾ ಕಾರ್ಮೋಡ ,ಕವಿದಾಗ

ಬಿಟ್ಟೇಕೆ ಓಡುತಿರುವೆ ಸಖಿಯೆ ?

ಏರಿದಾ , ಮದಿರೆಯ ಮತ್ತಿನಲಿ

ಅದೇನ ,ಮಾಡುತಿರುವೆ ಸಖಿಯೆ ?

ಅರಳಿದ ,ಹೂವಂತೆ ನಳ ನಳಿಸಿ

ಕ್ಷಣದಿ, ಬಾಡುತಿರುವೆ ಸಖಿಯೆ

ಸಾಕು ಮಾಯೆಯ ಆಟ

ನಿಲ್ಲಿಸು ,ಬೇಡುತಿರುವೆ ಸಖಿಯೆ

***

ಗಝಲ್ ೨

ಒಬ್ಬನಿಗೆ ಹೆದರಿ ಬದುಕುವುದು ಸ್ವಾತಂತ್ರ್ಯವೆ ?

ನಾಯಕನ ಕಾಲಕೆಳಗೆ ತೂರುವುದು ಸ್ವಾತಂತ್ರ್ಯವೆ ?

ಬರಹಗಾರ ಯಾರದೋ ಮರ್ಜಿಗೆ ಬರೆಯುವುದು ಯಾಕೆ

ನಾನೇ ಎನ್ನುವವನ ಜೊತೆಗೆ ಬೆರೆಯುವುದು ಸ್ವಾತಂತ್ರ್ಯವೆ ?

ಹುತ್ತದಲ್ಲಿ ಹಾವಿದೆಯೆಂದೂ ತಿಳಿದೂ ಕೈ ಹಾಕುತ್ತೇವೆಯೇ

ಅರಿತೂ ತುಳಿಸಿಕೊಂಡು ಬಾಡುವುದು ಸ್ವಾತಂತ್ರ್ಯವೆ ?

ಜೀವನದ ಪಾಠಗಳನ್ನು ಕಲಿತೂ ಕೆಲವೊಮ್ಮೆ ಎಡವುತ್ತೇನೆ

ಅತಿಯಾಸೆ ಚಿಂತೆಯಲೇ ಸದಾ ಸೋಲುವುದು ಸ್ವಾತಂತ್ರ್ಯವೆ ?

ಊರ ಬೀದಿಯಲ್ಲಿ ನಾನೀಗ ನಡೆವಾಗ ಅಪರಿಚಿತನಾದೆ ಈಶ

ತಲೆ ತಗ್ಗಿಸಿ ಇರುವಾಗಲೂ ಹೀಗೇ ಕೆದಕುವುದು ಸ್ವಾತಂತ್ರ್ಯವೆ ?

-ಹಾ .ಮ ಸತೀಶ ಬೆಂಗಳೂರು

ಚಿತ್ರ ಕೃಪೆ: ಇಂಟರ್ನೆಟ್ ತಾಣ