ಕನ್ನಡದಲ್ಲಿ ಸೈನ್ಸ್ ಫಿಕ್ಷನ್

ಕನ್ನಡದಲ್ಲಿ ಸೈನ್ಸ್ ಫಿಕ್ಷನ್ ಬರವಣಿಗೆಗಳನ್ನು ಹುಡುಕುತ್ತಿದ್ದೆ. ಹಲವರ ಬಳಿ ವಿಚಾರಿಸಿದೆ. ನಮ್ಮ ಮಾಮ ತುಂಬ ಕನ್ನಡ ಪುಸ್ತಕಗಳನ್ನು ಓದ್ತಿರ್ತಾರೆ - ಅವರ ಬಳಿ ವಿಚಾರಿಸಿದಾಗ ಕನ್ನಡದಲ್ಲಿ ಸೈನ್ಸ್ ಫಿಕ್ಷನ್ ಬರೆದ ಕೆಲವರ ಹೆಸರುಗಳು ತಿಳಿದುಬಂತು.

"ಮನು" ಎಂಬ ನಾಮಾಂಕಿತದಡಿ ಬರೆಯುವ ರಂಗನಾಥನ್, ರಾಜಶೇಖರ ಭೂಸನೂರಮಠ, ಚಿರಪರಿಚಿತರಾದ ನಾಗೇಶ್ ಹೆಗಡೆ ಹಾಗು ಇನ್ನೂ ಹಲವರು ಕನ್ನಡದಲ್ಲಿ ಸೈನ್ಸ್ ಫಿಕ್ಷನ್ ಬರೆದಿದ್ದಾರೆಂದು ತಿಳಿದುಬಂತು. ಪ್ರಿಸ್ಮ್ ಪಬ್ಲಿಷರ್ಸ್ ಹೊರತಂದಿರುವ "ಕನ್ನಡದಲ್ಲಿ ವೈಜ್ಞಾನಿಕ ಕಥೆಗಳು" ಪುಸ್ತಕದಲ್ಲಿ ಹಲವಾರು ಬರಹಗಳಿವೆಯಂತೆ.

ಇದಲ್ಲದೆ ಸ್ವತಃ ಕೆ ಪಿ ಪೂರ್ಣಚಂದ್ರ ತೇಜಸ್ವಿಯವರು ಬರೆದ "ಕರ್ವಾಲೋ" ಕೂಡ ಸೈನ್ಸ್ ಫಿಕ್ಷನ್ ರೀತಿಯಲ್ಲಿತ್ತು.

ಮಾಮ ಹೇಳುವಂತೆ "ಮನು"ರವರು ಬರೆದ "ಮೃಗಶಿರ", ರಾಜಶೇಖರ ಭೂಸನೂರಮಠ ಬರೆದ "ವಜ್ರಗಳು, ಒಣಕೊಬ್ಬರಿ ಮತ್ತು e=mc²" ಓದಲು ಬಹಳ ಚೆನ್ನಾಗಿದೆಯಂತೆ.

ಸೈನ್ಸ್ ಫಿಕ್ಷನ್ ಬಗ್ಗೆ ಮಾತನಾಡುವಾಗ ತಮ್ಮ ಸಿನಿಮಾ ಮೂಲಕ ವಿಶ್ವದಾದ್ಯಂತ ಛಾಪು ಮೂಡಿಸಿದ ನಿರ್ದೇಶಕ ಸತ್ಯಜಿತ್ ರೇ ಬರೆದ ಪುಸ್ತಕಗಳು ನೆನಪಾಗುತ್ತದೆ. ಅವರು ತಮ್ಮ ಮಾತೃ ಭಾಷೆ ಬೆಂಗಾಲಿಯಲ್ಲಿ ಬರೆದ "ಪ್ರೊಫೆಸರ್ ಶೋಂಕು" ಪುಸ್ತಕಗಳ ಇಂಗ್ಲೀಷ್ ಅನುವಾದ ಸಾಕಷ್ಟು ಅಚ್ಚಾಗಿವೆ.