ಒಲವಿನೊಸಗೆ

ಹನಿ ಹನಿ ಒಲವಧಾರೆ

ಧಾರಾಕಾರ ಹರಿಸಿದೆ ನೀನು

ಮಳೆಯಲ್ಲಿ ನಿಂತ ಗೋರ್ಕಲ್ಲು

ಕೊನರದ ಕೊರಡಾದೆ ನಾನು.

ಹಸಿರ ಹಬ್ಬಿಸಲೆಂದೆ ಹರಿದೆ

ಪ್ರೀತಿಯೊರತೆಯಾಗಿ ನಾನು

ತೀರದ ದಾಹದ ಮರುಭೂಮಿ

ನನ್ನ ಹೀರಿ ನಿಂತೆ ನೀನು.

ನನಗೆ ನೀನು; ನಿನಗೆ ನಾನು

ಮರೆಯಬಹುದೆ ವಾಸ್ತವ?

ಅವರು ಇವರು ಎಲ್ಲ ಇರಲಿ

ನಿರ್ವ್ಯಾಜ ಪ್ರೀತಿ ಹಂಚುವ.

ಹಂಚಿ ತಿನುವ ಹಣ್ಣು - ಪ್ರೀತಿ

ಔದಾರ್ಯ ಸ್ವಾತಂತ್ರ್ಯ ಅದರ ರೀತಿ

ನೀಗಿಕೊಳುವ ಬಗೆಯ ಭೀತಿ

ತಿಳಿವು ಒಲವು ಬಾಳ ನೀತಿ.

ಒಲವ ಧಾರೆ ಹರಿಸು ನೀನು

ಚಿಗುರಿ ನಲಿವ ನೆರಳಾಗುವೆ ನಾನು

ಸಸ್ಯಶಾಮಲೆ ಮಾತೆಯೆನಿಸು ನೀನು

ಪ್ರೀತಿ ನದಿಯಾಗಿ ಹರಿವೆ ನಾನು.