ಒಂದು ಗಝಲ್...

ಶರಧಿ ದಂಡೆಯಲಿ ಮರಳು ಮನೆ ಕಟ್ಟಿ

ಕಾಯುತಿರುವೆ ಯಾರಿಗಾಗಿ

ಮುದದಿ ರಂಗುರಂಗಾದ ಕನಸುಗಳ ಕಾಣುತಿರುವೆ ಯಾರಿಗಾಗಿ ||

ಕಡಲ ಕಿನಾರೆಯ ತೀರದಿ ಬೀಸುವ ತಂಬೆಲರು ಬಿಸಿಯಾಯಿತೇಕೆ

ಒಡಲ ಆಳದ ನೂರಾರು ಭಾವಗಳಿಗೆ

ಬೇಯುತಿರುವೆ ಯಾರಿಗಾಗಿ ||

ಸಾಗರದ ಮಡಿಲಲ್ಲಿ ಆಡಿದ ಸಲಿಗೆ ಸಲ್ಲಾಪಗಳು ನೆನಪಾದವೇ

ಮಾಗಿಯ ಚಳಿಯಲಿ ಎಸಗಿದ ತಪ್ಪಿಗಾಗಿ

ನೋಯುತಿರುವೆ ಯಾರಿಗಾಗಿ ||

ಪ್ರೇಮದ ಅರಮನೆಗೆ ರಾಜನಿಲ್ಲದ ಮಹಾರಾಣಿ ನೀನಾದೆಯಲ್ಲ

ಕಾಮನೆಗಳ ಬುತ್ತಿಗಂಟು ಬಿಚ್ಚಿ ಉಣ್ಣಲು ಕೂಗುತಿರುವೆ ಯಾರಿಗಾಗಿ ||

ಸಂಜೆಯ ಹೊಂಬಣ್ಣಗಳ ನಡುವೆ ಬಿಜಲಿಯ ರಶ್ಮಿಯ ಸರಣಿ ಮಿನುಗಿತಲ್ಲ

ಮಂಜು ಕವಿದ ಬಾಳಲಿ ನಲ್ಲನೆದುರು ಬರಲು

ಇನ್ನೂ ಕುಳಿತಿರುವೆ ಯಾರಿಗಾಗಿ ||

-ಈರಪ್ಪ ಬಿಜಲಿ ಕೊಪ್ಪಳ

ಚಿತ್ರ ಕೃಪೆ: ಇಂಟರ್ನೆಟ್ ತಾಣ